Read Lengua Sur Cantares 7 Bible Online

Cantares 7 - Lengua Sur bible

Cantares 7

¹¡Wesse' apwányam apketche! ¡Taxnawo nak la'a élatchesa amagkok ma'a éltéto amagkok! Hawók náxet ma'a ektémól'a kélnatanma sawo ekyátekto ekmomnáwa agko', apkelanél'a m'a xama énxet apmopwána nak elának aqsok.

²Hawók ataxna' m'a egheykok ekyaqyamól'a magyamáyól'a keytek awáxok kélyeta m'a vino ektaqmalma; hawók awokmo' m'a hótáhap apaktek kéláncheseykekxal'a, kélwakhassól'a m'a pánaqte exnók.

³Máxa ánet xenaq étkók ma'a nam'agkok nak, ánet xenaq étkók ekpalleykmoho ánet la'a.

⁴Hawók ayespok ma'a tegma apwenaqte apmope apkelánamap la'a yánnapóxeg apma'ák; keñe aqta'ák ekhawo m'a ánet yámelchet ekheykegko nak ma'a tegma apwányam Hesbón, nekha nak ma'a átog nak Bat-rabim; hawók awéhek ma'a tegma apwenaqte nak Líbano ekpayhémo nak ma'a tegma apwányam Damasco.

⁵Máxa nahan egkexe Carmelo ekyetnama néten ekyókxa m'a akqátek nak; Máxa nahan yátépépe' hómáyok la'a m'a áwa' nak, ¡momchek apwáxok wesse' apwányam xa áwa' éltaqhe nak!

⁶Sekpagkanma, kelán'a ekleklamo nak chá'a ewáxok alano'. ¡Tásók agko' nak la'a exche', ektaqmelakxoho agko' nak la'a!

⁷Hawók katnamha m'a aptémól'a etnamok ma'a yátapa'ag; keñe nam'agkok aphawo m'a aptémól'a elmakheykha m'a apyexna appasmagamap.

⁸Xénchek ko'o ewáxok wántek ma'a yátapa'ag tén han anakxek ma'a apyexna ekpasmagamaxche nak. Katnehek sa' nam'agkok ma'a ektémól'a anmen yámet ekyexna ekpasmagamaxchel'a mók; tén sa' énnama katnehek ma'a ektémól'a manzana ekpaqneyam ekmátsa;

⁹keñe sa' átog, kaxhok ma'a ektémól'a vino ektaqmalma élpexyaweykental'a chá'a ekmátsa m'a átog nak tén han ma'a am'ák nak.

¹⁰Ko'o sekpagkanma m'a: hey'ótak chá'a eñama semámenyého.

¹¹¡Nók sekpagkanma, ólweynchamha yókxexma! Sa' annaqtének axta'a m'a neyseksa nak yámet exnók élmope, ekmátsa agko' nak ekpaqneyam.

¹²Keñe sa' axto'ók ólmeyekxak ma'a émhakxa nak anmen yámet, anlanok yetneyk kexa éltekteyapma, kelmayheykxeyk kexa nahan axanák ma'a exnók nak, kelyapwágkek kexa nahan ma'a yántakyexna. ¡Sa' agkések ekyókxoho ektémakxa seyásekhayo exchep ma'a sekpagkanma!

¹³Kempássek ekpaqneyam ma'a pánaqte élmeykencha'awól'a kelán'a kaltamhok kótak étche. Hágkek ekyókxoho mók ektémakxa aqsok ekyexna m'a átog egagkok nak: cham'a yámet ekyexna élyamaye nak tén han ma'a yámet ekyexna kaxwe nak kélnakxo, séltaqmelchessesso axta exchep, sekpagkanma.