Read Lengua Sur Proverbios 8 Bible Online

Proverbios 8 - Lengua Sur bible

Proverbios 8

¹Yennaqtésawók ekpeywa m'a negya'áseykegkoho nak aqsok; keltamhók kañexchek ekpeywa m'a negmowána aqsok.

²Kenegwokmek ma'a netnók agko' nak egkexe, nekha nak ma'a ekyaqmagamaxchexa nak mók ámay,

³legássek ekpeywa m'a nekha nak atña'ák, nentaxnamakxa nak tegma apwányam:

⁴“Énxet'ák, kéxegke ekya'áyam se'e sekpeywa nak.

⁵Kéxegke wokma'ák, meyke nak kélya'áseyak aqsok tén han ma'a élyeyháxma nak, ¡kóltámesaxche kélteme ekha ekxeyenma kélwáxok tén han kélya'áseykegkoho aqsok!

⁶Kóleyxho sa' peya nak altennaksek ma'a aqsok megkaqhémo nak ageyxho', tén han ma'a aqsok élpéwomo nak.

⁷Naqsók ma'a peya nak altennaksek; megkalchehek ko'o ewáxok atnehek sekmowána amya'a.

⁸Péwók agko' ko'o m'a ekyókxoho sekpeywa; méko xama enxoho ekmowána amya'a.

⁹Yáxña'akxoho elanok sekpeywa m'a énxet apmopwána nak aqsok, péwók elanok ma'a énxet apya'áseykegkoho nak aqsok.

¹⁰Kólma chá'a m'a ekyókxoho sélxekmowáseyak nak, tén han ma'a ektémakxa nak kélyekpelchémo, nágkólmeyókasho chá'a amonye' kólmok ma'a sawo ekmope élyenma tén han ma'a sawo ekyátekto ekmomnáwa.”

¹¹Tásók agko' ma'a negya'áseyak nak aqsok kaxnók ma'a meteymog éltaqmalma nak; ¡mogwanchek aghéshok xama enxoho m'a aqsok kélmámenyého nak!

¹²Ko'o, negya'áseykegkoho aqsok, axek chá'a xamo' ma'a ektémakxa nak negmowána aqsok, ewanchek ko'o ótak ma'a negyekpelchágwayam nak, tén han ektaqmalma nak élchetámeykha egwáxok.

¹³Negáyo Wesse' egegkok, nenteme nentaqnagko aqsok ekmaso. Ataqnawhok ko'o m'a eyeymáxkoho nak egwáxok tén han magésso nak ageyxkoho', ekmaso nentémakxa tén han negmowána amya'a.

¹⁴Kalchetamha chá'a sekxók ko'o ewáxok, keñe keytlawhok chá'a sélane, ko'o sekteme sekyekpelchémo aqsok tén han sekyennaqte.

¹⁵Ko'o keñamak sélewanéssesso yaqwayam etnahagkok chá'a apkelwesse'e apkelwányam ma'a apkelwesse'e nak, tén han sekteméssesso chá'a apkeláneyak segánamakxa ekpéwomo m'a apkelámha apmonye'e nak.

¹⁶Ko'o chá'a sektemessáseyak apkelámha apmonye'e m'a apkelwesse'e nak, ko'o han keñamak sekteméssesso chá'a apxeyenma yaqwánxa kólteméssesek énxet.

¹⁷Wásekhohok chá'a ko'o m'a ektáha nak seyásekhayo, héteyekxak nahan chá'a m'a ektáha nak sektamso.

¹⁸Ko'o chá'a sekmésso ekxámokma aqsok apagkok tén han ekha kéláyo, keñe han ekyawe agko' kéláyo, tén han ektaqmalma apheykha.

¹⁹Tásók agko' ma'a aqsok sekmésso nak ko'o, kaxnók ma'a sawo ekyátekto ekmomnáwa ektaqmalma; tásók agko' ma'a aqsok séltennassama nak ko'o, megkaxnawok ma'a sawo ekmope kéltaqmelchessamo nak kélaxñáseykekxa'.

²⁰Eytlók chá'a ko'o m'a ámay ekpéwomo nak, cham'a ámay ektaqmelchessamo nak negha.

²¹Alméshok chá'a ko'o aqsok ekpayhawo nak chá'a yaqwayam almések ma'a sélásekhayo nak chá'a: allánessesagkohok chá'a apxanák ma'a aqsok élmomnáwa.

²²“Wesse' egegkok axta ko'o sélane, sekxók axta apcheynamo apkelane aptamheykha, amonye' axta yaqwayam elának ma'a ekyókxoho aqsok.

²³Nanók axta ko'o sélane, amonye' axta yaqwayam elának se'e nélwanmeygkaxa nak.

²⁴Emonye' axta ko'o setekkesso, amonye' axta yaqwayam kalanaxchek ma'a wátsam élyawe nak, tén han wátsam étkók, keñe han ekheykegkaxa nak yegmen ektaqmalma.

²⁵Nanók axta ko'o setekkesso Wesse' egegkok, amonye' axta yaqwayam enegkenek ma'a egkexe tén han ma'a meteymog élekhahéyak nak;

²⁶meláneykxa axta makham ma'a xapop tén han ma'a yókxexma, keñe han ma'a yagkamex élánamáxko nak se'e nélwanmeygkaxa nak.

²⁷Ekhegkek axta ko'o m'a apkeláneya axta néten, appeykessama axta néten ma'a wátsam ekwányam,

²⁸cham'a apkelánéssama axta ektémakxa ekhéyak yaphope m'a néten, keñe han apmeykessessama axta ekteyapmakxa yegmen ma'a wátsam ekwányam ekmattawóneg nak,

²⁹apkeltémo axta megkatyephek chá'a yegmen wátsam ekwányam néxa nak chá'a ekyetnamakxa, appekkenchessama axta awhak ma'a xapop,

³⁰ekhegkek axta ko'o nápakha m'a, meyke sekyenyaweykha. Ko'o axta chá'a sekpeykessáseykekxa apwáxok ma'a, yókxoho ekhem axta chá'a seknéweykha nápaqto';

³¹eknéweykha axta chá'a ko'o neyseksa m'a nélwanmeygkaxa élánamáxche axta, ¡payheykekxeyk axta ewáxok sekweteya énxet apheykha!

³²“Étchek, kóleyxho kaxwo' sekpeywa; kólyetlow sektémakxa nak keñe sa' kalpayhekxak chá'a kélwáxok.

³³Kóleyxho sélxekmowáseyak; nágkólyenyow ma'a negya'áseykegkoho nak aqsok.

³⁴Apkeleñémo énxet ektáha nak apháxenmo sekpeywa, apkenmeykha nak átog exagkok yókxoho ekhem sélhaxneykha.

³⁵Hakte cham'a ektáha nak ko'o séteyeykekxa, cháxa apwetákxo ekyennaqte egnények xa, étak han ektaqmeleykha apwáxok elanok ma'a Wesse' egegkok;

³⁶keñe m'a énxet ektáha nak sétnakhasso ko'o, cháxa aptawásekpoho apagko' xa; ¡apyókxoho ektáha nak chá'a setaqnagko ko'o, cháxa aptáha apchásekhayo m'a nétsapma!”