Read Lengua Sur Proverbios 17 Bible Online

Proverbios 17 - Lengua Sur bible

Proverbios 17

¹Tásek antók nento élyenneykekxa éleymomáxche, tén han anxek meyke ektáhakxa egwáxok, kaxnók anlának chá'a ekxámokma ektámáxche ekyawe tén han ólenmexaxche'.

²Wesse' chá'a kóltemessásekxak kélásenneykha naqsa apmopwána nak aqsok, apchásenneykha naqsa sa' etnekxak ma'a kélketche ekyeyháxma nak, exkekxak sa' han ma'a aqsok ekpayhawo nak exkekxak ma'a, ektéma nak ma'a pók apkelyáxeg'a nak.

³Kólwatnohok chá'a kóllanok ektémakxa m'a sawo ekyátekto ekmomnáwa, tén han sawo ekmope nak; Wesse' egegkok akke negko'o apkelányo chá'a ektémakxa élchetámeykha egwáxok.

⁴Yeyxhok chá'a appeywa ekmaso énxet ma'a ekyeyháxma nak, keñe m'a apmopwancha'a nak chá'a amya'a, yeyxhok chá'a apkelpaqméteykha m'a apkelxéneykha nak apnámakkok ekmaso.

⁵Elókasek chá'a ektáha axta Apkelane m'a énxet apkesmésso nak ma'a meyke nak aqsok apagkok; kóllegássesagkohok sa' chá'a m'a ektáha nak ekpayheykekxa apwáxok apwete ektemegweykmoho exma apha.

⁶Aptawán'ák chá'a ekpeykessáseykekxa apkelwáxok ma'a apkelwányam nak; chána eyke chá'a élpeykessáseykekxa apkelwáxok ma'a kélketchek nak.

⁷Megkatxók chá'a epaqmétek nempeywa ektaqmela m'a énxet ekyeyháxma nak, megkatxók han etnehek apmopwána amya'a m'a ekha nak chá'a kéláyo.

⁸Yának chá'a kaxnak apmopwána m'a énxet apmésso nak chá'a selyaqye pók yaqwayam megkaxénaxcheyk ektemegweykmoho exma, hakte katyapok chá'a m'a ekyókxoho aqsok apmakókxa enxoho chá'a elána'.

⁹Énxet mexnéssamo nak mók kélteméssesakxa ekmaso, yásekhakpohok chá'a; keñe m'a énxet apkelenxányam nak eyaqmagkásekxak kélteméssesakxa ekmaso, kamaskok exek ma'a apnámakkok apkelásekhayókxa nak.

¹⁰Xama kélpaqhetchesso ey'ásegwók ektáhakxa aqsok ekmaso apkelane m'a énxet apya'áseykegkoho nak aqsok, keñe m'a énxet ekyeyháxma nak, cien kelyekpexchetma eykhe kóltéhek, mey'ásegwome'.

¹¹Apkelámha apmonye'e aqsa chá'a elenmexmakha m'a énxet aptegyeykha nak chá'a ektemegweykmoho exma ekmaso, xama énxet aplo apagko' sa' eyke kóláphássesek ma'a yaqwayam yaqheykha.

¹²Tásek antahañak aqsok nawhak eklo kéllókasso kélmenyexchesso étkók, kaxnók antahañak énxet ekyeyháxma neyseksa apkelane aqsok ekmaso.

¹³Megkamassegwomek sa' ekyetno apxagkok énxet aqsok ekmaso apyaqmagkáseykekxa nak chá'a aqsok ekmaso m'a kélteméssessamakxa ektaqmela.

¹⁴Máxa yegmen ekyawe ekteyapmal'a katnehek sekxo' enxoho nélátegmoweyxko; tásek eyke agyetnakhak chá'a heykxa amonye' yaqwayam kasógwok.

¹⁵Nenxeyenma meyke aptémakxa m'a énxet apsexnánémap nak, keñe han nenxeyenma apsexnánémap ma'a énxet meyke nak aptémakxa', cháxa ánet aqsok aptaqnagkamo apagko' nak ma'a Wesse' egegkok.

¹⁶Kaqhok exegmak énxet ekyeyháxma esógmak selyaqye yaqwayam emok negya'ásegwayam aqsok, méko apya'áseyak.

¹⁷Egmók segápeykha nak chá'a, máxa egyáxeg egagko' etnehek ma'a ekwa'a enxoho ekyentaxno negha.

¹⁸Eltennaksek chá'a eyánmagkassesek apméyak aqsok pók ma'a énxet meyke nak élchetámeykha apwáxok.

¹⁹Atsek chá'a emáwhok elnapakpok ma'a énxet ekmátsa nak chá'a ellókasek apnámakkok; etwasakpohok eyke apagko' chá'a m'a eyeymáxkoho nak chá'a appeywa.

²⁰Magwetyehek xama aqsok ektaqmela m'a ekmaso nak egwáxok; asagkek sa' katnehek ektáhakxa m'a apkelmopwancha'a amya'a nak.

²¹Negwete nak egketche ekyeyháxma, wánxa aqsa hegmések chá'a eklegeykegkoho egwáxok, negwete nak egketche ekmaso aptémakxa, mehegmések ma'a ekpayheykekxa egwáxok.

²²Pánaqte ektaqmela m'a ekmátsa nak egwáxok, hegyélaqtéshok eyke m'a ekyaqhápeykha egwáxok nak.

²³Éxakpohok chá'a emok selyaqye yánékpok mexének ektemegweykmoho exma m'a énxet ekmaso nak aptémakxa', yaqwayam enxoho étnakhássók chá'a m'a ektémakxa nak kéllánekxésso amya'a ekpéwomo énxet'ák.

²⁴Apya'ásegwayam aqsok aqsa kaxének apwáxok étak ma'a énxet apmopwána nak aqsok, keñe m'a ekyeyháxma nak, mey'asagkehek chá'a yaqwánxa elána'.

²⁵Ellókasek chá'a awáxok chána m'a kélketche ekyeyháxma nak, ellapwagkassesagkok nahan chá'a.

²⁶Asagkek anlekkesek selyaqye apagkok ma'a meyke nak aqsok ekmaso apkelane, asagkek han ólyekpexchetmakha m'a énxet meyke nak aptémakxa'.

²⁷Asextók chá'a epaqmétek ma'a apya'áseykegkoho nak aqsok, megkatneykha chá'a apwáxok ma'a apmopwána nak aqsok.

²⁸Kawomhok apchánémap apya'áseykegkoho aqsok tén han apmopwána aqsok, apwanmeya enxoho aqsa m'a énxet ekyeyháxma nak, mepaqmeta enxoho.