Read Lengua Sur Isaías 25 Bible Online

Isaías 25 - Lengua Sur bible

Isaías 25

¹Wesse', xép apteme Dios ahagkok; agkések chá'a ko'o exchep ekpayheykekxa ewáxok, atnéssesek nahan chá'a eyeymáxkoho m'a apwesey, hakte apkeláneyak chá'a m'a aqsok apmáheyo nak chá'a elána' sempelakkasso nak agweta', apxeyenma axta chá'a elának eyeynamo m'a nanók agko' axta.

²Meteymog ektaháneykekxa mók aptemessáseykekxak ma'a tegma apkelyawe nak, apmopsagcha'a aptemessáseykekxak ma'a tegma apkelyawe apkelyennaqte nak; apmasséssesseykmek tegma apkelyawe apagkok ma'a apkelenmexma nak, megkólnaqxétekhasagkokxeyk sa' nahan chá'a kaxwók ma'a.

³Cháxa keñamak apcháyo nak chá'a exchep ma'a énxet'ák apkelyennaqteyáseykha nak chá'a apyempe'ék, yeykpohok xép ma'a tegma apkelyawe apheykegkaxa nak énxet'ák megkamayósa nak elanok aqsok.

⁴Hakte xép apteme apyexanmomakxa m'a énxet apmopyósa nak, apmasma m'a aplegeykegkoho nak aphakxa meyke aqsok, apyexanmomakxa m'a ekwa'a enxoho éxchahayam ekyennaqte, pessesse apagkok ma'a ekmexna enxoho mayáhat. Máxa éxchahayam ekyennaqte éxcheheykmohol'a ekhem apmopsamágexa apkelennama m'a énxet'ák megkalmayósa nak elanok aqsok,

⁵máxa m'a ektémól'a ekmexanma ekyamáyekxal'a exma xapop. Apwanchek xép eweykásenták apyennegkessóxma m'a apkelnatheyáseykha nak chá'a, ektémól'a kamasseksek ekmexanmaxma m'a yaphope pessesse agkok. Yánhok xép elwanmeyekxak ma'a énxet'ák megkalmayósa nak elanok aqsok.

⁶Elanaksek sa' ektámaxche ekyawe Wesse' ekha nak apyennaqte apyókxoho pók aptémakxa énxet'ák ma'a egkexe Sión, nento éltaqmalma nak tén han ma'a vino ektaqmalma nak, yetlo m'a élmátsa agko' nak nento tén han ma'a vino ektaqmalma agko' nak.

⁷Elyeptek sa' Wesse' egegkok apáwa kélapma apchapma nak chá'a apyókxoho énxet'ák xa néten egkexe nak, cham'a kélaqlamaxche' apkelaqlamákpo nak ma'a apyókxoho pók aptémakxa énxet'ák.

⁸Emasséssamhok apagko' sa' Wesse' egegkok ma'a nétsapma, elhaxyawássesagkok sa' apaqtek égmen'ák apyókxoho énxet'ák, yának sa' kamassegwók apkelmegqásamáp énxet'ák apagkok ekyókxoho keso náxop. Wesse' egegkok apxeyenma xa.

⁹Sa' katnehek kalpaqmetaxchek, cháxa ekhem nak: “Cháxa Dios egagkok xa, negáyo nak chá'a, nélhaxanma nak hẽlwagkasek teyp. Kalpayhekxa egwáxok, ólátsaha, ẽlwagkassek teyp ma'a.”

¹⁰Etaqmelchesek sa' Wesse' egegkok ma'a egkexe Sión, keñe sa' ma'a Moab elteyammaha, máxa sa' etnéssesek ma'a ektémól'a pa'at apák kélteyammeykhal'a m'a kélchexakhamakxa nak aqsok apák.

¹¹Elya'aksek sa' néten apmék ma'a énxet'ák Moab máxa sa' etnahagkok ma'a aptémól'a elya'aksek néten apmék ma'a énxet apmomo nak chá'a yegmen, xama apkeltaqhaheykha sa' chá'a kaweywenták ma'a ektémakxa nak apkeleymákpoho.

¹²Eyaqnegkessesek sa' Wesse' egegkok ma'a aphaxta netno' nak nepyáwa' tén han ekyennaqte; elyaqnegkessesek sa', enegkenek sa' náxop.