Read Lengua Sur Proverbios 15 Bible Online

Proverbios 15 - Lengua Sur bible

Proverbios 15

¹Kamasseksohok chá'a aplo egmók ma'a nentaqmelchessamo nak negátegmowéyak; kayágwomhok eyke chá'a aplo m'a nempaqhetchesa enxoho ekyennaqte.

²Negya'áseykegkoho aqsok chá'a katyapok apkelpeywa m'a énxet'ák apkelya'áseykegkoho nak chá'a aqsok; keñe m'a énxet élyeyháxma nak, amya'a élyeyháxma aqsa chá'a elxénagkok.

³Apkeláneykha Wesse' egegkok ekyókxoho keso náxop, elanha chá'a m'a énxet'ák éltaqmalma nak apkeltémakxa', tén han ma'a élmasagcha'a nak apkeltémakxa'.

⁴Nentaqmelchessamo nempaqhetchesso egmók ekteme segmésso ekyennaqte egnények; katsagkasek eyke chá'a egwáxok ma'a megkeyxnegwayam nak chá'a nempeywa ampaqhetchesek egmók.

⁵Megyeyxók appaqhetchesso apyáp ma'a énxet ekyeyháxma nak; keñe m'a apkelyeheykekxoho nak chá'a, cháxa apxekmósa apteme ekha apya'áseyak aqsok.

⁶Xámok agko' katnehek aqsok apxagkok ma'a énxet meyke nak aptémakxa', keñe m'a énxet ekyeyháxma nak, megkapasmehek chá'a m'a aqsok apwete nak.

⁷Yexpánchesha chá'a negya'áseyak aqsok ma'a énxet apya'áseykegkoho nak aqsok; keñe metnehek ma'a énxet élyeyháxma nak.

⁸Etaqnawhok Wesse' egegkok aqsok apchaqhássesso m'a énxet élmasagcha'a nak apkeltémakxa', yetlo ektaqmeleykha apwáxok eyke chá'a emok takha' nempeywa nélmaxnagko apagkok ma'a énxet apkelpéwomo nak.

⁹Etaqnawhok Wesse' egegkok apkeltémakxa nak ma'a énxet'ák élmasagcha'a nak apkeltémakxa', yásekhohok eyke m'a énxet apkelane nak ekpéwomo aptémakxa'.

¹⁰Yentexek katnehek kéllegassáseykegkoho m'a énxet apyenseyam nak apyetlo ámay ekpéwomo; yetsapok sa' ma'a énxet aptaqnagko nak kélnókáseykha.

¹¹Weykmók apwete Wesse' egegkok ma'a élmaheykegkaxa nak eghagák, ¡ekyágwánxa agkok ma'a ektémakxa nak chá'a élchetámeykha apwáxok énxet!

¹²Megyásekheyk ektáha nak chá'a apnókáseykha m'a énxet apchásennamap nak, mepáxaqwomek nahan ma'a énxet'ák apkelya'áseykegkoho nak aqsok.

¹³Ekpayheykekxa egwáxok, kátsaha négát; élapwayam egwáxok, megkátsaha négát.

¹⁴Énxet apmopwána nak aqsok, etegyekxohok apya'áseyak aqsok, keñe m'a élyeyháxma nak, etegyekxoho aqsa aqsok élyeyháxma.

¹⁵Yentexek chá'a katnehek apha yókxoho ekhem ma'a aplegeykegkoho nak ekyentaxno apwáxok; yókxoho ekhem akke katnehek chá'a ektaqmalma apha m'a ekpayheykekxa nak chá'a apwáxok.

¹⁶Tásek antéhek meyke aqsok egagkok, tén han antéhek negáyo Wesse' egegkok, kaxnók antéhek ekxákma aqsok egagkok, ekyetnamakxa nak ektamheykha egwáxok.

¹⁷Tásek antók nento éleñama nak namyep ma'a ekhakxa nak nélásekhamaxkoho, kaxnók antók ápetek ma'a ekhakxa nak nélenmexamaxche'.

¹⁸Etekkesek chá'a éllámaxche m'a énxet ekmanyehe nak chá'a elwok; emasseksek eyke chá'a m'a énxet mepekhésamap nak chá'a elwok.

¹⁹Xámok katnehek am'ák ámay apagkok ma'a énxet apháxamakpoho nak chá'a etneykha; cháxña'awók eyke katnehek ámay apagkok ma'a énxet ekpéwomo nak aptémakxa'.

²⁰Epeykessásekxak chá'a awáxok chána m'a kélketche apya'áseykegkoho nak aqsok; elwanyaha eyke chá'a chána m'a kélketche ekyeyháxma nak.

²¹Kapeykessásekxak chá'a apwáxok apteme ekyeyháxma m'a énxet meyke nak ekxeyenma apwáxok; elanagkohok eyke chá'a ektémakxa apxega m'a énxet apmopwána nak aqsok.

²²Kamassegwók chá'a aqsok yaqwánxa anlának ma'a mólpaqhetchásexkoho enxoho chá'a sekxo'; katyapok eyke chá'a aqsok ma'a apxáma enxoho apkelpaqhetchásamákpoho.

²³¡Kalpeykásekxohok chá'a apkelwáxok énxet ekpayhawo enxoho chá'a aqsok nenxeyenma, ekyagwánxa agkok ma'a negaqhawo enxoho kélámenyéxa katnehek!

²⁴Néten maheykegkok ma'a ámay ekyennaqte nak egnények, kawagkasek chá'a teyp emáwhok emhagkok nétsapmakxa m'a énxet apya'áseykegkoho nak aqsok.

²⁵Epalchessesek chá'a apxanák Wesse' egegkok ma'a énxet éleymáxkoho nak chá'a apkelwáxok, megyohók eyke chá'a kólmenyexchesek xapop agkok ma'a kelán'a tampe'.

²⁶Eltaqnawhok Wesse' egegkok ma'a apmáheyo nak chá'a elanagkok aqsok ekmaso, kalkohok eyke chá'a apwáxok ma'a kélpeywa meyke nak ekyepetche xama aqsok ekmaso.

²⁷Énxet ekyeykhágweykmoho nak apmopmenyého exámasagkok aqsok apagkok, enaqtawásekxohok apagkok chá'a m'a ekheykha nak apxagkok, keñe m'a aptaqhessamo nak selyaqye apxawe yaqwayam mexének ektemegweykmoho exma', eweynchamha sa' makham.

²⁸Kalchetmok chá'a sekxók apwáxok énxet appéwomo yaqwánxa etnehek yátegmowágkok, keñe m'a énxet ekmaso nak aptémakxa', yahamok chá'a katyapok appeywa ekmaso.

²⁹Melanók Wesse' egegkok ma'a énxet'ák élmasagcha'a nak apkeltémakxa', emok eyke chá'a takha' nempeywa nélmaxnagko apagkok ma'a énxet'ák élpéwomo nak apkeltémakxa.

³⁰Kapayhekxak chá'a egwáxok negwet'a enxoho eyátsencha'a nápat egmók; kallókashok chá'a egyempehek nenleg'a enxoho m'a amya'a ektaqmalma.

³¹Énxet apháxenmo nak kélnókáseykha, segméssamo nak ekyennaqte egnények, epáxaqwók sa' ma'a énxet'ák apkelya'áseykegkoho nak aqsok.

³²Énxet megyaháxenmo nak kélpaqhetchesso, apsexnánémakpekxoho apagko' etnehek; keñe m'a apkelyeheykekxoho nak chá'a kélnokáseykha, étak apya'áseykegkoho aqsok.

³³Negáyo Wesse' egegkok ekteme sẽlxekmósso m'a negya'áseykegkoho aqsok; néltamhok agkok antéhek sẽláyo, kéméxcheyk sekxók antéhek meyke eyeymáxkoho egwáxok.