Read Lengua Sur Eclesiastés 5 Bible Online

Eclesiastés 5 - Lengua Sur bible

Eclesiastés 5

¹Apmeyákxeyk agkok Dios tegma appagkanamap apagkok, elanagkoho yaqwánxa etnehek: ná egkés aqsa aqsok aptósso apchaqhe aptémól'a m'a énxet ekyeyháxma mey'áseyak la'a aqsok ekmaso apkelane, epenchesho sekxók apkeláneykekxa aptáhakxa yaqwayam elyahakxohok Dios.

²Ná epekhés exének elanaksek aqsok Dios, nágkaxén apwáxok elanaksek heykxe aqsok Dios, hakte apheyk Dios ma'a néten, keñe exchep se'e náxop. Ná exámasák appeywa m'a apkepwagkexa enxoho,

³hakte xámok agkok élchetamso apwáxok, katsagkassesek apwanmagko, apxámáseykxeyk agkok han appeywa, exénwók ma'a megkapayhawo nak chá'a antéhek.

⁴Apxénchek agkok elanaksek aqsok Dios, elanés ekmanyehe, hakte etaqnawhok chá'a Dios ma'a énxet ekyeyháxma nak. Elána m'a aqsok apxeyenma nak elána',

⁵hakte tásek mexénhek elának aqsok, megkaxnawok ma'a apxéna enxoho elának aqsok, keñe melanye'.

⁶Nágyoho aqsa kalanaksek mey'assáxma m'a appeywa, keñe exének eyesagko aptáhakxa nápaqto' ma'a Dios apkeláneykha nak. Yaqsa ektáha apkeltamho nak elókasek Dios eñama m'a aqsok apxeyenma exchek xép, tén han yetsagkassásekxak katnehek ma'a ekyókxoho aqsok apkelane nak xép.

⁷Kéméxcheyk xép etnehek apcháyo m'a Dios, neyseksa ekxákma élwanmésso ekmaso énxet'ák, tén han neyseksa élpaqmétamáxche naqsa, cham'a aqsok mékoho nak.

⁸Nágkatlakkas aqsa apwet'a enxoho énxet'ák meyke aqsok apagkok kélnaqtawásegkoho xama apchókxa, tén han megkóltaqmelchessásekxo enxoho chá'a apheykha, essenhan megkóllánésa enxoho chá'a m'a ekpayhawo nak kólteméssesek, hakte énxet ekha nak kéláyo, elanha chá'a m'a aptáha nak kéláyo apagko', keñe apteme nak néten agko' kéláyókxa, elanha chá'a xa apqánet nak.

⁹¿Keya kéltéma nak ekxatakhe apchókxa xa? ¿Keya aptémakxa chá'a wesse' apwányam elanaksek aqsok énxet'ák apkeltamheykha nak yókxexma xa?

¹⁰Énxet étsapma nak apnények selyaqye, emáwhok chá'a exámasagkok; énxet apmopmenyého nak exámasagkok aqsok apagkok, yának chá'a katnahak ántawók ma'a aqsok apagkok nak. Cháxa ektáha han aqsok eyaqhémo agwetak xa,

¹¹hakte xámákxeyk agkok aqsok egagkok, kaxámagkok han chá'a nélmeykha. ¿Yaqsa aqsok hegmések xa? Wánxa aqsa hegmések ma'a nenlányo nak chá'a aqsok egagkok ekyetnakxa nak.

¹²Énxet ekha nak aptamheykha, ketsék eykhe chá'a etwok apto, awanhek essenhan chá'a katnehek, tásek eyke katnehek chá'a apteyenma; keñe m'a énxet ekxámokma nak aqsok apagkok, metyenek chá'a axta'a kaxének apwáxok aqsok apagkok.

¹³Xama aqsok eyke naqsók eyaqhama nak chá'a ko'o ewáxok sekweteya keso náxop: nenxámáséyak aqsok egagkok, katwasha chá'a m'a ektáha nak apagkok,

¹⁴hakte asagkek agkok apkelyánmagkásamap, awanchek kasawhaksek ma'a ekyókxoho nak aqsok apagkok ekxámokma, yetneyk agkok han apketche xama, méko katnehek aqsok apnegkencháseykekxa natámen.

¹⁵Sa' katnehek makham etaqhohok ma'a ektémakxa axta sekxók apteyékmo keso náxop: meyke apáwa, meyke apseykekxa xama aqsok eñama m'a aptekkesso axta aptamheykha.

¹⁶Cháxa naqsók ektáha eyaqhe egwáxok xa: nentaqhémo, ekhawo ektémakxa axta sekxók nenteyékmo keso náxop. ¿Yaqsa aqsok katekkessesek ma'a eyaqhémo nak apchaqhamap aptamheykha keso náxop?

¹⁷Weykmok han apweynchámeykha ekmaso keso náxop, yetlo élya'assóxma, tén han aplegeykegkoho, tén han eklo apwáxok.

¹⁸Wánxa eyke aqsa ko'o sekweteya ektaqmela antók nento, tén han agyenek ma'a negyá nak, tén han hempeykessásekxak egwáxok ma'a nentamheykha nentekkesso, neyseksa negha ekyaqwate keso náxop, ektáha nak Dios segmésso, hakte cháxa ektáha negko'o sempehewayam xa.

¹⁹Dios apkelmésso nak ekxámokma aqsok énxet, egkések nahan chá'a yaqwayam etwok, tén han etnehek apagkok, Dios nahan chá'a keñamak ma'a ekpeykessáseykekxa nak chá'a apwáxok aptamheykha aptekkesso,

²⁰kasextohok nahan chá'a ekyetnakhassamo apwáxok ektémakxa apha keso náxop, hakte Dios chá'a egkések ekyawe agko' ekpayheykekxa apwáxok.