Read Lengua Sur Salmos 96 Bible Online

Salmos 96 - Lengua Sur bible

Salmos 96

¹Kólmeneykmásses Wesse' egegkok, axnagkok negmeneykmasso; kólmeneykmásses Wesse' egegkok, kélyókxoho kélheykha nak keso náxop;

²kólmeneykmásses Wesse' egegkok, kaltaqmalma kélpeywa kólxének apwesey; kólxén chá'a yókxoho ekhem apteme segwagkasso teyp.

³Kólxén ektémakxa apcheymákpoho tén han ektémakxa aqsok sempelakkasso agwetak apkelane nápaqta'awók ma'a apyókxoho énxet'ák, tén han ekyókxoho yókxexma,

⁴hakte Wesse' egegkok apteme apwányam apagko', payhawók ólteméssesek apcheymákpoho, ¡apcheymáp nahan neyseksa m'a ekyókxoho aqsok ekha nak élmowancha'a!

⁵Mékoho m'a aqsok apcháyókxa nak chá'a pók énxet'ák, Wesse' egegkok axta eyke apkelane néten.

⁶¡Yetnegkek ekyawe agko' élyenma m'a aphakxa nak! ¡Yetnegkek apmopwána, tén han ektaqmalma m'a tegma appagkanamap apagkok nak!

⁷Kóltemésses apcheymákpoho Wesse' egegkok, énxet'ák yetlo kélnámakkok, kóltemésses nahan ekha eyeymáxkoho m'a ektémakxa nak apmopwána Wesse' egegkok;

⁸kólteme kéláyo Wesse' egegkok, ekpayhawo nak kólteméssesek; kólántaxnegwakxa m'a kañe' apxagkok nak yetlo kélseykekxa aqsok kélmésso naqsa.

⁹Kólpeykesho Wesse' egegkok ma'a kañe' tegma appagkanamap apagkok aptaqmalma. ¡Apyókxoho énxet'ák sa' elpexyennók apmonye'!

¹⁰Kólteme sa' kólának pók aptémakxa énxet'ák se'e: “¡Wesse' egegkok apteme Wesse' apwányam!” Apyennaqtéssamók axta appekkenma nélwanmeygkaxa, yaqwayam enxoho megkayawheykha; aphéssamók han mók apkeltaqmelchesso m'a énxet'ák.

¹¹¡Kalpayhekxa kélwáxok énxet'ák kélheykha nak néten tén han kélheykha nak keso náxop! ¡Kapáwa awáxok wátsam ekwányam, tén han ekyókxoho aqsok ekhéyak nak ma'a kañe'!

¹²¡Kapayhekxa awáxok yókxexma, tén han ma'a ekyókxoho élleykha nak awáxok! ¡Kólwehesha kólátsaha yenta'a élyawe élámha nak naxma,

¹³nápaqtók Wesse' egegkok apxegakmo nak! ¡Naqso', apxegakmek yaqwayam etnehek wesse' apwányam keso náxop, elanha sa' énxet'ák keso nélwanmeygkaxa, yetlo ekpéwomo aptémakxa, tén han ekmámnaqsoho'.