Read Lengua Sur Isaías 21 Bible Online

Isaías 21 - Lengua Sur bible

Isaías 21

¹Yókxexma meykexa énxet ekxénamaxche' yaqwánxa katnehek, ekyetno nak neyáwa wátsam ekwányam: Máxa éxchahayam ekyennaqte ekxegayam la'a nepyeyam entáhak ekxegakmo aqsok ekmaso agko' ma'a yókxexma meykexa nak énxet.

²Asagkók agko' ma'a aqsok sexekmósso nak ma'a Dios: Appelakkassessek chá'a apsexnáneya pók ma'a énxet apsexnenagkamo nak chá'a pók, apmasséssekmek aqsok ma'a apmassesseykmoho nak chá'a aqsok. ¡Kólchempekxa néten, énxet'ák Elam! ¡Énxet'ák Media, kólchetamák! ¡Maltamhók ko'o kaxwo' kólpaqmésmakha eñama kéllegeykegkoho!

³Élpexyennegkessek ko'o sekwet'a, éttelegwáseyha ekmáske, máxa ektáhak ma'a ektémól'a kelán'a káskok awáxok kamáwhok katnehek naqláwa, meheñásak ektemegweykmohóxma m'a seklegeykegkoho ekyentaxnamo ewáxok, mehéteyásak aqsok ma'a sekyegwakto.

⁴Meyke sekya'áséyak aqsok etnéssásak, élpexyennegkessek seyeye. Aqsok ekmaso agko' tamhákxak ma'a taxnám ekmáxaqxo axta chá'a exma, ekpeykeseykekxoho axta chá'a ewáxok eñama ekmáxaqxóxma.

⁵Penchásexcheyk kélnegkenéyak aqsok ma'a néten mésa, kélpeykeságkek náxop ma'a apáwa kélpeykessamól'a chá'a náxop, cheynawók kaxwók ektámaxche ekyawe. ¡Sẽlpextétamo apkelwesse'e, kólchempekxa néten: kólyenmásekxa kéláhakkásamáxche'!

⁶Hakte aptáhak ko'o seyáneya Wesse' egegkok se'e: “Exeg, epekken sa' xama énxet apkelhaxneykha yaqwayam sa' eltennaksek chá'a ekyókxoho m'a apwet'a enxoho chá'a aqsok.

⁷Apwet'ak sa' agkok yátnáxeg apkelyenyawasso éléweykekxa élxegayam, essenhan énxet yámelyeheykok apkelchánte essenhan yányátnáxeg, etaqmelchásekxohok sa' apkeláneykmoho.”

⁸Tén axta aptáha apyennaqtésa appeywa énxet apkelhaxneykha s'e: “Wesse', yókxoho ekhem ko'o sénmeykha s'e sénmeykegkaxa nak, yókxoho axta'a sélhaxneykha.

⁹Ekwet'ak ko'o ekxegakmo xama yátnáxeg apyenyawasso apqánet yátnáxeg kélnaqtehetchesso.” Tén axta aptáha xama énxet se'e: “¡Apteyekmek, Babilonia, apteyekme'! Nekha'a étkók kéltemessásekxak kélyaqnegkessásegko náxop ma'a ekyókxoho kéleykmássesso apagkok apcháyókxa nak chá'a.”

¹⁰Énxet'ák ahagkok, kélteyammeykha nak ektémól'a m'a hótáhap apaktek kélteyammeykha, éltennássek ko'o m'a seklege nak eñama Wesse' ekha apyennaqte, cham'a Israel Dios apagkok nak.

¹¹Edom ekxénamaxche yaqwánxa kólteméssesek: Xama énxet axta ewóneyha m'a ekpayho nak Seír. Aptáhak axta s'e: “Apkelhaxneykha, ¿yaqsa hóra kaxwók se'e axta'a nak? ¿yaqsa hóra kaxwo'?”

¹²Tén axta énxet apkelhaxneykha aptáha apchátegmowágkokxo s'e: “Chágketchek kalse', xegakmek eyke nahan ma'a axta'a. Kélmakók sa' agkok makham hélmaxneyha hélmaxnegwata sa', hélyo'óta sa' makham.”

¹³Yókxexma ekyamayéxma ekxénamaxche yaqwánxa kólteméssesek: Énxet'ák Dedán kéltekxeyéyak nak chá'a kélmók kélxega, kélnaqteyenma nak chá'a axta'a m'a ekmompagqexa nak ma'a yókxexma meykexa énxet,

¹⁴kóllanyexák élnapma nak ekhem, kólsókas yegmen. Énxet'ák kélheykha nak apchókxa Temá, kólántép apmonye'e m'a apkelxegányam nak apkenyehéyak, kólmésák aptéyak.

¹⁵Hakte apkenyahágkek apmonye'e m'a apkelmeykha nak sókwenaqte, sókwenaqte élmahamta nak, tén han ma'a yágke ketók kélyáteykxa nak tén han ma'a kempakhakma ekmaso agko' nak.

¹⁶Aptáhak seyáneya Wesse' egegkok se'e: “Wokmek sa' agkok xama apyeyam kamassegwók sa' ektémakxa nak eyeymáxkoho m'a Quedar, ektémól'a m'a énxet kélyánmagkassól'a aptamheykha kammok néxa apxawe aptamheykha.

¹⁷Ántawók agko' sa' nahan kaleymaxchek yágke apagkok ma'a kempakhakma yapmeyk nak Quedar.” Israel Dios Wesse' apagkok apxeyenma xa.