Read Lengua Sur Proverbios 9 Bible Online

Proverbios 9 - Lengua Sur bible

Proverbios 9

¹Kelanak axta axagkok negya'áseykegkoho aqsok, keláncheságkek axta han siete meteymog élámha;

²kelnapchek axta aqsok eknaqtósso yaqwayam kalának ektámáxche ekyawe, kelanak axta anmen yámet égmenek ektaqmalma, keñe ekpekkena néten mésa

³tén axta éláphasa élásenneykha m'a netnók agko' nak ma'a tegma apwányam, yaqwayam katnahagkok kalyennaqtéshok élpáxameykha s'e:

⁴“¡Kólmeyógma s'e wokma'ák melya'áseyak nak aqsok!” Keláphássek axta han éltamho katnehek kalának ma'a énxet'ák élyeyháxma nak:

⁵“Kólmeyógma s'e kóltáswa sekto, kólyahagwa vino sélane ahagko' xeyk ko'o.

⁶Kólwatesák kélteme élyeyháxma, keñe sa' kólweynchamha makham; kólteme aptamheykegkaxa nak ma'a énxet'ák apmopwancha'a nak aqsok.”

⁷Apnókáseyha sa' agkok xép ma'a énxet megkeyxnegwayam nak chá'a appeywa, tén han ekmaso nak aptémakxa', asagkek sa' aqsa chá'a katnehek apchátegmoweykegkokxa', etaqnók sa' chá'a.

⁸Apkeltennásekxók sa' agkok xép aqsok apkelane m'a énxet megkeyxnegwayam nak chá'a appeywa, etaqnók sa'; apnókáseyha sa' agkok xép ma'a énxet apya'áseykegkoho nak aqsok, yásekhohok sa'.

⁹Apkelxekmóssek sa' agkok xép ma'a énxet apya'áseykegkoho nak aqsok, keñe sa' kántagkok apteme apya'áseykegkoho aqsok; apkelxekmóssek sa' agkok xép ma'a énxet ektaqmalma nak apwáxok, keñe sa' kayágwomhok apya'áseyak aqsok.

¹⁰Néltamhók agkok antéhek negya'áseykegkoho aqsok, kéméxcheyk sekxók antéhek negáyo Wesse' egegkok; negya'ásegkók agkok ma'a Appagkanamap Apagko' nak, cháxa nentáha negmowána aqsok xa.

¹¹Negya'áseykegkoho aqsok keñamak peya kawegqohok apweynchámeykha, exámhok sa' han apyeyam apha.

¹²Apya'áseykegkoho aqsok sa' agkok xép, sa' kapasmok xa; megkeyxnegwayam appeywa sa' agkok xép, apsexnánémap apagko' sa' etnehek.

¹³Hawók nentémakxa ekyeyháxma m'a kelán'a éltennágwayam la'a aqsa chá'a nátegma, ekyeyháxma tén han megkay'áseyak aqsok.

¹⁴Kaxek chá'a m'a átog axagkok, ektáhakxa nak netnók agko' ma'a tegma apwányam nak,

¹⁵katnehek chá'a kalwónmakha apkelmeyeykekxa nak chá'a apkeltamheykegkaxa s'e:

¹⁶“¡Kólmeyógma s'e wokma'ák melya'áseyak nak aqsok!” Katnehek nahan chá'a kalának ma'a énxet'ák megkalchetámeykha nak chá'a apkelwáxok:

¹⁷“Atsók agko' agyenek ma'a yegmen ekmenyexamaxche nak; atsek han ma'a nento ekpowásamáxkoho nak chá'a katawaxche'.”

¹⁸Melya'áseykegkok apkeletsapma m'a ektáha axta éláneyeykha, melya'áseykegkok apkelweykmo m'a apkelmaheykegkaxa nak chá'a apkeletsapma.