Read Lengua Sur Isaías 2 Bible Online

Isaías 2 - Lengua Sur bible

Isaías 2

¹Keso amya'a apxawe axta eñama kélxekmósso m'a Isaías, cham'a Amós apketche nak, ekxénamaxche nak ma'a Judá tén han ma'a Jerusalén:

²Kólteméssesek sa' egkexe meyke ekhémo apyetnamakxa nak Wesse' egegkok tegma appagkanamap apagkok, cham'a amonye' sa' ektemegwánxa néxa ekhem. Katnehek sa' egkexe netnók agko', kalyeykhagkok sa' ma'a ekyókxoho egkexe nak. Apyókxoho pók aptémakxa énxet'ák sa' elmeyógmak ma'a;

³énxet apxámokma apagko' sa' elwa', sa' etnehek apkelpeywa s'e: “Kólchempoho, ólchántek Wesse' egegkok egkexe apagkok, tegma appagkanamap apagkok nak ma'a Jacob Dios apagkok, yaqwayam sa' hẽlxekmósek ma'a ámay apagkok, keñe sa' agkegwának ólyetlók ma'a apkeltamhókxa enxoho chá'a ólyetlók.” Hakte Sión sa' katyapok ma'a nélxekmowásamáxche apagkok nak Wesse' egegkok, Jerusalén sa' kañék ma'a appeywa nak.

⁴Etnehek sa' apkelyekpelchémo Wesse' egegkok nepyeseksa m'a pók aptémakxa nak chá'a énxet'ák, elánekxések sa' nahan chá'a ektémakxa apkelenmexamap ma'a apxámokma énxet'ák. Xóp élpeyncheyam sa' etnéssásekxak ma'a sawo élwenaqte apagkok nak, keñe sa' sawhéwa apagkok etnessásekxak ma'a sawo élhaxe. Melnapakpekxék sa' nahan chá'a kaxwók pók ma'a énxet'ák, megkólxekmósek sa' nahan chá'a kaxwo' yaqwayam yempakha'.

⁵¡Nók, Jacob énxet'ák apagkok, ólxog éltátchesakxa nak Wesse' egegkok élseyéxma apagkok!

⁶Wesse', apkexakhamchek xép énxet'ák apagkok, cham'a Jacob énxet'ák apagkok nak; hakte apxámok apagko' apchókxa m'a énxet'ák ekha nak apmopwancha'a, apkeleñama nak ma'a teyapmakxa ekhem, cham'a apkelyohóxma ektéma nak nepyeseksa m'a énxet'ák filisteos, apkelpasmomákpók nahan chá'a m'a énxet'ák megkatnaha nak apchókxa xamo'.

⁷Sawheykekxók sawo ekyátekto élmomnáwa m'a apchókxa nak tén han ma'a sawo ekmope élmomnáwa nak, xámók agko' nahan ma'a aqsok élmomnáwa nak; apsawheykekxók nahan yátnáxeg ma'a apchókxa, xámók agko' nahan ma'a yátnáxeg apkelyenyawasso kélanchesso nak kempakhakma.

⁸¡Sawheykekxók eyke nahan aqsok kéleykmássesso m'a apchókxa! Apkelpeykessamók énxet'ák ma'a aqsok apcháyókxa apkelánéyák apagko' nak, eñama nak apmék apkelánéyák.

⁹Apkelmegqásamákpekxoho apagko' aptamheykegkok, apnaqtawásamakpekxoho apagko' aptamheykegkok. ¡Ná elásekhekxoho!

¹⁰Elántexek sa' kañe' meteymog áxwa m'a énxet'ák, cham'a kóneg xapop nak; elyexanmok sa' apmonye' m'a Wesse' egegkok negáyo nak, tén han apcheymákpoho eyeymáxkoho nak ma'a Wesse'.

¹¹Elháxahagkok sa' yetlo apkelmegqakto m'a énxet'ák apkeleymákpoho nak; kólmasséssesek sa' nahan apkeleymákpoho m'a apkene nak etnahágkok ekha kéláyo. Wesse' egegkok sa' aqsa exekmósek apteme apwányam apagko' xa ekhem nak,

¹²cham'a ekhem apkelana sa' aqsok Wesse' ekha nak apyennaqte, yenmexek apyókxoho m'a énxet'ák apkeleymákpoho nak, tén han ma'a apyókxoho éleymáxkoho nak apkelwáxok, tén han ma'a apkene nak etnahágkok ekha kéláyo, yaqwayam etnessásekxak kóneg;

¹³tén han apyókxoho apkene nak exnawok ma'a yámet élyawe cedros élámha nak Líbano, élwenaqtél'a tén han netna'awo', essenhan ma'a yámet robles élyennaqte élámha nak ma'a yókxexma Basán;

¹⁴tén han apyókxoho m'a apkene nak exnawok ma'a egkexe netna'awo', essenhan ma'a xóp élekhahéyak netna'awo nak,

¹⁵tén han apyókxoho m'a apkene nak exnawok ma'a tegma apwenaqte netno', essenhan ma'a kélhaxta nak nepyáwa tegma ekyennaqte,

¹⁶tén han apyókxoho m'a apkene nak exnawok ma'a yántakpayhe élyawe éleñama nak Tarsis essenhan ma'a yántakpayhe éltaqmalma nak.

¹⁷Kónegók sa' kóltemessásekxak ma'a apyókxoho apkeleymákpoho nak tén han ma'a apkene nak chá'a etnahágkok ekha kéláyo. Wesse' egegkok sa' aqsa exekmósek apteme apwányam apagko' xa ekhem nak.

¹⁸Emasséssók sa' ekyókxoho m'a aqsok kéleykmássesso.

¹⁹Apkempákxeyk sa' agkok néten Wesse' egegkok, apsawheyáseykxoho sa' apyawheyáseykha m'a xapop, elántexek sa' énxet'ák ma'a meteymog áxwa, cham'a kañe' xapop nak; elyexanmok sa' apmonye' m'a Wesse' egegkok negáyo nak, elyexanmok sa' amonye' m'a Wesse' apcheymákpoho.

²⁰Ekxakkasek sa' aqsok kéleykmássesso apagkok énxet'ák pomo'o tén han mépop xa ekhem nak, cham'a kéleykmássesso sawo ekyátekto élmomnáwa tén han ma'a sawo ekmope élmomnáwa nak apkelánéyák apancha'awók axta chá'a yaqwayam elpeykesho',

²¹elántexek sa' ma'a kañe' meteymog áxwa, cham'a meteymog élyawe nak áxwa, yaqwayam elyexanmok apmonye' m'a Wesse' egegkok negáyo nak, elyexanmok sa' amonye' m'a Wesse' apcheymákpoho, cham'a apkempákxo sa' néten tén han apsawheyásekxoho sa' apyawheyáseykha m'a xapop.

²²Kólwátésák kélteme kéláyo énxet, apteme nak mékoho, yaqwatakxoho negwete m'a ektémakxa nak apyennaqte énxet, ñohók kamaskok.