Read Lengua Sur Isaías 15 Bible Online

Isaías 15 - Lengua Sur bible

Isaías 15

¹Moab ekxénamaxche yaqwánxa kólteméssesek. Kéltawáseyha axta Moab cham'a axta'a kélmasséssekmo axta m'a Ar; kéltawáseyha axta Moab cham'a axta'a kélmasséssekmo axta tegma apwányam Quir.

²Apkelmeyákxeyk axta énxet'ák Dibón peya ellekxagwaha m'a tegma kélpeykessamókxa axta chá'a mók ektémakxa aqsok kéláyókxa m'a néten egkexe nak. Kellapwámegkek axta énxet'ák Moab kélmasséssekmo m'a tegma apwányam Nebo tén han ma'a Medebá. Apkelmópesawók axta chá'a apkelyese apyókxoho, apkelyéseságkek axta nahan chá'a áwa' apatña'ák.

³Apyókxoho énxet axta nahan chá'a apkelxegak ámay apkelántaxneykekxa m'a apáwa magkenatchesso nak senlapwayam; kelpayheyha axta chá'a apatña'ák apkellekxagweyncha'a m'a néten apxanák nak. Apyókxoho énxet axta nahan kellapwámegkok ma'a apkelweynchámeykegkaxa nak chá'a énxet, apkellekxagweyha axta chá'a.

⁴Apkelpáxamáha axta nahan ekyennaqte agko' aptegyágko ekpasmo m'a énxet'ák Hesbón tén han ma'a Elalé; wokmók axta eklegamaxkoho apkelpáxameykha m'a Jahas. Axta keñamak apkeleygwokmo m'a kempakhakma yapmeyk nak Moab, apkelyegwakkók apagko' axta.

⁵Chaqhak axta ko'o ewáxok sélano m'a Moab; apkelántekkek axta énxet'ák apheykha m'a kañe' apkenyahágko ekweykekxoho m'a Sóar, ekweykekxoho m'a Eglat-selisiya. Apkellekxagweygkokxeyk axta apkelxega m'a ekmeyeykekxa nak néten xóp ma'a Luhit; apkelpáxamáha axta ekyennaqte agko' éllapwámegko peya káhapwak aqsok ekmaso m'a ámay nak Horonaim.

⁶Kelyameygkek axta yámelchet ma'a Nimrim, kelyameygkek axta m'a pa'at, ketsekkek axta áwa' m'a yámet, méko axta xama enxoho eyeymomáxche m'a élyápaqmátamo nak áwa'.

⁷Axta keñamak apkelmeykekxo aqsok apagkok ekxámokma m'a énxet'ák, apkelseykekxeyk axta m'a teyp nak yegmen ényé, éltamhomaxchexa nak élámhakxa yámet Álamos.

⁸Weynchámeykha axta aqsa apkelpáxameykha énxet aptegyeykha ekpasmo m'a néxa xapop nak Moab; weykmók axta kéllekxagweykha m'a Eglaim tén han ma'a Beer-elim.

⁹Sawheykekxók eykhe éma m'a yegmen nak Dimón, wáphaksek sa' eyke aqsa ko'o m'a aqsok élmasagcha'a agko' nak; yámakméwa sa' chá'a katwok ma'a apkelmallane nak kañe' Moab, meletsapma nak makham ma'a apkelókxa.