Read Lengua Sur Proverbios 16 Bible Online

Proverbios 16 - Lengua Sur bible

Proverbios 16

¹Énxet chá'a sekxók apkeláneykekxa yaqwánxa elának aqsok; keñe Wesse' egegkok apkeltémo chá'a katyapok.

²Yának chá'a kataqmelak ekyókxoho aqsok apkelanakxa enxoho m'a énxet, Wesse' egegkok eyke apteme apyekpelchémo m'a ektémakxa nak chá'a apwáxok.

³Kólána chá'a epasmok Wesse' egegkok ma'a ekyókxoho aqsok kéllanakxa enxoho chá'a, keñe sa' kalanaxchek chá'a m'a aqsok kélmáheyo kóllána'.

⁴Apkeláneyak axta Wesse' egegkok ekyókxoho aqsok yaqweykenxa chá'a etnéssesek: weykmók han apkelane m'a énxet ekmaso nak aptémakxa, yaqwayam sa' eñássesagkohok ma'a ekhem nélyekpelchamáxchexa sa'.

⁵Eltaqnaweygkohok Wesse' egegkok ma'a énxet'ák éleymáxkoho nak chá'a apkelwáxok; naqsók sa' kóllegássesagkohok xa énxet'ák nak.

⁶Kólmasseksohok chá'a nentémakxa magya'assáxma m'a negásekha'awo enxoho Wesse' egegkok yetlo magyenyaweykha; nentemék agkok negáyo Wesse' egegkok, cháxa negyenyékxo aqsok ekmaso xa.

⁷Leyawók agkok apwáxok Wesse' egegkok aptémakxa xama énxet, kawomhok apkelásekhassáseykekxoho m'a apkelenmexma nak.

⁸Tásek antéhek ántawók aqsok egagkok yetlo meyke nentémakxa', kaxnók agwetak ekxámokma aqsok egagkok yetlo megkapéwomo nentémakxa.

⁹Elánekxak chá'a aptáhakxa énxet, Wesse' egegkok eyke chá'a epékessesagkok ma'a apmahágkaxa enxoho.

¹⁰Epaqmétek chá'a wesse' apwányam yetlo apmeykha Dios appeywa, mexének aqsa han chá'a yaqwánxa kólteméssesek énxet megkapayhawo enxoho.

¹¹Wesse' egegkok apagkok ma'a ekyókxoho kelyetsáteyak; cham'a apyekpelchémo nahan chá'a m'a.

¹²Eltaqnawhok kelwesse'e apkelwányam ma'a nentémakxa ekmaso nak, hakte ekpéwomo nenlanekxésso amya'a énxet'ák ekyennaqtésso m'a aptémakxa nak wesse' apwányam.

¹³Elásekhohok chá'a wesse' apkelwányam ma'a énxet'ák apkelpaqméteykha nak chá'a yetlo ekmámnaqso', meyke nak chá'a apkelyexamakpoho, elanok chá'a yetlo ektaqmeleykha apkelwáxok.

¹⁴Aplókek agkok wesse' apwányam, yetneyk katnehek yaqwayam emátog, énxet apya'áseykegkoho aqsok akke aqsa apwanchek emasséssesek aplo.

¹⁵Mematñehek chá'a énxet ekpayheykxoho enxoho apwáxok wesse' apwányam, máxa ekmámeye katnehek hempasmok.

¹⁶Tásek antegyek negya'ásegwayam aqsok, kaxnók ma'a sawo ekyátekto ekmomnáwa nak; tásek antegyek negya'ásegwayam, kaxnók ma'a sawo ekmope ekmomnáwa nak.

¹⁷Negyamasma aqsok ekmaso apkeltémakxa nak ma'a énxet'ák élpéwomo nak apkeltémakxa; nenláneykegkoho nentémakxa', cháxa negmasma negyennaqte xa.

¹⁸Nentawásamáxche xegeykmok natámen ma'a eyeymáxkoho nak chá'a egwáxok; nentéyam chá'a kaxegmak natámen ma'a magésso nak ageyxkoho'.

¹⁹Tásek antéhek megkeymáxkoho egwáxok xamók ma'a énxet'ák meyke nak aqsok apagkok, kaxnók antéhek ekxákma aqsok egagkok xamók ma'a énxet'ák apkeleymákpoho nak.

²⁰Tásek katnehek apha m'a énxet apkelyeheykekxoho nak chá'a kélxekmowáseyak; ¡apkeleñémo énxet apteme nak apcháyo Wesse' egegkok!

²¹Apmopwána aqsok chá'a eltamhakpok ma'a énxet élchetámeykha nak chá'a apwáxok, yetlo apya'áseykegkoho aqsok; kalmok nahan chá'a apkelwáxok énxet'ák ma'a nempeywa ekmátsa nak.

²²Negya'áseykegkoho aqsok ekteme ekteyapmakxa m'a ekyennaqte egnények; nélxekmóssek agkok énxet'ák élyeyháxma nak, élyeyháxma aqsa chá'a etnahagkok.

²³Apwanchek chá'a elanagkohok apya'asakxa appeywa m'a énxet élchetámeykha nak chá'a apwáxok yetlo apya'áseykegkoho, kalmok han chá'a apkelwáxok énxet'ák ma'a aptáhakxa enxoho appeywa.

²⁴Máxa yányawhéna' apyegmenek ma'a ekmátsa nak nempeywa: hegátsessásekxak chá'a egwáxok, hegmeyásekxak han chá'a axnagkok negyennaqte.

²⁵Yetneyk ámay apkene nak kataqmelak énxet, nétsapmakxa eyke maheykegkok xa ámay nak.

²⁶Apmáyhe etwok chá'a kaltamhok etneykha m'a énxet aptamheykha nak chá'a; meyk eyaqhe chá'a kamayhásseshok etneykha.

²⁷Énxet ekmaso nak aptémakxa, cham'a ekyetnamakxa m'a ekmaso nak nentémakxa'; ¡máxa táxa eyáléwe m'a appeywa nak!

²⁸Etekkesek chá'a apkelenmexamap énxet ma'a ekmaso nak aptémakxa'; nélenmexamaxche han etekkesek ma'a énxet apkeltennágwayam naqsa nak chá'a apmopwána amya'a m'a nátegma.

²⁹Elyexanchesha chá'a pók ma'a énxet apyennaqtésamákpoho nak chá'a, keñe éntemekxak ma'a ámay ekmaso nak.

³⁰Enaqtenchesha chá'a apaqta'ák ma'a énxet'ák élxeyenma nak chá'a apkelwáxok elanagkok aqsok ekmaso; elmagkok chá'a apatña'ák ma'a appenchásegko enxoho apkeláneyak aqsok.

³¹Apxawe ekwenaqte apha énxet ma'a ekmópeyo nak chá'a apqátek, eñama meyke aptémakxa'.

³²Tásek etnehek mepekhésso nak elwok énxet, kaxnók etnehek ma'a apyennaqte; tásek yepwának apkeláneykegkoho aptémakxa énxet, kaxnók elmok ma'a tegma apkelyawe nak.

³³Etwasagkok chá'a xama aqsok énxet, Wesse' egegkok eyke apxeyenma chá'a m'a ekyókxoho yaqwánxa enxoho kaphemmok.