Read Lengua Sur Eclesiastés 12 Bible Online

Eclesiastés 12 - Lengua Sur bible

Eclesiastés 12

¹Kaxén apwáxok ma'a aptáha axta exchep Apkelane, keso aptáhakxa nak makham apketkok, mewánxa nak makham ekhem ekyentaxnakxa negha; kammok sa' apyeyam yaqwayam etnehek appeywa s'e: “Mehepeykessáseykekxak ko'o ewáxok ektémakxa sekha.”

²Elána' sa' kaxwók xa, megkamassakxa nak makham éltátchesso ekhem, tén han pelten, tén han yaw'a, megkamassakxa nak makham yaphope natámen ekmámeye.

³Kawak sa' ekhem yaqwayam etnehek apkelpexyennameykha m'a apkeltaqmelchesso nak wesse' apwányam apxagkok, elháxeheykha sa' ma'a énxet'ák apkelyennaqte axta, ántawók sa' kaleymaxchek ma'a kelán'ák éltekxeyéyak nak chá'a aqsok aktek, kamaskok sa' éltekxeyágko, keñe m'a élteyányeykha nak chá'a átog étkók, kasextohok sa' élyekpelchéxma.

⁴Wokmek sa' agkok xa ekhem nak, kólapagkokxak sa' atña'ák ma'a nentaxnamakxa nak ámay; kamaskok sa' eklegáxko éxtegyawasso m'a kéltekxekxamakxa nak aqsok aktek; kalpáwak sa' chá'a náta, kamaskok sa' eyke éllegasa m'a ekmátsa nak élpáwá;

⁵keyxchek sa' chá'a kalchántaxchek ma'a netno nak, kalmeneyxchek sa' chá'a m'a ámay nak. Elyapweygkok sa' mokwa naxma, eltaqnaweykpok sa' sawa', mékoho sa' katnekxak ma'a yámet ekha nak am'ák. Hakte ewenchepekxak chá'a énxet meyke apweyktámho, keñe ámay kañexchek chá'a kéllekxagweykha eñama apkeletsapma.

⁶Kaxén apwáxok aptáha axta exchep Apkelane, megkalyetyapakxa nak makham axát'ák ma'a sawo ekmope ekmomnáwa nak, tén han metnahakxa nak makham nápakha'a apketkok ma'a sógweygke kéllane nak sawo ekyátekto ekmomnáwa; mepaqxakxa nak makham yátegwáxwa m'a kélpekkenma nak nekha ekteyapmakxa yegmen, megkalyetyapakxa nak makham táma m'a kélyekwe nak yegmen yámelchet.

⁷Keñe sa' natámen xa, xapop sa' katnekxak makham ma'a ánek nak, ekhawo ektémakxa axta nano', keñe sa' eghagák kalmeyekxak ma'a aphakxa nak Dios, cham'a aptáha axta segmésso.

⁸Ko'o Séltenneykencha'awól'a, ekxénákxók ko'o makham se'e: ¡Kaqhók agwetak aqsok! ¡Ekyókxoho ekteme aqsok eyaqhémo agweta'!

⁹Neyseksa apyáncháseykegkoho axta apya'áseykegkoho aqsok ma'a Apkeltenneykencha'awo axta chá'a, axta elwátesseykmok han apkelxekmósso énxet'ák ektémakxa nak apyekpelchémo. Kélméssegkek axta han aptamheykha yaqwayam eltámésakpok ekxámokma m'a amya'a segaqhássessamo nak senxeyenma, kéltémók axta han etaqmelcheshok apkeláneykekxa apnaqtáxéséyak.

¹⁰Apkelenxáneykmek axta han étekxak ma'a amya'a ekleklamo nak apwáxok énxet, yaqwayam enxoho etaxaksek ektémakxa apweteykekxa aqsok, ekteme nak ekmámnaqsoho.

¹¹Énxet apkelya'áseykegkoho nak aqsok, máxa yámet élmahantal'a naw'a m'a apkelxeyenma nak aqsok, kélánchásekxeyk agkok ma'a apkelxeyenma nak aqsok, máxa láwa élmahantal'a naw'a kélatcháseyak nak aqsok katnekxa', cham'a apkelatcháseyak la'a xama apkeláneykha nepkések.

¹²Énxet éltámeye nak chá'a xa aqsok nak, xámók chá'a katnehek aqsok eyésso. Weykcha'áhak nenlane ekteme megkasawhomáxche', néltámesáxcheyk agkok han chá'a ekwenaqte, hegyampaksohok chá'a.

¹³Wánxa amya'a kéllegasso. Penchásexcheyk kaxwók ekxénamaxche aqsok. Etne apcháyo Dios, elána' m'a apkeltémókxa nak antéhek, hakte cháxa yaqwayam chá'a elanagkok énxet xa.

¹⁴Dios sa' elyekpelkohok ma'a ekyókxoho aqsok nenlánéyak nak, cham'a aqsok ektaqmela nak, essenhan ma'a aqsok ekmaso nak, megkeyxek ma'a nempósso nak aqsok nenlane.