Read Lengua Sur Proverbios 29 Bible Online

Proverbios 29 - Lengua Sur bible

Proverbios 29

¹Énxet apyennaqtésso nak apwáxok kólnókasha, kaxwo' agko' sa' kólmasséssók meyke apwayam teyp.

²Apxámákxeyk agkok ma'a énxet'ák élpéwomo nak apkeltémakxa, kalpayhekxak apkelwáxok ma'a énxet'ák nak; aptamhágkek agkok apkelámha apmonye'e m'a élmasagcha'a nak apkeltémakxa, ellegagkohok chá'a énxet'ák.

³Epeykessásekxak chá'a apwáxok apyáp ma'a kélketche apya'áseykegkoho nak chá'a aqsok; keñe m'a apkelane nak chá'a kelán'ák ekyaqmagkáseyak pók énxet ektegye selyaqye, esawhohok chá'a etwasha m'a selyaqye apagkok.

⁴Wesse' apwányam apkelánekxésso nak chá'a ektaqmalma apheykha apnámakkok, exátekhaksek chá'a apchókxa'; yetsagkasek eyke chá'a m'a apkelmomo nak chá'a selyaqye apnegkenéyak ma'a énxet'ák nak.

⁵Énxet ektaqmalma nak chá'a appeywa elának pók, cháxa appekkenchesa xama kelhanma xa.

⁶Neykhe kelhanma apagkok énxet ekmaso nak aptémakxa m'a mey'assáxma nak; kapayhekxak eyke chá'a apwáxok neyseksa apha m'a énxet meyke nak aptémakxa, yátsaha chá'a.

⁷Keytnakhaksohok chá'a apwáxok énxet appéwomo m'a ekpayhawo nak chá'a kólteméssesek ma'a meyke nak aqsok apagkok, megkeytnakhaksók eyke apwáxok ma'a énxet ekmaso nak aptémakxa.

⁸Etekkesek chá'a ekyennama exma nepyeseksa tegma apwányam ma'a énxet'ák élyeyháxma nak; apwanchek eyke emasseksek chá'a éltamheykha apkelwáxok énxet'ák ma'a apkelya'áseykegkoho nak chá'a aqsok.

⁹Apkelátegmoweykpek agkok énxet apya'áseykegkoho aqsok ma'a énxet ekyeyháxma nak, elwok aqsa m'a, yesmaksek han chá'a, mey'asagkehek chá'a yaqwánxa etnéssesek.

¹⁰Énxet apchaqhe nak chá'a pók, tén han élmasagcha'a nak apkeltémakxa', etaqnawhok apagko' ma'a énxet meyke nak aptémakxa'.

¹¹Méxnéssekxeyk chá'a aplawa enxoho m'a énxet ekyeyháxma, emágwakxak eyke chá'a yaqwánxa etnehek ma'a énxet apya'áseykegkoho nak aqsok.

¹²Apkemha apmonye' apháxenmo nak chá'a ekmowána amya'a, kawakxohok apteméssesso élmasagcha'a apkeltémakxa m'a apyókxoho apkeláneykha.

¹³Aphawók pók ma'a aptawáseykegkoho nak chá'a pók, tén han ma'a kéltawáseykegkoho nak chá'a: hakte Wesse' egegkok axta apkeláneséyak apaqta'ák yaqwayam elwetak exma'.

¹⁴Kawegqohok sa' chá'a apteme wesse' apwányam ma'a apkeláneykha nak chá'a énxet'ák meyke nak aqsok apagkok, yetlo mekxeykha.

¹⁵Hegya'assásegwók chá'a exma m'a sẽlyekpexcheteykha nak, tén han sẽlnókáseykha nak, emegqaksek eyke chá'a egken ma'a kélketche kélhayo nak aqsa chá'a aptáhakxa.

¹⁶Apxámágkek agkok ma'a élmasagcha'a nak apkeltémakxa' kayágkok han ma'a magya'assáxma; keñe m'a énxet'ák meyke nak apkeltémakxa, elwetagkohok sa' elmassegwók ma'a.

¹⁷Elxekmósak chá'a apketche, tén sa' tásek chá'a katnehek apha, epeykessásekxak sa' chá'a apwáxok.

¹⁸Kayeykhágwomhok agko' chá'a apkeltémakxa élyeyháxma énxet'ák meykexa enxoho chá'a appékessáseyak ma'a Dios; ¡apkeleñémo énxet'ák apkelyeheykekxoho nak chá'a Dios segánamakxa apagkok!

¹⁹Askehek kólxekmósagkok kélpaqhetchesso naqsa chá'a m'a énxet kélásenneykha naqsa nak, hakte ey'asagkohok eykhe, melyahakxeyk eyke.

²⁰Egwanchek makham ampasmok ma'a énxet ekyeyháxma nak, kaxnók ma'a énxet appaqmeyesma nak aqsa chá'a meyke sekxók élchetamso apwáxok.

²¹Énxet apchahayo nak aqsa chá'a aptáhakxa m'a apchásenneykha naqsa aptémakxa axta apketchetse', kaqhek sa' apwáxok natámen.

²²Etekkesek chá'a apkelenmexamap ma'a énxet apyennaqteyáseykha nak chá'a apyempehek, xámok han chá'a katnehek megyaqhémo aptáhakxa m'a ekmanyehe nak elwok.

²³Kamegqásekxohok chá'a aptémakxa apcheymákpoho m'a énxet eyeymáxkoho nak apwáxok, keñe m'a megkeymáxkoho nak chá'a apwáxok, kéláyo sa' kóltéhek.

²⁴Énxet apxegexma nak chá'a m'a apmenyexmo nak, apkenmexamakpekxoho apagko' chá'a etnehek, eñak eykhe aptaqnómap, mexének eyke aqsok apkelane.

²⁵Asagkek ageyk ma'a énxet'ák, yetneyk eyke katnehek apmeyámap ma'a énxet apteme nak apcháyo Wesse' egegkok.

²⁶Apxámok énxet apkeltémo nak kataqmalmakha apwáxok elanok ma'a apkemha apmonye', Wesse' egegkok akke apteme aqsa wánxa aptaqmelchessáseykekxa apheykha énxet'ák.

²⁷Eltaqnaweygkohok meyke nak apkeltémakxa m'a élmasagcha'a nak apkeltémakxa', keñe élmasagcha'a nak apkeltémakxa eltaqnaweygkohok ma'a meyke nak apkeltémakxa'.