Read Lengua Sur Eclesiastés 10 Bible Online

Eclesiastés 10 - Lengua Sur bible

Eclesiastés 10

¹Ethápok chá'a xama yápa aphápak, emasseksohok chá'a ekpaqneyam sokmátsa ekmátsa nak ekpaqneyam. Ñohok agko' chá'a kahaxnaxkohok ma'a amya'a ekyeyháxma mékoho nak, megkaxnawok ma'a negya'áseykegkoho nak aqsok ekpayhawo nak eykhe kóláwho'.

²Énxet ekha nak apya'áseyak aqsok, aqsok ektaqmela chá'a kaxének apwáxok elána', keñe eyke m'a énxet ekyeyháxma nak, aqsok ekmaso chá'a kaxének apwáxok elána'.

³Énxet ekyeyháxma nak, exekmóshok chá'a ektáhakxa mékoho m'a élchetamso nak apwáxok elána', elxénmakha eyke chá'a ektáha élyeyháxma m'a pók énxet'ák nak.

⁴Aptaqnókek agkok xép ma'a aptaqmelchesso nak apchókxa, nágkapekhe apwáxok; mampekhésamaxche' awanchek kamasseksek ma'a aqsok ekyawe nak magaqhémo.

⁵Ekyekpelchágweykmek ko'o ektémakxa nak megkapéwomo nak élánamáxche aqsok keso náxop, keñamak ma'a kelwesse'e apkeltaqmelchesso nak apchókxa:

⁶énxet ekyeyháxma nak, kólmések chá'a ektaqmelakxa aptamheykha, keñe eyke m'a énxet apmopwána nak aqsok, kólmések chá'a aptamheykha mékoho nak.

⁷Ekweteyak chá'a ko'o m'a énxet'ák kélásenneykha naqsa nak, yátnáxeg chá'a elchántaha, keñe eyke m'a kelwesse'e nak, náxop chá'a elweynchamha, máxa chá'a etnahagkok ma'a kélásenneykha naqsa nak.

⁸Énxet apmeta nak máxek, etyemekxohok chá'a apagko'. Énxet appáxqatma nak tegma kélhaxtegkesso, yéwa chá'a katakxek.

⁹Énxet apkelyaqtónma nak meteymog, kayensásekxak chá'a. Énxet apkelpáxqatma nak yántápak, kaqhekxak chá'a.

¹⁰Méko agkok ahamtek póte, tén han megkólmaxneyeykha nak chá'a, kólwasqáphok chá'a kólmaha. Tásek anlának aqsok ektaqmela yetlo negya'áseykegkoho.

¹¹Méko aqsok kagkések énxet apneykáseykha nak yéwa, cham'a ektakxa enxoho amonye' kélneykáseykha.

¹²Énxet apya'áseykegkoho nak aqsok, kalkohok chá'a kélwáxok aptáhakxa appeywa, keñe m'a appeywa nak énxet ekyeyháxma, kasexnáneykxohok agko' chá'a:

¹³appaqmetakxoho chá'a katyapok appeywa ekyeyháxma, kasógwomhok agko' chá'a m'a aptáhakxa enxoho appeywa.

¹⁴¡Énxet ekyeyháxma nak, xámok chá'a katnehek appeywa! ¿Yaqsa awanchek kaxének ma'a yaqwánxa nak katnehek? Méko ekya'ásegkoho m'a egmonye' nak.

¹⁵Aptamheykha apchaqhamap chá'a kaqhek apyempehek ma'a énxet ekyeyháxma nak, mey'asagkehek chá'a m'a ámay ekmahéyak nak tegma apwányam.

¹⁶¡Apchókxa sa' laye, apteme nak wesse' apwányam apagkok sakcha'a, elessaksohok chá'a apkelánegkaxa ektámáxche ekyawe ma'a kelwesse'e apagkok nak!

¹⁷¡Éleñémo apchókxa apteme nak wesse' apwányam apagkok meyke nak aptémakxa, keñe m'a apkeltaqmelchesso nak apchókxa, etawagkok chá'a aptéyak ekwákxo enxoho chá'a apteykegkaxa aptéyak, yaqwayam elmekxak makham apkelyennaqte, háwe eyke yaqwayam kalnápok anmen!

¹⁸Énxet megkayaqwayam nak etneykha katyamok chá'a appakxanma; keñe m'a melane agko' nak aqsok, apyókxoho apxagkok chá'a etyamok.

¹⁹Nento ekteme chá'a ekpeykáseykekxa egwáxok, keñe vino hegátséssesha chá'a egwáxok, cham'a ekha enxoho selyaqye.

²⁰Ná etekkessesha aqsa apwesey wesse' apwányam, megkeyxek ma'a élchetámeykha nak apwáxok. Ná exén ekmaso m'a énxet ekxákma nak aqsok apagkok, megkeyxek ma'a aphakxa enxoho apxakko', hakte kampa katnehek náta, keñe kaltennássekxak ma'a aptáhakxa enxoho exchep appeywa.