Read Lengua Sur Eclesiastés 2 Bible Online

Eclesiastés 2 - Lengua Sur bible

Eclesiastés 2

¹Axta entáhak han ekpaqméteyncha'a ewáxok se'e: “Eykkónek sa' kaxwók ma'a aqsok sempeykessáseykekxoho nak egwáxok, agkésaxkohok sa' ekmátsa negha.” ¡Weykmok axta eyke han ekteme aqsok eyaqhémo agweta' xa!

²Ekya'ásegweykmek axta néktegmeykha ekteme ekyeyháxma, keñe m'a ekmátsa nak negha ekteme aqsok eyaqhémo agweta'.

³Ektaqmelchessamók axta sekmeykha negya'áseyak aqsok sekyama vino, yaqwayam hegkések ekpayheykekxa ewáxok, keñe axta sekmeyásexkoho m'a yaqwayam enxoho ay'asagkoho', kexa ektaqmela etnehek énxet xa, neyseksa apha ekyaqwate keso náxop.

⁴Éláneyak axta ekyawe agko' sektamheykha, eknaqxétekháseykegkek axta tegma apkelyawe ahagkok ahagko', yetneyk axta han séneykekxa anmen yámet ahagkok ahagko'.

⁵Yetneyk axta han namyep ahagkok ahagko', tén han séneykekxexa yenta'a ekha nak ekyexna, éneykekxeyk axta m'a mók ektémakxa nak yenta'a ekha nak ekyexna.

⁶Ekmetamchek axta han yámmáxek yaqwayam chá'a kólexpaqhagkok ma'a yenta'a séneykekxa nak;

⁷élmomchek axta énxet sélásenneykha naqsa, tén han ma'a kelwán'ák nak, yetneyk axta han sélásenneykha naqsa appalleyam nak exagkok; xámok axta han weyke seknaqtósso, tén han nepkések, ekyeykhásseykmók axta m'a apmonye'e apheykha axta m'a Jerusalén, matyapmakxa axta ko'o.

⁸Ekxámassegkek axta sawo ekyátekto élmomnáwa, tén han ma'a sawo ekmope élmomnáwa nak, tén han ma'a aqsok élmomnáwa nak, cham'a apkelmeykencha'a axta m'a pók apkelwesse'e nak, tén han ma'a éleñama axta mók yókxexma. Yetneyk axta apkelmeneykmasso ahagkok, tén han élmeneykmasso, tén han ma'a aqsok apyespagko nak chá'a énxet; xámok axta han kelán'a sélmeykha naqsa.

⁹Ektemegkek axta énxet ekha kélyaheykekxoho, ekyeykhásseykmók axta m'a apyókxoho apkelwesse'e apheykha apmonye'e axta m'a Jerusalén, cham'a matyapmakxa axta ko'o. Axta han hégketeykekxak ma'a sekya'áseyak nak aqsok.

¹⁰Éláneyak axta chá'a m'a sekmámenyého nak chá'a; éláneyak axta han chá'a m'a ekyókxoho segméssamo nak chá'a ekpayheykekxa egwáxok. Peykáseykekxeyk axta chá'a ewáxok ma'a ekyókxoho sektamheykha nak, cháxa ekteme chá'a segkeyáseykekxa ekmátsa ewáxok xa.

¹¹Kelchetagkassegkek axta ewáxok xa aqsok sélane ahagko' nak, cham'a sektamheykha sekwasqápeykekxoho axta sélane, keñe nak sekyekpelchágweykmo ektáha han aqsok eyaqhémo agwetak xa, máxa m'a negmáheyól'a agmagkok éxchahayam, méko aqsok hentekkessesek keso náxop.

¹²Keñe axta natámen élchetagkáseyncha'a ewáxok ma'a negya'áseyak nak aqsok, tén han ma'a aqsok ekyeyháxma nak, tén han ma'a segyeykessamo nak exma: ¿Háxko sa' etnehek ma'a peya sa' etnehek wesse' netámen ko'o, wánxa sa' aqsa elának ma'a élánamáxko axta chá'a?

¹³Ekweteyak axta negya'áseyak aqsok ektáha ektaqmela, megkaxnawok ma'a segyeyháxma nak, ekhawo nak han ektémakxa élseyéxma ektaqmalma, megkaxnawok ma'a ekyaqtéssóxma nak.

¹⁴Énxet ekha nak apya'áseyak aqsok ey'asagkohok chá'a aqsok apkelane, keñe eyke m'a énxet ekyeyháxma nak, neyseksa ekyáqtéssóxma chá'a eweynchamha. Ekyekpelchágweykmek axta eyke ekhémo mók yaqweykenxa hentéhek negyókxoho nak,

¹⁵keñe axta ektáha ekpaqméteyncha'a ewáxok se'e: “Énxet ekyeyháxma ekmáheyókxa nak katnehek, hawók ko'o xa ekmáheyókxa hetnehek, méko aqsok segkésso sektéma ekha sekya'áseyak aqsok. ¡Weykmok eyke han ekteme aqsok eyaqhémo agwetak xa!

¹⁶Hakte méko chá'a kaxénwakxohok awáxok ma'a énxet ekha nak apya'áseyak aqsok, tén han ma'a énxet ekyeyháxma nak; méko sa' kaxénwakxohok awáxok ma'a egmonye' sa', eletsaphok chá'a m'a énxet ekha nak apkelya'áseyak aqsok, tén han ma'a élyeyháxma nak.”

¹⁷Ektaqnawágweykmek axta ko'o ektémakxa nak sekha, hakte ekyókxoho aqsok élánamáxkoho nak chá'a keso náxop, hegkések axta chá'a ekmaso sekha. Naqso' ektáha aqsok eyaqhémo agwetak xa ekyókxoho nak, ¡hawók ma'a kélmáheyól'a kólmagkok éxchahayam!

¹⁸Ektaqnawágweykmek axta han ma'a ekyókxoho sektamheykha ektáha axta sélane keso náxop, hakte megkatnehek melmeykekxa ekyókxoho m'a aptáha nak ko'o seyaqmagkasso,

¹⁹megkeyxek ma'a aptáha enxoho apya'áseykegkoho aqsok, essenhan ma'a ekyeyháxma nak, apagkok sa' eyke etnehek ma'a ekyókxoho aqsok eñama axta sektamheykha sélántekkesso, tén han eñama m'a sekya'áseyak aqsok sekweteya axta ko'o keso náxop. ¡Cháxa ektáha han aqsok eyaqhémo agwetak xa!

²⁰Xama axta ko'o sekwet'a aqsok sélane nak keso náxop, chaqhak axta ewáxok seyaqhamaxko sektamheykha,

²¹hakte apyetneyk énxet aptamheykha apchásenneykekxoho nak apya'áseyak aqsok, tén han ma'a apmopwána nak aqsok, tén han ma'a apya'ásegweykekxoho nak ektémakxa aptamheykha, keñe elmekxak ekyókxoho m'a énxet metnaheykha nak, yaqwayam etnehek apagkok. ¡Cháxa ektáha han aqsok eyaqhémo agwetak xa, tén han ektáha megkapéwomo agko'!

²²¿Yaqsa aqsok kagkések yaqhakpok aptamheykha énxet, tén han kaxámak aqsok ekyetnakhassamo apwáxok keso náxop?

²³Eñegkohok chá'a neyseksa apha keso náxop, kalya'aksek chá'a exma; weykmok han axta'a megkamassegwayam élchetamso apwáxok. ¡Cháxa ektáha han aqsok eyaqhémo agwetak xa!

²⁴Eyke ektaqmela etnehek énxet se'e: etwok apto, tén han ének apyá, kapeykessásekxak apwáxok ma'a aptekkesso nak chá'a aptamheykha, hakte ekweteyak ko'o ektáha eñama Dios xa.

²⁵Dios apwánxa apagkok segmésso m'a nento nak, tén han ma'a ekpayheykekxa nak egwáxok.

²⁶Naqsók Dios aptáha apmésso apya'áseyak aqsok énxet, tén han ma'a apyekpelchémo nak aqsok, tén han ekpayheykekxa nak egwáxok, cham'a apchásekhókxa enxoho chá'a, keñe eyke m'a énxet apkelane nak mey'assáxma, yohok sekxók chá'a etnehek wesse', eñama m'a apwasqápeykekxoho nak aptamheykha, tén han yánchásekxak aqsok éltaqmalma élmomnáwa nak, keñe natámen elmések chá'a pók énxet, cham'a apchásekhókxa enxoho chá'a. ¡Cháxa ektáha han aqsok eyaqhémo agwetak xa, máxa negmáheyól'a agmagkok éxchahayam!