Read Lengua Sur Proverbios 25 Bible Online

Proverbios 25 - Lengua Sur bible

Proverbios 25

¹Keso Salomón axta han appeywa s'e, apnaqtáxeseykegkokxa axta m'a énxet'ák Ezequías axta apkeláneykha, wesse' apwányam axta Judá:

²Nélteméssesso apcheymákpoho Dios eñama appóssamo chá'a xama aqsok, keñe nenteme negáyo apkelwesse'e apkelwányam eñama segya'assásegwayam chá'a m'a aqsok élpowásamáxkoho nak.

³Mogwanchek agya'asagkohok ektémakxa m'a néten, tén han ekwánxa ekmattawóneg ma'a xapop nak, keñe han ma'a ektémakxa nak élchetámeykha apkelwáxok ma'a apkelwesse'e apkelwányam.

⁴Negyenyókassek agkok chá'a sekxók ekmanyása m'a sawo ekmope ekmomnáwa nak, keñe sa' natámen elának chá'a egheykok ma'a énxet apkeláneyo nak chá'a sawo ekmope;

⁵nentekkessek agkok xama énxet ekmaso aptémakxa aptamheykha nak ma'a aphakxa nak wesse' apwányam, keñe keytek chá'a apkelánekxésso ektaqmalma apheykha énxet'ák ma'a aptémakxa nak wesse' apwányam.

⁶Nágyeykpoho chá'a nápaqtók wesse' apwányam, ná exnem nahan chá'a m'a apheykegkaxa nak énxet'ák ekyawe kéláyo.

⁷Eyke tásek emhagkok apcháneyákpo enxoho emhagkok ma'a néten apheykegkaxa nak énxet'ák ekyawe kéláyo, kaxnók emegqeyk nápaqta'awók ma'a apkelwesse'e nak. Apwet'ak agkok chá'a ektemegweykmoho exma',

⁸ná epekhaksoho chá'a emyekxak ma'a sẽlyekpelchémókxa nak, hakte emegqeyk katnehek xép apxéna enxoho apteme apmopwána amya'a m'a pók apweteykegkoho, keñe sa' xép mey'asagkehek aptáhakxa natámen.

⁹Elpaqhetchesakpekxoho chá'a m'a ektáha nak chá'a yaqwayam esexnena', ná etekkesha chá'a amya'a ektáha nak chá'a aplege apagko' xép;

¹⁰hakte eñak katnehek xama énxet keñe sa' xép emegqe', megkamassegwomek sa' han apxénamap ekmaso exchep.

¹¹Hawók nennatanma sawo ekyátekto élyenma kélpáxaqteyáseyak la'a sawo ekmope élyenma m'a nempeywa negaqhémo nak chá'a nentáhakxa nempeywa.

¹²Megkaxnawok ektaqmalma ektémakxa nak chá'a kélnókáseykha énxet apmomo nak chá'a takha' kélnókáseykha m'a kélatchesso kélaphék sawo ekyátekto, tén han ma'a kélnatanma.

¹³Máxa yegmen ekmáxaqxól'a neyseksa ekmexanma exma etnehek ma'a énxet apseykha amya'a metne nak chá'a apmopwána amya'a, epeykessásekxak chá'a apwáxok wesse' apagkok.

¹⁴Énxet apxeyenma nak chá'a egkések aqsok ma'a pók, keñe megkése', máxa m'a yaphope yetlo éxchahayam la'a, keñe megkammakye'.

¹⁵Kamasseksohok aplo wesse' m'a mampekhésamaxche nak chá'a ampaqhetchesek; kalekwomhok apwáxok ma'a ektaqmeleykha nak nempeywa anlána'.

¹⁶Ná eyeykhasakpoho aqsa etwok apwet'a enxoho yányawhéna' apyegmenek, eyekxagkok katnehek ma'a apxáma enxoho apto.

¹⁷Aptemék sa' agkok chá'a meyk'a apxagkok ma'a pók, etne sa' chá'a xama apweykekxa, kaleklágwók katnehek keñe etaqnawágwók xép.

¹⁸Sawo ekyentaxno, sókwenaqte, tén han yágke aktek ekmahamta agko', ¡cháxa apyetchásamákpoho m'a énxet apxeyenma nak aqsa apmopwána amya'a apxegexma meykexho aptáhakxa!

¹⁹Negásenneykxeyk agkok énxet ekpelakkasso nak hensexnenak ma'a ekwa'a enxoho ekmaso negha, máxa antéhek ma'a ektémól'a éntél'a xama ẽxchapok agweynchamha, essenhan ma'a ektémól'a antók nento neyseksa ekmáske egma'ák.

²⁰Negmeneykmássessek agkok xama negmeneykmasso énxet ekyentaxno nak apwáxok, máxa katnehek néxpaqhássesa enxoho apyense m'a yámnátekhet égmenek la'a, essenhan ma'a ektémól'a anlók nentaxno m'a neyseksa apmopsamáge.

²¹Meyk agkok chaqhak énxet apkenmexeykha nak xép, egkés apto, hem agkok nahan chaqhak, egkés yegmen;

²²sa' kañék apmegqágweykekxa pók eñama apteméssesso exchep xa ektáha nak, Wesse' egegkok sa' eyke eyaqmagkásekxak ma'a ektémakxa nak xép aqsok apkelane.

²³Kasógmohok chá'a ekmámeye m'a excheyha, keñe negya'ásseyam ekmaso m'a eklo nak négát.

²⁴Tásek anxek ma'a teyp enxagkok, kaxnók anxek xamo' kañe' tegma m'a kelán'a ekyenneykha nak chá'a ekpeywa henlána'.

²⁵Máxa yegmen ekmáxaqxol'a agyenek hem segaqhe m'a amya'a ektaqmalma eñama nak makhawo' agko'.

²⁶Máxa ekyetnamakxa yegmen ekmaso tén han yámelchet ekyápaqmatél'a yegmen etnehek ma'a énxet meyke aptémakxa apchahamakpoho nak aqsa chá'a nápaqtók ma'a énxet ekmaso nak aptémakxa'.

²⁷Asagkek antawhok agko' ma'a yányawhéna' apyegmenek, asagkek han antegyagkohok chá'a ektaqmalma nenxénamaxche'.

²⁸Énxet megkamopwána nak elanagkohok aptémakxa', máxa m'a aptémól'a tegma apyawe meykel'a kélhaxtegkesso nepyáwa', ekmanyehél'a chá'a elántexek ma'a apmáheyo nak emok.