Read Lengua Sur Eclesiastés 4 Bible Online

Eclesiastés 4 - Lengua Sur bible

Eclesiastés 4

¹Élanawók axta ko'o énxet'ák ektémakxa apnaqtawáseykegkoho apnámakkok apheykha nak keso náxop. Ekwet'ak axta apkellekxagweyncha'a m'a énxet'ák kélnaqtawáseykegkoho nak, méko axta eyke élpeykessásekxo chá'a apkelwáxok; asagkók agko' axta chá'a apteméssesakxa m'a ektáha nak apnaqtawáseykegkoho, méko axta eyke élpeykessásekxo apkelwáxok.

²Ékeso éñamakxa sekxéna nak ko'o apkeleñahawo m'a énxet'ák apkeletsapma nak, megkaxnawok ma'a meletsapma nak;

³ekyágwánxa agkok apkeleñahawo m'a mepallakmo nak makham se'e kaxwo nak, hakte melwet'ak makham aqsok ekmaso ekyetna nak keso náxop, megkaxnawok ma'a apkeletsapma nak, tén han ma'a meletsapma nak.

⁴Ekwet'ak axta han ekxámokma nak kéltamheykha, tén han ektaqmalma nak ekteyapma élánamáxche aqsok, wánxa aqsa katekkessesek chá'a m'a apnathe nak pók énxet, cháxa ektáha han aqsok eyaqhémo agwetak xa, máxa m'a negmáheyól'a agmagkok éxchahayam.

⁵Etnehek chá'a énxet'ák se'e: “Énxet ekyeyháxma mopmenyeyk etneykha, aptawásamákpoho apagko' chá'a etnehek.”

⁶Keñe ko'o sektáha s'e: “Tásek óllókasek ketsék negyampé, megkaxnawok ma'a negyampayo nak, eñama negmáheyo agmagkok éxchahayam.”

⁷Keñe axta han sénmexawo mók nekha, sekwet'a han mók aqsok, ektáha nak han aqsok eyaqhémo agwetak keso náxop:

⁸énxet apxakko' nak, meyke nak apteme pók, tén han apketchek, tén han apkelyáxeg, meyke nak apkellókasseyam apyampé yaqwatakxoho, megkaleklágwayam nak elanok aqsok apagkok ekxámokma, meyke nak ektemegwayam élchetamso apwáxok se'e: “¿Yaqsa kexaha ektéma sektamheykencha'a nak ekyentaxno? ¿Yaqsa kexaha ektéma sektaqnagkama m'a ektaqmalma nak negha?” Hakte cháxa ektáha han aqsok eyaqhémo agwetak xa, tén han ektáha xama aqsok segyentaxnéssessamo negha.

⁹Tásek etnehek apqánet énxet, megkaxnawok etnehek apxakko', hakte xámok chá'a katnehek apkelántekkesso apkeltamheykha.

¹⁰Apteyekmek agkok xama, keñe apxegexma exátekhásekxak chá'a. ¡Asagkek eyke katnehek apteyekmo enxoho m'a apxakko' nak, méko kaxátekhásekxa'!

¹¹Aphágkek agkok han apqánet, melpexyenneme'. Apxakkók agkok xa, epexyennók.

¹²Apxakkók agkok énxet kélwanchek kólyaqmaksek, keñe apqánet enxoho askehek yaqwayam kólmenxenek. Ekhawo nak han ma'a táma' kélpextétéyak nak ántánxo, yawanchek kalyetyapok aqsa ekmanyehe agko'.

¹³Tásek agwetak wokma'ák ekha apya'áseykegkoho aqsok neyseksa apteme eykhe meyke aqsok apagkok, apyeykhásseykmoho nak ma'a wesse' apwányam ekyeyháxma megkamopmenyého nak chá'a kólxekmósagkok.

¹⁴Óthok chá'a ko'o nepyeseksa énxet'ák apheykha nak náxop yáhapmakha chá'a m'a wokma'ák nak, cham'a peya nak eyaqmagkasek wesse' apwányam, megkeyxek ma'a apteyapma nak sẽlpextétamakxa, essenhan ma'a aptémakxa axta meyke aqsok apagkok.

¹⁶Apxámok apagko' eykhe chá'a etnehek énxet apkeláneykha aptáha enxoho wesse' apwányam xa wokma'ák nak, melpeykessásekxeyk eyke chá'a apkelwáxok, tén han ma'a aptawán'ák nak. Cháxa ektáha han aqsok eyaqhémo agwetak xa, máxa negmáheyól'a agmagkok éxchahayam.