Read Lengua Sur Proverbios 21 Bible Online

Proverbios 21 - Lengua Sur bible

Proverbios 21

¹Wesse' egegkok chá'a apkeláneseykegkoho élchetámeykha apwáxok ma'a wesse' apwányam, étlók chá'a m'a ektémól'a wátsam ekmeyeykekxexal'a chá'a yegmen, apkeltamhókxa enxoho chá'a m'a Wesse' egegkok.

²Yának chá'a kataqmelak ekyókxoho aqsok apkelanakxa enxoho m'a énxet, Wesse' egegkok eyke apteme apyekpelchémo m'a ektémakxa nak chá'a apwáxok.

³Nenlane nak nentémakxa ekpéwomo tén han nenláneseykekxa ektaqmela apheykha m'a énxet'ák, cháxa ekleklamókxa nak apwáxok Dios antéhek xa, kaxnók ma'a kélnaqtósso ektekyawa nak negmésso.

⁴Negwanyémo egmók, eyeymáxkoho egwáxok; cháxa melya'assáxma élmoma nak apkelwáxok ma'a énxet'ák élmasagcha'a nak apkeltémakxa'.

⁵Tásek katnehek ekteyapma aqsok nentaqmelchessamo nak chá'a sekxók élchetámeykha egwáxok; asagkek eyke katnehek chá'a m'a nentemessáseykha naqsa nak nenlane, meyke aqsok egagkok hentéhek.

⁶Nenxámasso aqsok egagkok eñama nentamheykha negmowána amya'a, yahamok kamassegwók ektémól'a kamassegwók ekpánma exma, nétsapmakxa nahan hegyentamok xa aqsok nak.

⁷Kalsexnáneyekxohok apagko' sa' apkeltémakxa apkelyennaqteyásamákpoho chá'a m'a élmasagcha'a nak apkeltémakxa', eñama memáheyo etaqmelchessásekxak chá'a apheykha m'a énxet'ák.

⁸Háwe ekpéwomo m'a apkeltémakxa nak chá'a énxet'ák élmasagcha'a nak aptémakxa'; tásek eyke chá'a katnehek aqsok apkelane m'a énxet meyke nak aptémakxa'.

⁹Tásek anxek ma'a teyp enxagkok, kaxnók anxek xamo' kañe' tegma m'a kelán'a ekyenneykha nak chá'a ekpeywa henlána'.

¹⁰Aqsok ekmaso aqsa kaxénmakha apwáxok elának ma'a énxet ekmaso nak aptémakxa; magwetyehek kataqmalmakha apwáxok elanok pók.

¹¹Kéllegassásegkok agkok ma'a énxet megkeyxnegwayam nak chá'a appeywa, keñe sa' ey'ásegwók aqsok ma'a mey'áseyak nak aqsok; xama kélxekmósso aqsa kaltamek ma'a énxet apya'áseykegkoho nak aqsok.

¹²Dios apteme nak appéwomo, elanha chá'a apxagkok ma'a énxet ekmaso nak aptémakxa', yehekxak han aqsok élmaso m'a élmasagcha'a nak apkeltémakxa'.

¹³Énxet melyeheykekxa nak eltamhok epasmok ma'a meyke nak aqsok apagkok, méko sa' nahan keyxhok apkeltamho sa' nahan kólpasmok xa énxet nak.

¹⁴Kamasséssesek chá'a aplo énxet ma'a kélyexamaxkoho nak chá'a kólmések aqsok kélmésso naqsa.

¹⁵Kéllánekxéssek agkok ektaqmela amya'a m'a énxet'ák, kapayhekxak chá'a apwáxok ma'a énxet appéwomo nak, keñe káhapwak chá'a apnaqtawásamap ma'a apkeláneykegkoho nak chá'a aqsok ekmaso.

¹⁶Énxet apkelwátesseyam nak chá'a apteme ekha élchetámeykha apwáxok, emhagkok sa' ma'a apkelmaheykegkaxa nak chá'a apkeletsapma.

¹⁷Meyke aqsok apagkok sa' etnehek ma'a énxet apkelane nak chá'a m'a ekyespagkamakxa nak chá'a apwáxok, apyá nak chá'a vino, keñe han apmopmenyého nak chá'a sokmátsa, metnehek sa' ekxákma aqsok apagkok.

¹⁸Kaphewakxak sa' apkellegeykegkoho m'a apkelmopwancha'a nak chá'a amya'a, tén han ma'a ekmaso nak chá'a apkeltémakxa', megkatnehek sa' ma'a énxet appéwomo nak tén han ma'a énxet ektaqmalma nak aptémakxa'.

¹⁹Tásek aghamok ma'a yókxexma meykexa nak énxet, kaxnók anxek xamo' ma'a kelán'a sentaqnaweykha nak chá'a, ekyenneykha nak chá'a ekpeywa henlána'.

²⁰Yetneyk aqsok éltaqmalma tén han sokmátsa apxagkok ma'a énxet apya'áseykegkoho nak aqsok, esáwak eyke chá'a aqsok apagkok ma'a énxet ekyeyháxma nak.

²¹Étak chá'a ekwenaqte apha tén han kéláyo m'a énxet aptegyeykha nak chá'a yaqwayam etnehek ekpéwomo aptémakxa, tén han meyenyaweykha apnámakkok.

²²Emok chá'a énxet apya'áseykegkoho aqsok ma'a tegma apyawe apmasma nak chá'a m'a énxet'ák apkelyennaqte, elyaqnegkessesek chá'a m'a kélhaxtegkesso apkelásenneykekxo nak chá'a m'a.

²³Megkasagkehek chá'a apha m'a énxet apkeláneykegkoho nak chá'a aptáhakxa appeywa.

²⁴Énxet apkeltémo nak chá'a kóllanha tén han eyeymáxkoho apwáxok, ekyenneykha appeywa chá'a eltamhakpok ma'a énxet apkeltémo nak chá'a kóllanha aptáhakxa.

²⁵Aqsok apmopmenyého chá'a kaqhek ma'a énxet apháxamákpoho nak chá'a etneykha, eñama megkamopmenyého aptamheykha;

²⁶yókxoho ekhem chá'a kaxénmakha apwáxok étak aqsok. Keñe m'a énxet appéwomo nak, egkések chá'a aqsok pók yetlo meyke apmeyágweykekxa'.

²⁷Eltaqnawásseshok Wesse' egegkok aqsok apkelmésso naqsa m'a énxet'ák élmasagcha'a nak apkeltémakxa', hakte yetlo ekmaso élchetámeykha apkelwáxok chá'a elmések.

²⁸Yetsapok sa' ma'a énxet apxeyenma nak chá'a apweteykegkoho megkamámnaqsoho; apwanchek eyke yátegmowagkokxak chá'a m'a apmopwána nak chá'a yeyxho'.

²⁹Yának chá'a keynnák aptáhakxa m'a énxet ekmaso nak aptémakxa'; ey'asagkohok eyke chá'a aptémakxa m'a énxet meyke nak aptémakxa'.

³⁰Mékoho katnekxak nápaqto' Wesse' egegkok ma'a negya'áseykegkoho, tén han negmowána aqsok, keñe han ektaqmalma nak élchetámeykha egwáxok.

³¹Eltahanchesek chá'a apchánte énxet yaqwayam emhagkok kempakhakma, Wesse' egegkok akke apmallahanchesso chá'a.