Read Lengua Sur Proverbios 6 Bible Online

Proverbios 6 - Lengua Sur bible

Proverbios 6

¹Hatte, apxénchek agkok xép peya eyánmagkassesek aqsok apméyak pók, essenhan megkatnaha nak apyekpelchémókxa',

²xeyep apagko' sa' esexnánékpok: kasexnenak sa' ma'a appeywa nak.

³Hatte, apkeltamhók sa' agkok xép elwátessók yaqwayam eyánmagkassesek aqsok apméyak pók, hakte apkelhaxanmeyk chá'a exchep eyánmagkassesek apméyak aqsok ma'a pók, sa' etnehek se'e: eltekxek aptapnák ma'a apmonye' nak, eltennés apkelwátesa yaqwayam eyánmagkassesek apméyak aqsok.

⁴Nágyoho kawegqoho', ná ellókas apyampe yaqwatakxoho enxoho;

⁵yenye chá'a heykxa' aptémól'a popyet yenyehek apmonye' m'a apnempaqwayam nak; yenye chá'a ektémól'a náta keyk kelhanma.

⁶Énxet, apháxamákpoho nak etneykha; exeg, elanha aptémakxa m'a pexyegke, etne m'a aptamheykegkaxa nak:

⁷méko eykhe apkemha apmonye' apagkok ma'a, méko eykhe han kaltennasagkok yaqwánxa chá'a etnahagkok,

⁸yánchásekxak chá'a aptéyak ma'a ekmexanmakxal'a exma, exatmok chá'a kañe' neyseksa eknakxamáxche' m'a aqsok kélcheneykekxa'.

⁹¡Wánxa etne apteyenma! ¡Wánxa etne apyetno! énxet apháxamákpoho nak etneykha.

¹⁰Neyseksa apyenmeykha tén han ekyawheykha apqátek, neyseksa apteyammeykegkokxa apaktog yaqwayam kataqmelhok apteyenma,

¹¹sa' káhapwak ma'a senteme nak meyke aqsok, kaktámegmak sa', aptémól'a énxet apmáheyo nak hegyementók aqsok egagkok.

¹²Etekkesha chá'a apmopwána amya'a m'a énxet ekmaso nak aptémakxa', tén han ma'a énxet ekyeyháxma nak;

¹³etenchesha chá'a apaqtek, exekmósagkok han chá'a apmenek, tén han apophék;

¹⁴asagkek ma'a ektémakxa apwáxok, wánxa aqsa kaxének apwáxok elának ma'a aqsok ekmaso nak, etekkessók chá'a éllámáxche m'a apmahágkaxa enxoho.

¹⁵Cháxa keñamak peya sa' katlakkasek aqsa káhapwak aqsok ekmaso; ekmanyehe agko' sa' enaqtawasakpok, mopwanchek sa' elwagkasakpok teyp.

¹⁶Yetneyk siete aqsok aptaqnagkamakxa apagko' nak ma'a Wesse' egegkok:

¹⁷énxet apkeleymákpoho, énxet apkelmopwancha'a amya'a, énxet apkelnapma nak chá'a m'a énxet'ák meyke nak apkeltémakxa',

¹⁸énxet élchetámeykha nak chá'a apkelwáxok elanagkok aqsok ekmaso, énxet ekmanyehe nak chá'a elanagkok aqsok ekmaso,

¹⁹énxet apteme nak apmopwána amya'a exének pók, appehésseyam nak aqsa chá'a pók, énxet aptekkessesso nak chá'a apkelenmexamap nepyeseksa apnámakkok.

²⁰Hatte, etaqmelches ma'a apkeltémókxa nak etnehek apyáp, nágkalwánaqmágwom ektémakxa nak élxekmósso m'a egken.

²¹Epekken chá'a apwáxok, emakhésha m'a apyespok;

²²kapékessesagkok sa' chá'a apxega enxoho, kataqmelchesek sa' nahan chá'a aptena enxoho, kapaqhetchesha sa' han chá'a m'a apxatakha'a enxoho.

²³Máxa cháléwasso eyápogwate m'a nélánemáxchexa nak antéhek tén han ma'a sẽlxekmowáseyak nak; ámay ekyennaqte egnények ma'a sẽlpeykessáseyak nak, tén han ma'a sẽlpaqhetcháseykha nak chá'a.

²⁴Kamyók sa' kamáwhok kalának ma'a kelán'a kay'assáxma, cham'a kelán'a ekmátsa nak ekpeywa megkatnaha nak aptáwa'.

²⁵Nágkatsep apnények ma'a ektémakxa nak ektaqmalma; ¡nágyoho kamok apwáxok ma'a ektémakxa nak élátseykha aqta'ák!

²⁶Ekyánmaga eyke aqsa chá'a amenyeyk ma'a kelán'a ekyaqmagkáseyak nak pók énxet ektegye selyaqye, keñe m'a kelán'a apha nak atáwa', wánxa aqsa kaltamhok kategkesek ma'a énxet ektaqmalma nak aptémakxa'.

²⁷Appekkenchek agkok táxa apnények énxet, emyetek nahan ma'a aptaxno nak.

²⁸Apxegkek agkok énxet néten átex, kalmétek ma'a apmagkok nak.

²⁹Énxet ektáha enxoho appathetéyak ma'a megkatnaha nak aptáwa', kóllegássesagkohok sa'.

³⁰Méko kataqnók emenyexek apto m'a énxet apmenyexmo nak eñama eyaqhe meyk;

³¹kélwetágkok sa' agkok apmenyexa, kéméxcheyk eyeykhássamhok apkelmeyáseykekxa makham. Siete sa' ewagkasek ekyókxoho apkelyaqmagkáseykekxa, kawomhok sa' han apkelmésso m'a ekyókxoho aqsok apagkok ekyetnakxa enxoho.

³²¡Meyke ekxeyenma apwáxok aqsok ma'a énxet apkelánesso nak pók aptáwa'! ¡Apsexnánémap apagko' etnehek énxet apteme enxoho xa ektáha nak!

³³Ematñaha sa', kólyamatchesha sa' nahan etaqnaweykpok, megkólmasséssesek sa' apmegqakto.

³⁴Hakte máxa táxa aplo m'a énxet apkelmeyeykha nak chá'a aptáwa', megkapyósegwomek elanok pók ma'a apyaqmagkásekxo enxoho mók apteméssessamakxa';

³⁵memhek kólmések xama enxoho ekyánmaga ekyaqmageykekxa m'a, xámok eykhe katnehek aqsok kélmésso naqsa, megkamassehek eyke aplo.