Read Lengua Sur Proverbios 18 Bible Online

Proverbios 18 - Lengua Sur bible

Proverbios 18

¹Apxakkók aqsa chá'a eltamhok etnehek ma'a apkelmeyókásamákpoho nak chá'a aqsok, elwok chá'a m'a kélpaqhetchesa enxoho.

²Mopmenyeyk kaltamék aqsok ma'a énxet ekyeyháxma nak; wánxa aqsa eltamhok kahaxnaxkohok ma'a ektémakxa nak apya'áseyak aqsok.

³Nentémakxa ekmaso ekyetláyekmoho m'a negmegqakto nak; kólya'assók chá'a m'a ekmassegwayam nak chá'a apteme kéláyo.

⁴Máxa yegmen ekmattawóneg la'a appeywa m'a énxet, máxa wátsam ényél'a yegmen, éñamakxa nak negya'áseykegkoho aqsok.

⁵Megkapayhawok elxének chá'a énxet'ák segyekpelchémo meyke apkeltémakxa m'a ektáha nak chá'a apkelsexnánémap, megkapayhawok han chá'a elsexnenak ma'a énxet meyke nak apkeltémakxa'.

⁶Nélátegmómaxche chá'a katekkesek appeywa m'a énxet ekyeyháxma nak; appeywa chá'a kasexnenak kólyekpexchetmakha.

⁷Appeywa apagko' chá'a kasexnáneyekxak ma'a énxet ekyeyháxma; kápekxohok agko' chá'a m'a aptáhakxa enxoho appeywa.

⁸Máxa nento ekmátsal'a m'a néltennágwayam nak aqsa chá'a nátegma, keytnók chá'a m'a kañók agko' nak egwáxok.

⁹Épetchekxak chá'a apkelháxamákpoho nak chá'a eltemeykha m'a apnaqtawáseykha nak chá'a aqsok, máxa apkelyáxeg chá'a etnekxa'.

¹⁰Wesse' egegkok apwesey ekteme segmasma ekyennaqte, apkelmeyeykekxexa nak chá'a elyexánegwakxak ma'a énxet'ák apkelpéwomo nak.

¹¹Énxet ekxákma nak aqsok apagkok, apchásenneykekxeyk ma'a ektémakxa nak ekxákma aqsok apagkok, apkenagkamchek katneyk ma'a ektémakxal'a meteymog kélhaxtegkesso netna'awók nepyáwa tegma apwányam.

¹²Nentawásamáxche xegeykmok natámen ma'a eyeymáxkoho nak chá'a egwáxok; ekha sẽláyo xegeykmok natámen ma'a megkeymáxkoho nak egwáxok.

¹³Segyeyháxma m'a negátegmowéyak nak chá'a heykxa amonye' nenlege, hegmegqaksek chá'a.

¹⁴Énxet apháxamap nak, awanchek kagkeyásekxak makham apyennaqte m'a ekxeyenma nak makham apwáxok eweynchamha, agkok kaxénak chá'a apwáxok eweynchamha, méko kagkeyásekxak apyennaqte.

¹⁵Elwetak chá'a apkelya'ásegwayam aqsok aptegyágko enxoho m'a énxet apkelya'áseykegkoho nak aqsok, tén han ma'a apmopwancha'a nak aqsok.

¹⁶Yahamok chá'a agmaxchek takha' nensóko enxoho negmésso naqsa aqsok egagkok, agwomok chá'a m'a aphakxa nak énxet ekha nak kéláyo.

¹⁷Agának chá'a naqsók aptáhakxa appeywa m'a énxet appaqmeyesma nak chá'a apmonye' exének aptáhakxa', keñe apwa'a enxoho m'a apkenmexma etnéssesek apmopwána amya'a.

¹⁸Kamassegwók chá'a apkelátegmómap énxet ektawásexko enxoho chá'a xama aqsok yaqwayam kólya'asagkohok ektáha ekpehewayam, kaxpánchesek chá'a m'a apkelenmexamap nak.

¹⁹Nenlókasso egmók, máxa etnehek ma'a ektémól'a tegma apátog kélápeykekxa ekyennaqte. Nentaqnagko nak egmók, hegyenyókasek egmók, máxa katnehek ma'a ektémól'a tegma apyawe kélhaxtegkesso.

²⁰Kápekxak sa' chá'a appeywa énxet, ekwokmoho ekleklágwokmo.

²¹Nempeywa yetnók ma'a ekyennaqte nak egnények tén han nétsapma; énxet ekxámokma nak chá'a apkelpeywa, ellegagkohok chá'a natámen.

²²Negwet'ak agkok entáwa', cháxa ektaqmela xa: cháxa senxekmósa sempasmo m'a Dios.

²³Apkelmaxneyáha agkok chá'a aqsok pók ma'a meyke nak aqsok apagkok, etaqmelcheshok chá'a appaqhetchesso; keñe kayhek chá'a katnehek apchátegmoweykegkokxa m'a énxet ekxákma nak aqsok apagkok.

²⁴Agwethok chá'a énxet ekmanyehe apkelwátesseyam apchásekhayo pók, agwethok eyke han chá'a xama énxet meyenyaweykha nak chá'a pók, megkaxók ma'a ektémakxal'a meyenyaweykha apyáxeg apagko'.