Read Lengua Sur Isaías 17 Bible Online

Isaías 17 - Lengua Sur bible

Isaías 17

¹Tegma apwányam Damasco apxénamáp yaqwánxa kólteméssesek. Kamaskok sa' etnehek tegma apwányam ma'a Damasco; meteymog ektaháneykekxa mók sa' etnekxa'.

²Etaqmopagkohok apagko' sa', pa'at émhakxa sa' katnekxa'; katawagkok sa' pa'at kélnaqtósso meyke kélmenxeneykha m'a.

³Méko sa' etnehek tegma apwányam apyennaqte apagkok ma'a Efraín, cham'a, eyaqheykencha'a nak chá'a apkelwáxok ma'a énxet'ák Israel; sa' katnehek nahan ma'a Damasco, kamaskok sa' katnehek apchókxa m'a éleymomáxche nak ma'a kañe' Siria. Wesse' egegkok ekha nak apyennaqte apxeyenma xa.

⁴Kamaskok sa' ekyennaqte Samaria xa ekhem nak, eyaqheykencha'a nak chá'a apkelwáxok ma'a Jacob énxet'ák apagkok, kamassegwók sa' ma'a ektémakxa nak ektaqmalma apheykha énxet ma'a kañe'.

⁵Sa' katnehek ma'a aptémól'a xama énxet apnakxól'a hótáhap apaktek apyekhámeykekxal'a m'a apyexna, essenhan ma'a ektémól'a kólmekxak hótáhap apaktek kélyaqtónma m'a ekyapwátegweykenxa nak xapop ma'a Refaim,

⁶apkeleymomap la'a aqsa wánxa m'a kéláyam nak; essenhan ma'a ektémól'a kólyeykesek aktegák ma'a olivo yámet éleymomáxchel'a aqsa wánxa ánet essenhan ántánxo ekyexna m'a naw'ék nak, essenhan cuatro tén han cinco ekyexna chá'a m'a ekyókxoho awhók nak. Wesse' egegkok apxeyenma xa, Israel Dios apagkok nak.

⁷Elenmexekxohok sa' aphakxa ektáha nak apkelane énxet'ák xa ekhem nak, cham'a Dios Appagkanamap nak ma'a Israel.

⁸Kamaskok sa' elenmexekxohok ekheykegkaxa m'a meteymog apkelwatnamakxa nak chá'a aqsok tén han ma'a mók aqsok apkelane apagko' nak chá'a m'a énxet. Melanók sa' chá'a kaxwók ma'a yámet awhók élpagkanamaxche apkelpeykessamo nak chá'a, tén han ma'a meteymog kélwatnéssamakxa nak chá'a aqsok ekmátsa nak ekpaqneyam éten agkok ma'a aqsok kéláyókxa.

⁹Eltaqmopagkok sa' tegma apkelyawe apkelyennaqte apagkok xa ekhem nak, ektéma axta apkeltaqmópeykegko tegma apkelyawe apagkok ma'a heveos tén han ma'a amorreos eñama apkelaye m'a israelitas. Yókxexma meyke xama aqsok sa' katnekxa', ekyamayéxma,

¹⁰hakte kelwagqámeykegkek ma'a Dios ektáha axta apkelwagkasso teyp, megkaxeyenmak kélwáxok apteme axta apkelmasma apyennaqte m'a. Kélchekhamchek kéxegke s'e namyep étkók éltaqmalma nak, kélchencháseykekxeyk pánaqte exnók ma'a aqsok kéláyókxa éleñama nak mók nekha,

¹¹kéltaqmelchessegkek axta m'a sekxók axta kélcheneykekxo, keñe mók ekhem ekteyapma m'a aqsok aktek kélcheneykekxa. Wa'ak sa' agkok ekmaso m'a aqsok kélcheneykekxa nak megkamowánal'a kaltektépekxa', kasók sa' ma'a aqsok kélcheneykekxa.

¹²¡Kóleyxho apkextegyawasso yókxexma m'a énxet apxámokma, máxa m'a ektémól'a wátsam ekwányam kapáwak awáxok! Pók aptémakxa énxet'ák apkelpáxameykha ekyennaqte m'a ektémól'a kapáwak awáxok ekyennaqte m'a yegmen.

¹³Xama axta apkelpaqhetchesa ekyennaqte agko' ma'a Dios, makhawók axta apkelmahágkok apkelyexanma, axta aptamhágkok ma'a ektémól'a pa'at kalsók éxchahayam ma'a yókxexma, ektémól'a am'ák kalpexyawasagkok náxop kalsók ma'a éxchahayam ekyennaqte agko'.

¹⁴Hegyegwakkasek ma'a taxnám, keñe amonye' élseye kamaskok agweta'. Cháxa yaqwánxa sa' katnehek ma'a énxet'ák apmáheyo nak chá'a hẽlyementók aqsok egagkok. Cháxa yaqwánxa sa' katnehek elmassegwók ma'a énxet'ák, apmáheyo nak chá'a hentawássesha negheykha.