Read Lengua Sur Isaías 24 Bible Online

Isaías 24 - Lengua Sur bible

Isaías 24

¹Kóllano, esawhohok sa' aqsok Wesse' egegkok keso náxop, yetsagkasek sa', ekmaso sa' etnessásekxa', yexpánchesek sa' énxet'ák apheykha m'a kañe'.

²Kaxhok sa' nahan ektáhakxa énxet'ák ma'a apkelmaxnéssesso nak Dios énxet'ák apagkok, cham'a wesse' nak, tén han ma'a kélásenneykha naqsa nak, cham'a wesse' kelwána nak tén han ma'a kélásenneykha naqsa kelwána nak, cham'a apkelmá nak chá'a aqsok tén han ma'a apkexeykekxa nak chá'a aqsok, cham'a apmassáseykha nak chá'a aqsok apagkok tén han ma'a apxawe nak chá'a aqsok kélmassáseykha, cham'a ekha nak chá'a apméyak aqsok tén han ma'a apkeltémo nak chá'a kólyánmagkasek kélméyák.

³Kasagkohok agko' sa' xapop, kasawhaxkohok agko' sa' aqsok meyke eyeymomáxche', hakte cháxa aptáhakxa axta appeywa m'a Wesse' egegkok.

⁴Yamakak xapop, kesagkeyk nahan, yamakaxma ekyókxoho keso nélwanmégkaxa, kelyameygkek aqsok yókxexma, yaqhapchexma m'a néten tén han keso náxop.

⁵Kéltawáseyha xapop eñama m'a énxet'ák apheykha nak kañe', hakte massegweykmek apkelánéyak ma'a Dios segánamakxa apagkok nak, massegweykmek apkelyeheykekxoho m'a apkelánémakpexa nak chá'a etnahagkok, aptawáseykha m'a ekhémo mók apkelpaqhetchásamákpoho axta Dios meyke néxa.

⁶Cháxa keñamak ekmasséssekmo nak xapop ma'a sẽlyemneykha ekmaso nak, tén han apkellegágkoho kéllegassáseykegkoho m'a énxet'ák apheykha nak kañe'. Cháxa keñamak apweywento nak énxet apheykha keso náxop, apqántawók apagko' apkeleymékpok.

⁷Massék ekha m'a vino, kelyameygkek ma'a anmen yámet kélcheneykekxa, kelyaqhápeyha agko' apkelwáxok ma'a énxet'ák élpayheykekxoho axta chá'a apkelwáxok.

⁸Massegwokmek kéltekpageykha m'a kéltekpaga ekmátsa nak chá'a ageyxho' ekpáwà, tén han ma'a arpa, massegwokmek apyennegkessóxma m'a ekmátsa nak chá'a eneywagkok.

⁹Massék ekyenáxko vino neyseksa élmeneykmásamaxche'; ekmáske sa' katnekxak énagkok apyenéyak ma'a apyeneykegkoho nak chá'a.

¹⁰Apmopso aptamhákxak ma'a tegma apwányam, apkelyeykhásamákpoho nak chá'a apkeltémakxa énxet'ák apheykha m'a kañe', mogwanchek antexek xama tegma enxoho.

¹¹Apkelpáxamáha ekyennaqte énxet'ák ámay awáxok aptegyágko eykhe vino; massegwokmek ekyókxoho m'a ektémakxa axta chá'a élpayheykekxa apkelwáxok, kélmasséssek kañe' apchókxa m'a ekpayheykekxa egwáxok nak.

¹²Apmopso aptáhak ma'a tegma apwányam, nekha'a étkók entáhak ma'a átog apagkok nak.

¹³Sa' katnehek ekyókxoho apheykegkaxa nak chá'a pók aptémakxa énxet'ák keso náxop, ektémól'a kóltekpog kólpalchesek ekyexna m'a olivo yámet, enxeykel'a nahan ma'a ektémól'a kólchetámekxohok ekyexna anmen yámet natámen la'a ekpenchásamáxche eknakxamáxche m'a ekyexna.

¹⁴Elwehesha sa' kalpayhekxak apkelwáxok ma'a meletsapma nak, elyennaqtések sa' apkelpeywa apkelwet'a enxoho Wesse' egegkok aptaqmalma m'a apheykegkaxa nak taxnegwánxa ekhem.

¹⁵Keñe sa' nahan ma'a apheykha nak teyapmakxa ekhem tén han ma'a apkelókxa ekhéyak nak neyáwa wátsam ekwányam, elteméssesek nahan apcheymákpoho m'a Wesse', cham'a Israel Dios apagkok nak.

¹⁶Nenleg'awók nahan aptáha apkelmeneykmasa énxet'ák apheykha nak ektemegwánxa néxa xóp se'e: “¡Apcheymákpoho ektáha nak appéwomo!” Tén axta ko'o sektáha s'e: ¡Ko'o laye, asagke nak la'a setnamakxa! ¡Yeykhágwokmók agko' nak la'a ekmaso aptamhágkaxa chá'a appelakkassesso apsexnenagko pók ma'a énxet'ák appelakkassesso nak chá'a esexnenak pók!

¹⁷Máxa aqsok nawha'ák sa' etnahagkok ma'a énxet'ák apheykha nak keso náxop, apmenxeneykhal'a apkelnempaqwayam, essenhan ma'a ketók ekpalleykenxal'a máxek, tén han élmomakxa kelhanma.

¹⁸Máxek sa' etyamok chá'a m'a apyexánegkesso nak chá'a apkelnempaqwáméyak, keñe sa' ma'a apteyapma nak chá'a kañe' máxek kamok kelhanma. Mámeye ekwányam sa' kaweywenták néten keñe sa' kayawheykha m'a xapop awhak nak.

¹⁹Kalpexyennók sa' ekmaso agko' xapop, kayawheykha sa', nekha étkók sa' katnekxa'.

²⁰Máxa anmen áto' sa' katnehek kayawheykha, máxa tegma aphápak sa' katnehek kayawheykha meykel'a apyennaqte apkelánamap. Yentexók agkók ma'a megkay'assáxma, teyekmek sa' agkok, megkólxátekhásekxeyk sa' chá'a.

²¹Ellegássesagkohok sa' Wesse' egegkok aqsok ekhéyak nak néten ekha élmowancha'a xa ekhem nak tén han ma'a kelwesse'e apkelwányam nak keso náxop;

²²yánchásekxak sa', exatmok sa' kañe' magmowagkexa nak antépok, exnésha sa' kañe' negmomaxchexa, nanók sa' nahan katnehek ellegássesagkoho'.

²³Aptemék sa' agkok Wesse' apwányam egkexe Sión ma'a Wesse' ekha nak apyennaqte, cham'a Jerusalén nak, kapeysemekxak sa' ekhem tén han ma'a pelten, keñe sa' ma'a apkelámha apmonye'e nak énxet'ák apagkok elwetak sa' Wesse' egegkok apcheymákpoho.