Read Lengua Sur Eclesiastés 11 Bible Online

Eclesiastés 11 - Lengua Sur bible

Eclesiastés 11

¹Eyenyow neygmen apto; keñe sa' natámen étekxak makham.

²Emlásek apnámakkok aqsok ekyetnakxa nak xép, cham'a apkepwagkexa enxoho, hakte káhapwak katnehek aqsok ekmaso s'e apchókxa nak.

³Kelyaweykxeyk agkok yaphope, keytlawhok nahan ekmámeye keso náxop. Kelyaqnenágkek agkok yenta'a ekpayho nak nexcheyha, essenhan ekpayho nak nepyeyam, kaxnagkokxa aqsa chá'a m'a élyaqnenakxa enxoho.

⁴Énxet apkeláneykha nak éxchahayam, meknekxeyk aqsok aktek, énxet apkeláneykha nak yaphope menakxehek ekyexna aqsok apkeneykekxa.

⁵Ekhawo ektémakxa nak mey'áseyak ekmahágkaxa éxchahayam, mey'ásegkok nahan ektémakxa élánamáxche sakcha'a m'a kañe' nak egken awáxok, mey'ásegkok nahan ma'a aqsok apkelane nak Dios, cham'a apkelane nak ekyókxoho aqsok.

⁶Eknekxa chá'a aqsok aktek axto'o, tén han taxnám, hakte mey'asagkehek yaqsa kexaha kataqmelek élánteyapma, amonye' apkeneykekxa essenhan ma'a axayo nak apkeneykekxa, essenhan tásek katnehek élánteyapma xa ánet nak.

⁷Tásók agko' élseyéxma, ektaqmelakxoho agko' chá'a agwetak ma'a élsassóxma nak ekhem,

⁸apheyk agkok ekwenaqte énxet keso náxop, peykessáseykxeyk agkok han chá'a apwáxok ma'a apha nak ekwenaqte, kéméxcheyk han kaxének apwáxok peya han kawegqohok ma'a ekyaqtessóxma nak, keñe han ma'a ekyókxoho aqsok ekmako nak kalwa', peya han katnehek eyaqhémo agweta'.

⁹Xép apteme nak apketkok, kapayhekxa apwáxok, ekyennákxa nak makham apyempehek, kapeykessásekxa apwáxok ma'a aqsok éltaqmela nak, keso apkepwagkexa nak makham. Elána' m'a ekxénakxa enxoho apwáxok elána', eñama m'a ekyókxoho aqsok apwete nak, kaxén eyke apwáxok Dios sa' ékpelkohok ma'a ekyókxoho aqsok apkelane nak xép.

¹⁰Étnakhés ma'a élapwagkassama nak apwáxok, nágyoho han kañássesagkohok ma'a nenlegeykegkoho nak, hakte weykmók han ekteme eyaqhémo agwetak ma'a ektaqmalma nak apweynchámeykha apteme nak apketkok.