Read Lengua Sur Eclesiastés 1 Bible Online

Eclesiastés 1 - Lengua Sur bible

Eclesiastés 1

¹Keso apxeyenma énxet apkeltenneykencha'awo axta chá'a, cham'a wesse' apwányam axta m'a Jerusalén, David axta apketche. ¡Kaqhok agwetak aqsok, kaqhok agweta'! ¡Ekyókxoho aqsok ekteme eyaqhémo agweta'!

³¿Yaqsa aqsok etekkesek yaqhakpok aptamheykha énxet keso náxop?

⁴Pók chá'a etyamok, pók chá'a yetsapok, megkayaqmagkassemek eyke mók ektémakxa xapop.

⁵Katyapok chá'a ekhem, kataxnekxak han chá'a, keñe kamyekxak chá'a m'a ekyetnamakxa nak, yaqwayam enxoho katépekxak makham.

⁶Epeynchakpok chá'a yeyam, ekpayho nepyeyam, keñe kapeygkexchek éxchahayam, kamyekxak ma'a nexcheyha. ¡Kapeygkexchek chá'a éxchahayam! ¡Megkamassegwomek chá'a ekpeynchamaxche'!

⁷Kalmeyekxak chá'a yegmen éleñama nak wátsam ma'a wátsam ekwányam nak, megkalanyek eyke chá'a m'a wátsam ekwányam nak; keñe yegmen kaltaqhohok chá'a m'a éleñémékxa nak chá'a. Yaqwayam enxoho kanyehekxak makham ma'a atamnek nak.

⁸Mogwanchek ansáwak anxének aqsok ekwánxa senleklágwayam, megkaleklagweykmok egaqta'ák ekwete, megkaleklagweykmok han egheyk'ák eklegé.

⁹Kalántépekxak aqsa chá'a aqsok élánteyapma axta chá'a m'a nano' axta; kalanaxchekxak chá'a aqsok élánamáxko axta chá'a m'a nano' axta. ¡Méko aqsok axnagkok ekteyapma keso náxop!

¹⁰Megkatnehek chá'a metne appeywa xama énxet se'e: “¡Keso aqsok axnagkok se'e!” Nanók eyke han ekteyapma xa, cham'a mólánteyapmakxa axta negko'o.

¹¹Massegweykmek élxénamaxche m'a aqsok nano', kamassegwók sa' han élxénamaxche m'a aqsok peya nak kalántépekxak egmonye' nepyeseksa nak énxet'ák, cham'a nentámen sa' negko'o.

¹²Ko'o, séltenneykencha'awo nak chá'a, ektemegkek axta énxet'ák Israel wesse' apwányam apagkok ma'a Jerusalén,

¹³ekmáheyók ahagko' axta ategyaha amya'a, tén han altámesaxchek yetlo sekya'áseykegkoho m'a ekyókxoho aqsok élánamáxko nak chá'a keso náxop. ¡Yentexe nak la'a Dios apmésso apkeltamheykha énxet'ák, yaqwayam enxoho elyaqhakkassessamhok chá'a apkelwáxok!

¹⁴Ekya'ásegweykmek axta ekyókxoho aqsok élánamáxko nak chá'a keso náxop, ekteme aqsok eyaqhémo agweta', máxa m'a negmáheyól'a agmagkok éxchahayam.

¹⁵¡Méko kawának kapékásekxak ma'a kéltaqhesso nak, megkólwanchek nahan kólyetsetek ma'a méko nak!

¹⁶Keñe axta ektáha ekpaqméteyncha'a ewáxok se'e: “Ektemék ko'o kaxwók énxet ekha kélyaheykekxoho, ekyeykhásseykmók sekya'áseyak aqsok ma'a apmonye'e apteme axta apkelwesse'e m'a Jerusalén; ekméssamók ahagko' ewáxok ma'a negya'ásegwayam nak, tén han ma'a negya'áseykegkoho nak aqsok, weykmók sekya'áseyak aqsok ekyeyháxma, keñe nak sekyekpelchágwokmo, cháxa ekhawo han ma'a negmáheyól'a agmagkok éxchahayam.”

¹⁸Yetneyk agkok ekyawe negya'ásegwayam, awanhek katnehek sẽlya'assóxma aqsok; yaweygkek agkok han negmowána aqsok, kayawagkok han chá'a nenlegeykegkoho.