Read Lengua Sur Proverbios 31 Bible Online

Proverbios 31 - Lengua Sur bible

Proverbios 31

¹Lemuel appeywa wesse' apwányam axta m'a Masá, ektémakxa axta élxekmósso egken:

²Hatte, seyásekhayo ahagko' nak, segkésso axta Dios eñama sélmaxnagko, ¿yaqsa eyeyméxko kaxwók atnehek wának xép?

³Nágyoho kasawhaksek ektémakxa apyennaqte m'a kelán'ák nak, hakte cháxa eknaqtawáseykencha'a nak chá'a m'a apkelwesse'e apkelwányam.

⁴Lemuel, asagkek énagkok apkelwesse'e apkelwányam tén han apkeltaqmelchesso nak apkelókxa m'a vino keñe han ma'a anmen ekyennaqte nak,

⁵hakte kalwánaqtésegmak ma'a ektémakxa nak segánamakxa' melanagkehek ma'a ekpayhawo nak kólteméssesek ma'a énxet'ák apkelmopyóseka nak.

⁶Yoho aqsa énagkok vino tén han anmen ekyennaqte m'a énxet'ák peya nak eletsapok, tén han ma'a élyentaxnamo nak chá'a apkelwáxok;

⁷¡énagkok sa' apagkok ma'a, kamaskok sa' kalxének apkelwáxok meyke aqsok apagkok, tén han ektémakxa apkellegeykegkoho!

⁸Yátegmakkasák amya'a m'a megkalmopwána nak elxének ektémakxa apheykha; ¡elmeyow ma'a énxet'ák meyke nak élmasma!

⁹Énnaqtés chá'a appeywa, elánekxés chá'a ektémakxa apheykha; ¡epásem chá'a m'a meyke nak aqsok apagkok, tén han ma'a apkelmopyóseka nak!

¹⁰Askehek agwetak entáwa' ektaqmalma nak ektémakxa'; ¡yeykhásseykmók ektémakxa ekmomnáwa m'a meteymog éltaqmalma nak!

¹¹Awanhek chá'a katnehek apcháyo atáwa' m'a kelán'a nak, megkeymaxcheyk ma'a xama aqsok enxoho.

¹²Tásek chá'a katnehek ekteméssesakxa atáwa' yókxoho ekhem, neyseksa ekha, megkasagkehek chá'a.

¹³Kaxog chá'a kategyek nepkések apwa' tén han yátépépe', atsók agko' han chá'a kótek kalának apáwa.

¹⁴Makhawók chá'a kaleñék kalsanták ma'a nento, ektémól'a yántakpayhe élseykhal'a chá'a aqsok.

¹⁵Amonye' élseye chá'a kaxatakha', keñe kalagkok ektéyak ma'a étchek, tén han kalxekmósek chá'a yaqwánxa kalanagkok ma'a élásenneykha nak.

¹⁶Kalanok chá'a ektémakxa xapop keñe kamok chá'a, kaknekxak chá'a anmen yámet ekyánmaga m'a ektamheykha nak.

¹⁷Kayhek han émpehek, yetlo ekwasqápeykekxoho chá'a kalának ektamheykha.

¹⁸Kalanagkohok chá'a élyánmagkásamáxche yaqwayam kataqmelek ekxega, kammohok chá'a axta'a eyseksók ektamheykha.

¹⁹Eknexpagá agko' chá'a katnehek, eyótma agko' han chá'a katnehek.

²⁰Kalmésagkok chá'a aqsok ma'a meyke nak aqsok apagkok, kapasmok han chá'a m'a ekha nak chá'a eyeyméxchexa aqsok.

²¹Megkatnéssesha awáxok ekheykha nak axagkok apteyekmo enxoho yeyam, hakte yetneyk katnehek apyókxoho apkelnaqta apkelyentaxno.

²²Élane agko' han katnehek ma'a yát'apáwa, kalántaxnekxak han chá'a m'a élántaxno apkeltaqmalma nak.

²³Kólya'asagkohok han chá'a atáwa' m'a apyawakxa nak tegma, exek chá'a nepyeseksa énxet'ák ekyawe agko' nak chá'a kéláyo.

²⁴Kalának chá'a apáwa tén han nentete nenxet, keñe kakxák chá'a ekha ekyánmaga kalmések ma'a apkexeykekxa nak chá'a aqsok.

²⁵Kayhek nahan émpehek ma'a, kéláyo han, megkeytnakhaksók han awáxok ma'a yaqwánxa enxoho katnehek amonye'.

²⁶Tásek chá'a katnehek ekpeywa ekxeyenma aqsok, yetlo ektaqmeleykha awáxok nahan chá'a kalxekmósek námakkok.

²⁷Kataqmelchesek chá'a axagkok, megkaxek aqsa chá'a m'a axagkok katwok ekto, katneykha chá'a.

²⁸Kaltaqmalmakha chá'a apkelpeywa exének étchek tén han ma'a atáwa', etnehek chá'a s'e:

²⁹“Xámok eykhe kelán'a élmowancha'a nak éltamheykha, yeykhásseykmók eyke exche' ekmowána ektamheykha m'a ekyókxoho kelán'ák nak.”

³⁰Awanchek hẽlyexanchesha m'a ektémakxa nak ekma egwáxok anlanok kelán'a, megkawegqók eyke m'a ektémakxa nak ektaqmalma; eyke payhawók kataqmalmakha nempeywa anxénmakha m'a kelán'a eyáyo nak Wesse' egegkok.

³¹¡Kataqmalmakha kélpeywa kólxénmakha nápaqta'awók ma'a apyókxoho énxet'ák nak! ¡Kólxén ektáha naqsók ma'a ekyókxoho aqsok élane nak!