Read Lengua Sur Proverbios 26 Bible Online

Proverbios 26 - Lengua Sur bible

Proverbios 26

¹Megkapayhawok etyamok yeyam ma'a ekmexanmakxal'a exma, asagkek han kammék ma'a eknakxamáxchexal'a aqsok ekyexna kélcheneykekxa, megkapayhawok han kólxénmakha ektaqmela m'a énxet ekyeyháxma nak.

²Sẽlyemneykha ekmaso meykexho aqsok sensexnenagko, megkáhapwék ma'a ektáha nak chá'a kélyemneykha, máxa m'a kesña'ay apxegányam la'a, tén han ma'a ektémól'a yeptameygmen meyke nak axagkok.

³Kóltamaksohok chá'a m'a yátnáxeg, kólmágwók han chá'a ekxega m'a yámelyeheykok, kólyekpexchetmakha eyke chá'a m'a énxet ekyeyháxma.

⁴Nágyátegmowák chá'a m'a énxet ekyeyháxma nak, yánékpok xépxa ekyeyháxma.

⁵Yepwagkoho chá'a apchátegmowéyak ma'a énxet ekyeyháxma nak, mopwanchek agkok chá'a apchátegmowéyak, yának kaxnak apya'áseyak ma'a ekyeyháxma nak.

⁶Negméssek agkok amya'a yaqwayam eswok ma'a énxet ekyeyháxma nak, máxa katnehek nélyaqtennákxoho egagko' enxoho m'a egmagkok nak, nensexnánémaxchekxoho egagko' han antéhek.

⁷Memhagkek makhawók ma'a énxet élyelqamáxche nak apyay'ák, cháxa ektémakxa han nak han amya'a ektaqmela apmáheyo nak chá'a elxénagkok ma'a énxet ekyeyháxma nak, megkalwegkeypek chá'a.

⁸Kaqhok antéhek negáyo m'a énxet'ák élyeyháxma nak, máxa m'a mélwakto nentetél'a xóp aktek ma'a eknextegkessamakxa nak, keñe megkanextegkese'.

⁹Meñegkehek kaqhek apmek am'ák ma'a anmen áto nak, mey'asagkehek han ektémakxa amya'a ektaqmela m'a énxet ekyeyháxma nak.

¹⁰Énxet apmésso nak chá'a aptamheykha apxagkok ma'a ekyeyháxma nak, máxa etnehek ma'a apkelyátél'a aqsa chá'a yágke m'a apyókxoho ektáha nak chá'a apyeykhágwayam ma'a.

¹¹Katwekxak chá'a ekyekxo m'a semheg, keñe énxet ekyeyháxma etnekxak aqsa chá'a m'a aptémakxa ekyeyháxma.

¹²Egwanchek makham ampasmok ma'a énxet ekyeyháxma nak, kaxnók ma'a énxet apxeyenma nak apya'áseykegkoho ekyókxoho aqsok.

¹³Etnehek chá'a epaqmétek énxet apháxamákpoho nak chá'a etneykha s'e: ‘Yámakméwa yagqak ámay, ko'o peyk hethánek.

¹⁴Kalyeyhek chá'a m'a ekmayheykekxexa nak chá'a átog, keñe m'a énxet apháxamákpoho nak chá'a etneykha, elpeynchekpok aqsa apyetno m'a néten apyetnamakxa.

¹⁵Epogwátek chá'a sokpayhe emok apto m'a énxet apháxamákpoho nak chá'a etneykha, mopwanchek eyke ey'ásekxak apátog.

¹⁶Yának chá'a etnahak apya'áseykegkoho aqsok ma'a énxet apháxamákpoho nak chá'a etneykha, yának chá'a eyeykhássekmohok ma'a siete énxet apchaqhémo nak chá'a yátegmowagkok amya'a.

¹⁷Nempáxaqwayam nak éllámaxche', megkatnaha nak sempayhémo, máxa katnehek ma'a ektémól'a ólmések aheyk'ák semheg agya'aksek néten.

¹⁸Énxet apkelyexancháseykha nak chá'a pók, máxa m'a énxet ekyeyháxma apkelyáteykha aqsal'a yágke aktek táxa naw'ék segaqhamól'a, keñe etnehek yának se'e: “sektáhakxa ahagko', ekneykesse'”.

²⁰Kaspónak chá'a táxa méko enxoho yántapák, kamaskok chá'a apkelátegmomap énxet ma'a méko enxoho apkeltennágwayam aqsa chá'a nátegma.

²¹Kélmenyeyk chá'a átex yaqwayam kólwatnekxak táxa, kélmenyeyk chá'a yántapák yaqwayam kóláléwaksek táxa, keñe m'a yaqwayam nak chá'a etekkesek éllámaxche', kélmenyeyk ma'a apmopmenyého nak chá'a elnapakpok.

²²Máxa nento ekmátsal'a m'a néltennágwayam nak aqsa chá'a nátegma, keytnók chá'a m'a kañók agko' nak egwáxok.

²³Weygke apkelánamap nak yelpa', kéltexneykegkokxa nak apyempehek ma'a sawo ekmope égmenek élyenma nak, máxa m'a énxet ektaqmeleykha nak chá'a appeywa henlána', asagkók eyke m'a élchetamso apwáxok.

²⁴Aplókek agkok énxet, máxa eyke katnehek melawa enxoho epaqmétek, apwáxok akke aqsa keytek yaqwayam elának ma'a aqsok ekmaso nak.

²⁵Ná etnésses aqsa naqso' ektaqmeleyncha'a enxoho chá'a appeywa elána', hakte láneyók apwáxok ekmaso nentémakxa m'a;

²⁶emáwhok sa' eykhe ekpósek ma'a aplo, aptémakxa ekmaso sa' eyke kataxchek nápaqta'awók ma'a apyókxoho énxet'ák nak.

²⁷Énxet apmeta nak chá'a máxek, etyemekxohok apagko' chá'a kañe'; énxet apyeygéyak nak chá'a xama meteymog ekyaqye, kápekxohok agko' chá'a.

²⁸Etaqnawhok amya'a ekmámnaqsoho m'a énxet apmopwána amya'a nak, énxet ektaqmeleykha nak appeywa henlána', etekkesek chá'a ekmaso apheykha énxet'ák.