Read Lengua Sur Cantares 4 Bible Online

Cantares 4 - Lengua Sur bible

Cantares 4

¹¡Tásók agko' nak la'a exche', sekpagkanma, tásók agko'! Máxa apqánet wáx'ay la'a elyagqak aqta'ák ma'a teyp nak eyáhakkasso nát apáwa apkexyawe; máxa yát'ay apketkók apkelnextegeykhal'a néten meteymog élekhahéyak Galaad ma'a áwa' nak.

²Kelmópowók ekyókxoho m'a am'ák máxa m'a nepkések kaxwel'a kélpenchesso kélyaqpassáseyak yegmen, ekpenchásamáxchel'a yaqwayam kólyésesagkok.

³Yexwásawók nahan ma'a átog, máxa m'a yátépépe' kélyexwásessól'a apyexwase apagko', kamok han egwáxok ma'a ekpeywa. Máxa yántakyexna kélpáxqatmal'a neyseksa amáxempenák ma'a teyp nak eyáhakkasso nát apáwa apkexyawe.

⁴Hawók ayespok ma'a tegma apwenaqte aptaqmalma kéllánesso axta m'a David, apkelánamap nak ma'a meteymog kélpáxqatma. Kélmakheyáseykha nahan mil kéláhakkásamáxche m'a, apkeláhakkásamap nak ma'a kempakhakma yapmék.

⁵Máxa ánet xenaq étkók ma'a nam'agkok nak, ánet xenaq étkók ekpalleykmoho ánet la'a, ekteykegkohol'a pa'at ma'a neyseksa pánaqte exnók éltaqmalma.

⁶Xegakmek sa' agkok élseyéxma ekmassa enxoho ekyaqtéssóxma, amyekxak sa' ma'a néten egkexe ekyetnamakxa nak yámet ánek ekmátsa ekpaqneyam, egkexe ekyetnamakxa nak aqsok ekmátsa ekpaqneyam éten agkok.

⁷¡Tásók agkók xe', sekpagkanma; tásek ekyókxoho ekyókxa! ¡Méko exche' xama enxoho eyesagkexa émpehek!

⁸Sekpagkanma, hétlanta', ólántépok se'e Líbano nak. Kanmexentámho m'a xóp ekyapwate neyseksa énmeykha m'a étseksek egkexe nak Amaná, tén han ma'a étseksek nak ma'a Senir tén han ma'a Hermón, tén han ma'a yámakméwa axanák nak, tén han ma'a egkexe apkelyáqtamakxa nak neptána.

⁹Meyk xeye' ewáxok, eyáxeg, sekpagkanma; xama sélányo eykhe entáhak ekma ewáxok, xama sélányo eykhe ektáhak ma'a eknatanma nak, ekma ewáxok.

¹⁰¡Atsek chá'a exche' héláxñesha, eyáxeg, sekpagkanma! ¡Atsek agko' chá'a héláxñesha, yeykhágweykmók ma'a ekweykenxal'a ekmátsa m'a vino, Atsók agko' nahan ekpaqneyam ma'a sokmátsa agkok, yeykhágweykmók ma'a ekyókxoho aqsok élmátsa nak élpaqneyam!

¹¹Sekpagkanma, elpexyewenták chá'a yányawhéna' apyegmenek ma'a átog. ¡Yányawhéna' apyegmenek yetnók ma'a kóneg axkok nak tén han weyke nagkeygmenek! ¡Máxa yókxexma Líbano ekpaqneyam ekmátsal'a apkelpaqneyam ma'a élántaxno nak!

¹²Eyáxeg, sekpagkanma, xeye' ekteme pánaqte exnók kélcheneykekxa kélhaxtegkesso, ekteyapmakxa yegmen kélhaxtegkesso, ekyetnamakxa yegmen ektaqmela kélápeykekxa';

¹³namyep étkok ekteyapmakxal'a m'a yántakyexna ekmátsa nak ekyexna; élámhakxa nak ma'a pánaqte exnók élmope élmátsa agko' nak élpaqneyam,

¹⁴tén han ma'a pánaqte exnók élmope élmátsa nak élpaqneyam tén han ma'a pánaqte exnók ekwesey nak Azafrán, yámpa'at ekmátsa nak ekpaqneyam, tén han ma'a yámet canela ekmátsal'a ekpaqneyam, tén han ma'a ekyókxoho mók ektémakxa nak chá'a yenta'a élyawe élmátsa nak élpaqneyam éten agkok, tén han ma'a yámet ekmátsa nak ekpaqneyam ánek, tén han ma'a hó kentem; ¡ekyókxoho yámet élmátsa nak élpaqneyam!

¹⁵Xeye' ekteme ekteyapmakxa yegmen ma'a neyseksa pánaqte exnók kélcheneykekxa nak, xama máxek élpexyaweykento nak yegmen ényé eñama m'a egkexe nak Líbano.

¹⁶Excheyha, ¡Kaxatakha'! Yeyam, ¡Emyenta s'e! ¡Kólwátekhapwata séneykekxexa pánaqte exnók, kólampés ekpaqneyam ekmátsa! Sekpagkanma, emyenta' apkeneykekxexa pánaqte exnók apagkok, etáswata ekyexna ekmátsa agko' nak.