Read Lengua Sur Isaías 19 Bible Online

Isaías 19 - Lengua Sur bible

Isaías 19

¹Egipto ekxénamaxche yaqwánxa kólteméssesek. Kóllano Wesse' egegkok: Apxegakmek néten yaphope ekyennaqte ekxega apmeyókmo m'a Egipto. Kelpexyennegkek apmonye' m'a aqsok kéláyókxa nak Egipto, apkelakawók apagko' ma'a egipcios.

²“Wának sa' ko'o yexpánchesakpok ma'a egipcios —axta aptáhak Wesse' egegkok—, wának sa' elnapakpekxak chá'a pók, elnapakpekxak sa' chá'a apnámakkok apagko', keñe sa' xama tegma apwányam elnapakpekxak nahan chá'a m'a pók tegma apwányam nak, keñe sa' xama apchókxa elnapakpekxak nahan chá'a m'a mók apchókxa nak.

³Malya'ássesagkek sa' ko'o exma m'a, wának sa' kamassegwók ma'a aqsok apmáheyo nak elanagkok. Keñe sa' elpaqhetchesakpohok ma'a aqsok apkeláyókxa nak tén han ma'a apkelyohóxma, tén han ma'a énxet'ák apkeletsapma axta apkelhagák tén han ma'a apkelya'áseykegkoho nak chá'a aqsok ekpowásamáxche'.

⁴Agkések sa' ko'o yaqwayam etnehek wesse' Egipto m'a xama wesse' aplo; xama wesse' apwányam megkamayósa elanok aqsok sa' etnehek wesse'.” Wesse' ekha nak apyennaqte apxeyenma xa.

⁵Keymék sa' yegmen ma'a wátsam Nilo, keymáwhok agko' sa' ma'a wátsam nak,

⁶kaltahápok sa' ma'a élyapwate yegmen atamnek nak. Kataqmelchesagkohok sa' kaweywenták yegmen ényé nak Egipto ekwokmoho ekyamaka, kalyameygkok sa' ma'a qamok tén han ma'a ekho'.

⁷Kalyameygkok sa' ekho' élámha nak nekhaw'ék ma'a Nilo tén han ma'a ekyókxoho aqsok kélcheneykekxa nak ma'a neyáwa', kamassegwók sa'.

⁸Kalxegha sa' apnenya'ák apyókxoho aptegyéyak nak chá'a kelasma m'a neyáwa Nilo, ellekxagwaha sa' nahan; kallapwomagkok sa' ma'a apkexakha nak chá'a yám'én apagkok ma'a neygmen.

⁹Elháxexchágwók sa' ma'a apkelpexyawáseyak nak chá'a yámet lino áhak; kalmópekxak sa' nápaqta'a apkelyegwakto m'a apkeláxñáseykekxa nak chá'a tén han ma'a apkelótéyak nak chá'a;

¹⁰elyelqakpok sa' ma'a apkelánéyak nak chá'a apáwa napwe'ék, melya'asagkek sa' aptamhágkaxa apyókxoho m'a apkelánéyak nak chá'a aqsok.

¹¹¡Élyeyháxma nak la'a kéxegke, kelwesse'e nak Soan, kélmeyáseyák nak chá'a kélpeywa m'a énxet'ák, kélmowancha'a agko' nak aqsok ma'a Egipto, naqsók kéxegke kélpékessáseyak kélnámakkok élyeyháxma! ¿Háxko katnehek kóltéhek kólának faraón se'e: “Negko'o nenteme énxet'ák apmopwancha'a aqsok aptawán'ák neptámen, cham'a nanók kelwesse'e apkelwányam axta?”

¹²Faraón. ¿Háxko aphágkaxa m'a énxet'ák apagkok, apmopwancha'a nak aqsok yaqwayam sa' elxekmósek tén han eltennaksek yaqwánxa nak etnéssesek Wesse' ekha nak apyennaqte m'a Egipto?

¹³Élyeyháxma m'a kelwesse'e nak Soan kélyexancháseykha nahan chá'a m'a kelwesse'e nak Menfis, kélnaqleykekxeyk Egipto megkatnahakxa ámay ma'a kelwesse'e nak chá'a xama apheykegkaxa.

¹⁴Melya'áseyak aqsok apteméssessók Wesse' egegkok ma'a; cháxa apkelyetnakhássesseykmo nak chá'a ekyókxoho aqsok apkelánéyak ma'a énxet'ák Egipto, ektémól'a m'a anmen áto' apyekxéyak la'a tén han apkelyawheykhal'a.

¹⁵Méko awanchek kalának aqsok ma'a Egipto, cham'a apqátek nak tén han ma'a épakyek nak, essenhan ma'a áxa nak tén han ma'a ekho' nak.

¹⁶Máxa kelán'a sa' etnahagkok egipcios xa ekhem nak; metwasha sa' yeyk apkelwet'a enxoho emáwhok ellegássesagkohok ma'a Wesse' ekha nak apyennaqte, elyegwáwhok apagko' sa' nahan.

¹⁷Elpexyennók sa' egipcios apmonye'e m'a énxet'ák Judá; apkelwesey sa' eykhe aqsa chá'a kalxének apkelwáxok, elyegweyk sa' aqsa chá'a eñama m'a apmáheyókxa axta etnéssesek Wesse' ekha nak apyennaqte m'a Egipto.

¹⁸Exnagkok sa' cinco tegma apkelyawe Egipto xa ekhem nak, yaqwayam sa' elpaqmétek ma'a hebreo appeywa, tén han etnéssesek naqsók melyenseyam apkelyetlo m'a Wesse' ekha nak apyennaqte. Tegma Apwányam Ekhem sa' nahan etnehek apwesey xama m'a.

¹⁹Keytek sa' xama ekwatnamáxchexa aqsok kéllánésso Wesse' egegkok kañe' Egipto xa ekhem nak, keñe sa' ma'a néxa xapop apagkok nak, kólchenegkesek xama meteymog ekxénweykekxoho chá'a kélwáxok ma'a Wesse' egegkok.

²⁰Katnehek sa' aqsok magkenatchesso, yaqwayam sa' kaxénwakxohok chá'a kélwáxok Wesse' ekha nak apyennaqte m'a apchókxa Egipto. Apkelwóneyha sa' agkok chá'a Wesse' egegkok yának epasmok eñama apkelápagqánamap ma'a ektáha nak chá'a apnaqtawáseykegkoho, yáphássesek sa' chá'a xama appasmo, yaqwayam sa' elmeyók chá'a tén han elwagkasek chá'a teyp.

²¹Eltennasakpok sa' Wesse' egegkok ma'a egipcios, keñe sa' elya'asagkohok Wesse' egegkok ma'a, elpeykeshok sa', elmések sa' nahan aqsok apkelnapma tén han ma'a aqsok apkelmésso naqsa. Eltennaksek sa' nahan aqsok apmáheyo elanagkok ma'a Wesse' egegkok, elanagkok sa' nahan.

²²Ellegássesagkohok sa' Wesse' egegkok ma'a énxet'ák Egipto, keñe sa' natámen eltaqmelchásekxak makham. Elyo'ókxak sa' makham Wesse' egegkok ma'a, keñe sa' elásekhekxohok makham, eltaqmelchessók sa' nahan.

²³Keytek sa' xama ámay ekyawe agko' xa ekhem nak eñama m'a Egipto ekweykekxoho m'a Asiria. Apwanchek sa' elwakxak chá'a énxet'ák Asiria ekweykekxoho m'a Egipto, keñe sa' egipcios ekweykekxoho m'a Asiria, elpeykeshok sa' nahan chá'a Wesse' egegkok xamók egipcios ma'a asirios.

²⁴Épetchekxak sa' énxet'ák Israel énxet'ák Egipto xa ekhem nak tén han ma'a énxet'ák Asiria, sa' kagkések ektaqmalma apheykha énxet'ák keso náxop.

²⁵Sa' etnehek epaqmétek yának kataqmelek apheykha Wesse' ekha nak apyennaqte s'e: “Ekméssek ko'o ektaqmalma apheykha m'a énxet'ák ahagkok Egipto, tén han ma'a énxet'ák Asiria, ektáha axta sélane, tén han ma'a Israel sekteme nak énxet'ák ahagkok ahagko'.”