Read Lengua Sur Eclesiastés 3 Bible Online

Eclesiastés 3 - Lengua Sur bible

Eclesiastés 3

¹Ekyókxoho aqsok ekha ekhem agkok keso náxop; yetneyk chá'a ekhem agkok xama aqsok, cham'a ekmakókxa enxoho chá'a katnehek:

²Yetneyk ekhem nentéyeykemxa', tén han nétsapmakxa'. Yetneyk ekhem negkeneykekxexa aqsok, tén han nennakxamakxa ekyexna aqsok negkeneykekxa'.

³Yetneyk ekhem nénnapmakxa', tén han nentaqmelchesseykenxa'. Yetneyk ekhem néletsagkassamakxa aqsok, tén han nenláneykekxexa aqsok.

⁴Yetneyk ekhem nenlekxagweykegkaxa', tén han néktegmeykegkaxa'. Yetneyk ekhem senlapweykenxa', tén han ekpayheykekxexa egwáxok.

⁵Yetneyk ekhem néxpánchessamakxa' meteymog, tén han negáncháseykekxexa'. Yetneyk ekhem nélpathetamaxchexa, tén han néxpánchesamaxchexa'.

⁶Yetneyk ekhem nenlenxáneykenxa', tén han nélwatéssamakxa'. Yetneyk ekhem nentaqmelchessamakxa', tén han negyamasmakxa'.

⁷Yetneyk ekhem nélyeptamakxa', tén han nélyetnaqtamakxa'. Yetneyk ekhem mampaqmésmakxa', tén han nempaqmésmakxa'.

⁸Yetneyk ekhem negásekhayókxa, tén han nentaqnagkamakxa'. Yetneyk ekhem kempakhakma, tén han meyke ektáhakxa negha.

⁹¿Yaqsa aqsok kataksek yaqhakpok aptamheykha énxet?

¹⁰Ekyekpelchágweykmek ko'o Dios yentexek apteméssessamakxa énxet, yaqwayam enxoho elyaqhakkassessamhok chá'a apkelwáxok.

¹¹Dios axta apkelane amonye' aqsok éltaqmela, appekkenchessegkek axta han apwáxok énxet néltémo nak agya'asagkohok yaqwánxa katnehek egmonye' tén han nentámen meyke néxa, neyseksa mey'áseyak eykhe m'a ekyókxoho aqsok ekyawe apkelane nak Dios, tén han ma'a apmáheyo nak chá'a elána'.

¹²Ekya'ásegkók eyke ko'o ektaqmela etnehek énxet kapayhekxak apwáxok, tén han kataqmelchessesha apwáxok aqsok neyseksa apha,

¹³hakte nentókek agkok chá'a nento, tén han negyena enxoho chá'a negyá, tén han ekpeykáseykxo enxoho chá'a egwáxok ma'a aqsok éltaqmela nenlane nak eñama nentekkesso nentamheykha, cháxa eñama Dios segmésso xa.

¹⁴Ekya'ásegkók nahan ma'a ekyókxoho Dios axta apkelane megkamassegwomek chá'a. Méko han kawának kalánekxoho', tén han kamasseksek; hakte Dios axta apteméssesso xa ektémakxa nak, yaqwayam enxoho chá'a negko'o agáwhok ma'a.

¹⁵Kelánteyepmeyk ma'a élánteyapma axta nano', méko aqsok megkatyapmakxa, megkatyepek nahan chá'a m'a aqsok megkatyapma nak. Dios chá'a yának kalántépekxak ma'a aqsok élánteyapma axta chá'a nano'.

¹⁶Ekweteyak nahan se'e náxop ekyetnama nentémakxa ekmaso, tén han magya'assáxma, yaqwayam eykhe keytek nentémakxa ektaqmela, tén han nentémakxa ekpéwomo.

¹⁷Ékeso éñamakxa sekxéna nak ko'o Dios ékpelkohok sa' ma'a énxet meyke nak aptémakxa, tén han ma'a ekmaso nak aptémakxa, hakte yetneyk ekhem ma'a ektémakxa nak chá'a ekyókxoho aqsok, tén han ma'a élánamáxchexa nak chá'a ekyókxoho aqsok.

¹⁸Ekxénchek axta nahan ma'a aptémakxa nak énxet, apkelyekkeynma Dios ma'a énxet'ák nak, yaqwayam enxoho elyekpelchágwók aphémo ma'a aqsok nawha'ák.

¹⁹Hawók mók élmaheykegkaxa énxet, tén han aqsok nawha'ák: kaletsaphok nahan chá'a, hawók mók ekha élennama. Méko ekyeykhamaxche énxet tén han aqsok nawha'ák: ekyókxoho ekteme eyaqhémo agweta',

²⁰kaxhok chá'a mók ekhagwayam ma'a ekhagweykenxa nak chá'a, xapop axta keleñamak élánamáxche' m'a ekyókxoho nak, xóp sa' nahan katnekxak ekyókxoho.

²¹¿Yaqsa ekya'ásegkoho énxet aphagák ekmeyeykekxo chá'a néten, tén han ma'a ahagák nak aqsok nawhak ekmeyeykekxo chá'a kañe' xapop ekmattawóneg?

²²Ekya'ásegweykmek ko'o énxet ektaqmela agko' kapeykessásekxak apwáxok ma'a aptamheykha nak aptekkesso, hakte cháxa aqsok ektáha ekpehewayam xa, méko keyntementák yaqwayam elanok ektáhakxa m'a natámen apketsapma.