Read Lengua Sur Proverbios 12 Bible Online

Proverbios 12 - Lengua Sur bible

Proverbios 12

¹Negásekhayo ektémakxa nak sẽlpékessáseyak, cháxa negásekha'awo m'a negya'áseykegkoho nak aqsok; nentaqnagko ektémakxa nak sẽlnókáseykha, cháxa nenteme segyeyháxma xa.

²Yásekhohok chá'a Wesse' egegkok ma'a énxet ektaqmalma nak aptémakxa', eñássesagkohok eyke chá'a m'a énxet ekmaso nak élchetámeykha apwáxok.

³Megkapasmehek énxet ma'a aptémakxa ekmaso nak; exhok eyke yámet ekyennaqtél'a élatchesso kepmenák xapop ma'a énxet élpéwomo nak apkeltémakxa'.

⁴Kapeykessásekxak chá'a apwáxok atáwa' m'a kelán'a ektaqmalma nak ektémakxa', kahaxaksek agko' eyke chá'a aptáwa' énxet ekmaso nak ektémakxa'.

⁵Aqsok ekpéwomo chá'a kalxénmakha apkelwáxok etekkesek ma'a énxet'ák apkelpéwomo nak; keñe m'a élmasagcha'a nak apkeltémakxa', wánxa aqsa m'a nélyexancháseykha nak chá'a egmók.

⁶Kelhanma segaqhamo appeywa m'a énxet ekmaso nak aptémakxa'; negwagkásamáxche teyp akke m'a ektémakxa nak chá'a appeywa m'a énxet appéwomo nak.

⁷Apmassegwokmek agkok ma'a élmasagcha'a nak apkeltémakxa', metepagkehek chá'a, keñe m'a apkelpéwomo nak, etepagkok aqsa chá'a aptawán'ák neptámen.

⁸Tásek chá'a katnehek apxénamap énxet eñama apmopwána aqsok, keñe m'a énxet ekyeyháxma nak, kólwanyaha aqsa chá'a.

⁹Tásek antéhek énxet ekha aptamheykha meyke negeymáxkoho, kaxnók ma'a néltémo nak chá'a hẽláwho', meyk aqsa hegaqhek.

¹⁰Ey'asagkohok chá'a aqsok eyeyméxchexa apnaqtósso m'a énxet appéwomo nak, keñe m'a énxet ekmaso nak aptémakxa', mey'ásegkok ektémakxa ekmayósa elanok apnaqtósso.

¹¹Xámok katnehek apto m'a énxet apkelchekhamo nak; keñe m'a énxet meyke nak ekxeyenma apwáxok, wánxa aqsa elának ma'a aqsok megkamowána nak kapasmok.

¹²Aqsok eyaqhémo agámenyéhok apkelhanma m'a énxet'ák élmasagcha'a nak apkeltémakxa, exhok eyke yámet ekyennaqtél'a élatchesso kepmenák xapop ma'a énxet élpéwomo nak apkeltémakxa'.

¹³Kápekxohok apagko' chá'a appeywa apteme apmopwána amya'a m'a énxet ekmaso nak aptémakxa, tásek eyke chá'a katnehek apmallanma eyesagkexa m'a énxet ekpéwomo nak aptémakxa.

¹⁴Aqsok ektaqmela nak chá'a nenxeyenma, awanchek hempasmekxa', anxewekxak han chá'a ekyánmaga aqsok nenlane.

¹⁵Yának chá'a kataqmelak ekyókxoho aqsok apkelanakxa m'a énxet ekyeyháxma nak, yeyxhok eyke chá'a ektáhakxa kélpaqhetchesso m'a énxet apya'áseykegkoho nak aqsok.

¹⁶Yahamok chá'a elwok ma'a énxet ekyeyháxma; megyeyxók eyke chá'a aptaqnómap ma'a énxet apya'áseykegko nak aqsok.

¹⁷Énxet apxeyenma nak chá'a amya'a ekmámnaqsoho, etekkesek chá'a aqsok ekpéwomo; keñe m'a apmopwána amya'a nak chá'a, enaqtawasagkohok chá'a apnámakkok elyexanchesha.

¹⁸Yetneyk énxet apyenheykha nak chá'a appeywa ekmaso pók, ektémól'a elyetxák pók énxet sawo, awanchek eyke hentaqmelchessók appeywa m'a énxet apya'áseykegkoho nak aqsok, ektémól'a pánaqte.

¹⁹Megkamassegwomek chá'a m'a amya'a ekmámnaqsoho nak, megkawegqók eyke chá'a m'a amya'a megkamámnaqsoho nak.

²⁰Ekmowána amya'a yetnók apkelwáxok ma'a énxet'ák élmasagcha'a nak apkeltémakxa', élxeyenma nak chá'a apkelwáxok elanagkok aqsok ekmaso; ekpayheykekxa egwáxok akke yetnók apkelpeywa m'a énxet'ák aptekkesso nak meyke ektáhakxa egwáxok.

²¹Métyehek sa' ekmaso apha xama enxoho m'a énxet appéwomo nak, keñe sa' ma'a énxet ekmaso nak aptémakxa', káhapwak sa' ekyókxoho ekmaso apha.

²²Eltaqnaweygkohok Wesse' egegkok ma'a énxet apteme nak chá'a apkelmopwancha'a amya'a, kalkohok eyke chá'a apwáxok elanok ma'a apkelxeyenma nak chá'a ekmámnaqso'.

²³Mexénmakha ektémakxa apya'áseyak aqsok ma'a énxet apmopwána nak aqsok, keñe m'a ekyeyháxma nak, exekmósek chá'a énxet'ák apteme ekyeyháxma.

²⁴Énxet apwasqapma nak aptamheykha, néten sa' etnehek nepyeseksa énxet'ák; kélásenneykha naqsa sa' chá'a kóltéhek ma'a apháxamakpoho nak chá'a etneykha.

²⁵Élchetamso apwáxok ekyentaxno chá'a kayaqhápok ma'a énxet; kapeykessásekxohok eyke chá'a apwáxok ma'a kélpaqhetchesso ektaqmela nak.

²⁶Énxet appéwomo chá'a apxekmósso ámay ma'a pók, keñe m'a élmasagcha'a nak apkeltémakxa, elyetnakhágwók chá'a.

²⁷Megyaqhehek apyógkexma m'a énxet apháxamákpoho nak chá'a, xámok eyke katnehek aqsok apagkok ma'a énxet apmopmenyého nak aptamheykha.

²⁸Hegméshok ekyennaqte egnények ma'a nentémakxa ekpéwomo nak; keñe m'a mantaqmelcháseykegkoho nak nenláneykegkoho nentáhakxa', hegya'aksek ma'a nétsapmakxa.