Read Lengua Sur Proverbios 7 Bible Online

Proverbios 7 - Lengua Sur bible

Proverbios 7

¹Hatte, elyahakxoho chá'a sekpeywa; epekken apwáxok ma'a séltémókxa nak etnehek.

²Elyahakxoho m'a séltémókxa nak etnehek tén han ma'a nélxekmowásamáxche ahagkok nak; Emyow sa', ektémól'a agmeyók ma'a aqsok negmasmakxa egagko' nak, keñe sa' kawegqohok makham apweynchámeykha.

³Enaqtehet sa' ma'a apophék nak, epekken apwáxok.

⁴Etne sa' apyáxeg ma'a ektémakxa nak negya'áseykegkoho aqsok, etne sa' apxegexma m'a ektémakxa nak negmowána aqsok.

⁵Sa' kawagkasek chá'a teyp ekpaqhetchesa enxoho chá'a yetlo ekmátsa ekpeywa m'a kelán'a apha atáwa' élánegwayam nak chá'a pók énxet.

⁶Xama ekhem axta ko'o sélteyányeyncha'a átog étkok ahagkok

⁷ekwet'ak axta ko'o wokma'ák meyke apkelya'áseyak aqsok, keñe sekwet'a han xama nepyeseksa meyke agko' nak apya'áseyak aqsok.

⁸Xama axta apwokmo m'a máséyak nak, apyeykhákxeyk axta ámay appéwo m'a ekpayhókxa axta axagkok ma'a kelán'a.

⁹Taxnakmek axta, peyk axta kayáqtések.

¹⁰Keñe axta ektepa apmonye' m'a kelán'a, heyásexkók axta m'a aptémakxal'a élnaqta kelán'a ekyaqmagkáseyak nak pók énxet ektegye selyaqye,

¹¹máxa axta táhak ma'a kelán'a megkamegqaktól'a kalának ekmakókxa enxoho kalána', megkaxmal'a aqsa chá'a axagkok,

¹²ekweynchámeykhal'a chá'a m'a ámay, tén han ma'a apheykegkaxa nak chá'a énxet'ák, keñe han ma'a máséyak nak chá'a ámay, élhaxneykha m'a apyeykhágwayam enxoho chá'a apmonye' keñe kamok chá'a.

¹³Pathetchek axta wokma'ák ma'a kelán'a nak keñe ekpetsesa, axta kamegqágweykxak ektáha eyáneya s'e:

¹⁴“Sakhem sélana ko'o m'a séltennassama axta alána', eyaqhássesek xama sektósso Wesse' egegkok, segwetassamo nak nélásekhamaxchekxoho. Yetneyk ápetek ma'a exagkok nak.

¹⁵Cháxa keñamak sektepa nak apmonye'; ¡émenyeyk ahagko' óta', ekwet'ak han xép!

¹⁶Ekpeykessek xeyk han néten sektaháno xama apáwa apkeltaqmalma aptáxama apkeláxñe apkeñama nak Egipto,

¹⁷éxpaqhákxók xeyk han ma'a aqsok ánek ekmátsa nak ekpaqneyam, tén han mók aqsok élmátsa nak élpaqneyam.

¹⁸Nók, ólpathetaxchek sa', ólsaksohok sa' néltemegweykmoho exma,

¹⁹hakte mexnak ko'o etáwa' m'a exagkok nak: apxegamche', nanók sa' ewaták han;

²⁰apxámásawok axta han apkelsawa selyaqye, hakte mewate, sa' aqsa ewaták ma'a apyennaya sa' pelten.”

²¹Lekwokmók axta apwáxok wokma'ák ma'a ektáhakxa axta ekpeywa ekmátsa, tén han élenxányam,

²²yetlókok axta apyetleykekxa m'a kelán'a nak: ektémól'a weyke kólyentemekxak ma'a ektekyómakxa nak, máxa axta aptáhak ma'a ektémól'a xenaq kamok kelhanma,

²³keñe kólmaktaksek ahekhek yágke; ektémól'a náta katxek kelhanma, meyke ekya'áséyak yaqwayam kamátog.

²⁴Hatte, yeyxho kaxwók sekpeywa; etaqmelchesho sa' apháxenmo yaqwánxa atnehek sekpeywa.

²⁵Nágkama aqsa apwáxok xép xa ektéma nak kelán'a; ná étlakxa aqsa m'a ámay agkok nak,

²⁶hakte apxámok énxet élnapma m'a; ¡apxámok apagko' ekyógkexma m'a!

²⁷Apmahágkek agkok axagkok ma'a, cháxa apmahágko m'a ámay nétsapmakxa nak.