Read Lengua Sur Proverbios 28 Bible Online

Proverbios 28 - Lengua Sur bible

Proverbios 28

¹Méko eykhe chá'a kayaqmaksek ma'a ekyeyháxma nak, exyenmok aqsa chá'a, méko eyke katnehek chá'a apkelakakxa m'a apkelpéwomo nak, máxa etnahagkok ma'a ektémól'a yámakméwa.

²Apkelánegkek agkok chá'a melya'assáxma xama apchókxa, eyaqmagkasagkok chá'a pók ma'a apkelwesse'e apkeláneykha nak apchókxa, keñe aptáha enxoho apkemha apmonye' m'a énxet apya'áseykegkoho nak chá'a apkeláneykekxa aqsok, kataqmelek chá'a ekxega m'a apchókxa.

³Apkemha apmonye' ekmaso nak aptémakxa, apnaqtawáseykegkoho nak ma'a énxet meyke nak aqsok apagkok, máxa etnehek ma'a ektémól'a ekmámeye ekyennaqte ektawáseykhal'a aqsok ekyexna kélcheneykekxa.

⁴Kaltaqmalmakha chá'a apkelpeywa elxének énxet'ák élmasagcha'a nak apkeltémakxa m'a apkelyetnakhasso nak chá'a segánamakxa; keñe m'a ektáha nak chá'a apkelyeheykekxoho m'a segánamakxa, eltaqnaweyha chá'a.

⁵Melya'ásegkok aqsok ekpéwomo m'a élyeyháxma nak, apkelya'ásegkók eyke ekyókxoho m'a apkelye'eykekxa nak chá'a Wesse' egegkok.

⁶Tásek antéhek meyke aqsok egagkok tén han meyke nentémakxa, kaxnók antéhek ekxámokma nak aqsok egagkok, tén han megkapéwomo nak nentémakxa'.

⁷Kélketche apya'áseykegkoho aqsok ma'a apkelyeheykekxoho nak chá'a Dios segánamakxa apagkok. Emegqaksek eyke chá'a apyáp ma'a kélketche appaxqeykha nak chá'a élyeykhágweykmoho nak élmasagcha'a apkeltémakxa'.

⁸Énxet apxámáseyak nak aqsok apagkok apmeykekxoho nak chá'a néten ekyánmaga, háwe yaqwayam etnehek apagkok, sa' elmekxak ma'a énxet'ák apkelmopyósa nak chá'a elanok ma'a meyke nak aqsok apagkok.

⁹Agkok emakók kélxama elyahakxohok ma'a Dios segánamakxa apagkok, memek sa' nahan takha' nempeywa nélmaxnagko apagkok ma'a Dios.

¹⁰Énxet apnaqleykekxa nak ámay ekmaso m'a énxet'ák éltaqmalma nak apkeltémakxa', kamekxohok sa' agkok ma'a kelhanma apagkok nak; keñe sa' elxawagkok aqsok éltaqmalma m'a énxet'ák meyke nak aqsok ekmaso apkeláneyak.

¹¹Yának chá'a etnahak apya'áseykegkoho aqsok ma'a énxet ekxámokma nak aqsok apagkok, keñe m'a énxet meyke nak aqsok apagkok, tén han apya'áseykegkoho nak aqsok, ékpelkohok chá'a aptémakxa'.

¹²Apkelmeyk agkok apkeltamheykha apteme ekha kéláyo m'a énxet'ák apkelpéwomo nak, kalanaxchek ekyawe agko' kélessawássessamo; apkelmeyk agkok apkeltamheykha m'a élmasagcha'a nak apkeltémakxa', elyexanmok chá'a m'a énxet'ák nak.

¹³Asagkek katnehek apha m'a énxet appósso nak chá'a mey'assáxma; yásekhekxohok eyke chá'a Dios ma'a énxet apkeltennasso nak chá'a aptémakxa, tén han apyenyeykekxa nak chá'a.

¹⁴Apkeleñémo énxet melwátésseyam nak apteme apcháyo Wesse' egegkok; aqsok ekmaso sa' eyke káhapwak ma'a énxet ekyennaqte nak apwáxok.

¹⁵Énxet ekmaso aptémakxa apteme nak apkemha apmonye' nepyeseksa énxet'ák meyke aqsok apagkok, aphawók ma'a yámakméwa ekyexwéweykhal'a essenhan ma'a aqsok nawhak eklo nak.

¹⁶Éntaxnéssesagkok chá'a ektémakxa ekmaso apheykha énxet'ák ma'a apkemha apmonye' mey'áseyak nak aqsok; ahóxek eyke katnehek apweynchámeykha m'a énxet megkaleklo nak apwáxok eyeykhasakpohok apwete aqsok apagkok.

¹⁷Énxet apchaqhe nak chá'a pók, esexnánekpok sa' ekwokmoho apketsapa: ¡nágkólmeyaw chá'a!

¹⁸Ewagkasakpok sa' teyp ma'a énxet meyke aptémakxa', aqsok ekmaso sa' eyke káhapwak ma'a énxet ekmaso nak aptémakxa'.

¹⁹Xámok katnehek apto m'a énxet ekha nak apkeneykekxa aqsok namyep apagkok; keñe m'a énxet apkelane nak chá'a aqsok megkamowána nak hempasmok, meyke aqsok apagkok katnehek.

²⁰Énxet ekpayhémo nak chá'a kóltéhek kéláyo, tásek sa' chá'a katnehek apha; kóllegássesagkohok sa' eyke m'a énxet ekpekhésso nak chá'a etnehek ekxákma aqsok apagkok.

²¹Megkapayhawok antéhek apyeykhamap pók anlanok egnámakkok; megkeyxek henlanaksek magya'assáxma m'a selyaqye étchetse nak.

²²Kapekhaksek chá'a etnehek ekxákma aqsok apagkok ma'a énxet étsapeykha nak chá'a apnények elanok aqsok, mey'asagkehek peya káhapwak ma'a senteme nak meyke aqsok egagkok.

²³Énxet apnókáseykha nak chá'a pók, kalkohok sa' chá'a apwáxok natámen, megkatnehek sa' ma'a ektaqmeleykha nak chá'a appeywa elának pók.

²⁴Énxet apmenyexma m'a apkelmenyexchesso nak chá'a aqsok ma'a apyáp tén han ma'a egken, keñe exénmakha chá'a melane mey'assáxma.

²⁵Etekkesek chá'a apkelenmexamap ma'a énxet apmopmenyého nak chá'a étak aqsok apagkok; kaxámagkok eyke aqsok apagkok ma'a énxet apteme nak chá'a apcháyo Wesse' egegkok.

²⁶Énxet ekyeyháxma m'a apchásennamakpoho apagko' nak chá'a; kólmallahanchesek sa' eyke chá'a ekmaso apha m'a énxet apkelane nak chá'a nélxekmowasamáxche ektaqmela nak.

²⁷Méko katnehek eyeyméxchexa aqsok apagkok ma'a énxet appasmo nak chá'a m'a meyke nak aqsok apagkok; keñe sa' ma'a memáheyo nak chá'a epasmok, etaqnaweykpohok apagko' sa' chá'a.

²⁸Apkelmeyk agkok apkeltamheykha m'a élmasagcha'a nak apkeltémakxa', elyexanmok chá'a m'a énxet'ák nak; temégwokmek agkok néxa apkeltamheykha, exámekxak chá'a m'a énxet'ák apkelpéwomo.