Read Lengua Sur Eclesiastés 7 Bible Online

Eclesiastés 7 - Lengua Sur bible

Eclesiastés 7

¹Ektaqmalma nenxénamaxche yeykhágweykmók ma'a ekwánxa nak ekmátsa ekpaqneyam sokmátsa. Tásek ekhem nétsapmakxa megkaxnawok ma'a ekhem nenteyeykemxa nak.

²Tásek agmahagkok ma'a éllapwámegkaxa nak énxet, eñama apketsapma pók, megkaxnawok agmahagkok ma'a élpayheykxexa nak apkelwáxok énxet; hakte nétsapma ekteme ekweykekxoho apyókxoho énxet, kéméxcheyk chá'a kaxének apkelwáxok ma'a énxet'ák meletsapa nak makham.

³Tásek anlekxagwaha, megkaxnawok ma'a néktegmeykha nak, hẽtsagkassesek eykhe chá'a négát, ektaqmalma egwáxok eyke chá'a henteméssesho'.

⁴Énxet ekha nak apya'áseyak aqsok, kaxénmakha chá'a apwáxok nétsapma, keñe eyke m'a énxet ekyeyháxma nak, wánxa aqsa kaxénmakha apwáxok etegyaha ekpayheykekxa apwáxok.

⁵Tásek hempaqhetchesek ekyennaqte m'a énxet ekha nak apya'áseyak aqsok, megkaxnawok senxéneykha ektaqmela m'a énxet ekyeyháxma nak.

⁶Máxa pa'at élmeyesma éllól'a apkektegmeykha m'a énxet ekyeyháxma nak, cháxa ektáha han aqsok eyaqhémo agwetak xa.

⁷Apyennaqteyáseykpók agkok chá'a énxet apya'áseykegkoho nak aqsok, kayeykesek chá'a exma, tén han apma enxoho selyaqye yaqwayam enxoho mexénhek ektemegweykmohóxma, katwássesha chá'a aptémakxa.

⁸Tásek ampenaksek nenlane aqsok, megkaxnawok ageynekxohok makham nenlane aqsok. Tásek antéhek mampekhésamaxche', megkaxnawok ma'a negyennaqte nak.

⁹Ná etne aqsa ekmanyehe elwok, hakte énxet ekyeyháxma apagkok ma'a nenlo nak.

¹⁰Ná etne aqsa epaqmésmakha s'e: ¿Yaqsa axta ektéma ektaqmalma negheykha m'a nanók axta? Hakte cháxa ektáha nélmaxneyeykha segyeyháxma, nentáha enxoho xa ektáha nak.

¹¹Tásek ma'a ekha nak negya'áseykegkoho aqsok, hempasmok chá'a negko'o negheykha nak keso náxop, negyepetchesa enxoho m'a aqsok ekxámokma nak nenxaweykekxa.

¹²Hentaqmelcheshok chá'a m'a negya'áseykegkoho nak aqsok, hawók ma'a selyaqye nak, yeykhágweykmók eyke m'a negya'áseyak nak aqsok, hakte awanchek kagkések apyennaqte m'a énxet ekha nak apya'áseykegkoho aqsok.

¹³Etaqmelchesho hana apkelányo aqsok apkelane nak Dios: ¿yaqsa awanchek kapékásekxak aptaqhesso nak ma'a?

¹⁴Tásek agkok apha, kapayhekxa apwáxok xa neyseksa nak ektaqmalma apha; asagkek agkok han apha, kaxén apwáxok ektáha éleñama Dios xa ánet aqsok nak, mey'asagkehek eyke chá'a énxet yaqwánxa katnehek ma'a egmonye' nak.

¹⁵Ékeso sekweteya nak chá'a neyseksa sekweynchámeykha s'e, ektáha nak aqsok eyaqhémo agweta': emassegwomhok chá'a m'a énxet'ák élpéwomo nak apkeltémakxa, neyseksa apteme élpéwomo apkeltémakxa, keñe m'a énxet'ák élmasagcha'a nak apkeltémakxa, neyseksa eykhe apkeláneyak apkeltémakxa ekmaso, exmakha chá'a ekwenaqte agko'.

¹⁶Ná etne hó kataqmelek aptémakxa, essenhan hó agya'asagkohok aqsok. Kaqhok xép etwasakpohok apagko'.

¹⁷Ná etne hó ekmaso aptémakxa, essenhan hó segyeyháxma. Kaqhok xép yetsapok megkaw'akxa nak makham apketsapma.

¹⁸Ektaqmelakxoho exchep emagkok ekyennaqte s'e aqsok nak, meyke apyenyeykekxa apméyak ma'a mók aqsok nak. Énxet apteme nak apcháyo Dios, emallánek chá'a xa ekyókxoho aqsok nak.

¹⁹Kagkéshok chá'a apyennaqte negya'áseykegkoho nak aqsok ma'a énxet ekha nak apya'áseyak aqsok, kaxnók ma'a diez apkeltaqmelchesso nak chá'a xama tegma apwányam asextók chá'a katnehek apkelyennaqte.

²⁰Méko xama énxet appéwomo apagko' keso náxop, meyétekkesseyam nak chá'a apkelane aqsok ektaqmela, tén han melane nak mey'assáxma.

²¹Nágyeyxho aqsa m'a ekyókxoho apxénamap nak xép, keñe sa' megyeyxók chá'a m'a ekyókxoho apxéneykha ekmaso nak xép apkeláneykha.

²²Ekhawo nak xép xa, apya'ásegkok, hágkaxwe axta exchep xa exénmakha chá'a ekmaso pók.

²³Ektaqmelchessamók axta ko'o sélányo xa ekyókxoho nak yetlo sekya'áseykegkoho, hakte ekxeyenmeyk axta chá'a ko'o atnehek énxet ekha apya'áseyak aqsok; axta eyke athanyeykekxa'.

²⁴May'ásegweykmok ahagko' ma'a ekyókxoho aqsok élánteyapma nak, askohok agko' nahan agya'asagkoho', méko nahan awanchek kay'ásegwók.

²⁵Ekwasqápeykekxók axta séltémo atnehek ekha sekyekpelchémo, tén han altámesaxchek ektémakxa aqsok, tén han aktamok ma'a éleñémeykxa nak. Ekyekpelchágweykmek axta ko'o ektáha ekmaso antéhek segyeyháxma, tén han antéhek magya'áseyak exma.

²⁶Ekwetayak axta ko'o xama aqsok ektáha ekmáske agko', megkaxnawo m'a nétsapma nak: cham'a kelán'a ekmomól'a egwáxok hentawasha, sempekkeneykhal'a chá'a awáxok hegmok. Énxet ekleklamo nak apwáxok Dios, megyohok sa' kamok apwáxok ma'a, keñe sa' eyke m'a énxet mey'assáxma nak, kamok sa'.

²⁷Ko'o Séltenneykencha'awól'a, élenxáneykmók axta ótekxak ma'a ektémakxa nak chá'a aqsok, keñe sekya'ásegweykmo

²⁸móteyeykekxo makham ma'a sétamsama nak. Xama axta aqsa sekwet'a énxet appéwomo nepyeseksa m'a apxámokma nak, keñe kelán'a ekpéwomo mót'a xama enxoho m'a neyseksa nak ekyókxoho kelán'ák.

²⁹Wánxa axta aqsa sekwetákxo s'e: Dios apteméssessama ekpéwomo aptémakxa énxet, keñe eyke énxet apteméssesamakpo apagko' apsexnánémap.