Read Lengua Sur Isaías 28 Bible Online

Isaías 28 - Lengua Sur bible

Isaías 28

¹¡Samaria laye, eyaqheykencha'a nak chá'a apwáxok ma'a Efraín, apteméssessama nak chá'a néten agko' ektaqmalma, apheykegkaxa nak ma'a énxet'ák anmen át'ák; élyamaka nak kaxwók kélnáxegkáseykha m'a pánaqte exnók, ekyetnama nak néten egkexe, néten nak ma'a xapop ekyapwate ektaqmalma, tegma apwányam élnápeykegkaxa nak vino m'a énxet!

²Yetneyk xama énxet apyennaqte aptaqmelchessesso m'a Wesse' egegkok, apyennaqte apagko', máxa m'a yegmen élyennaqte ekyennaqtél'a ektéyam, máxa m'a éxchahayam ekyennaqte ekmassesseykmohol'a aqsok, máxa m'a ekmámeye ekyawel'a, máxa m'a yegmen ekyawe ekmasól'a. Apmek sa' etnehek ekxeynták náxop,

³keñe sa' apmagkok elteyammaha m'a eyaqheykencha'a nak chá'a apkelwáxok tén han aptaqmelchessama nak chá'a m'a Efraín énxet'ák apagkok anmen át'ák nak.

⁴Keñe sa' ma'a pánaqte exnók éltaqmalma élyamaye nak kélnáxegkáseykha, ekyetnama nak ma'a néten ekyapwátegweykenxa xapop ektaqmalma, katnehek sa' ma'a ektémól'a higo yámet émha amonye' ekyexna ekmakhetmal'a: apwetél'a xama énxet keñe enakxek, etwok nahan.

⁵Etnehek sa' ekho kélháxaqxo élyenma ektaqmalma Wesse' ekha nak apyennaqte xa ekhem nak, ekho kélnatanma ektaqmalma apagkok ma'a énxet'ák apagkok apkeleymomap nak,

⁶egkések sa' nahan ekpéwomo apkeláneykegkokxa chá'a amya'a énxet'ák segyekpelchémo m'a kañe' sẽlyekpelchémókxa nak, egkések sa' nahan élyennaqte apkelwáxok ma'a sẽlpextétamo apmasma nak chá'a m'a tegma apwányam.

⁷Yetneyk nahan chá'a nápakha apkelyawheykha eñama élnapma vino tén han élpelápagkáseykha chá'a m'a anmen ekyennaqte segaqhamól'a: apkelyawheykha chá'a m'a apkelmaxnéssesso nak Dios énxet'ák apagkok tén han ma'a Dios appeywa apkellegasso nak eñama élnapma m'a anmen ekyennaqte segaqhamól'a, kelyeykessegkexma m'a vino; kelpelápagkáseykha m'a anmen ekyennaqte segaqhamól'a, elyawheykha chá'a m'a apkelwet'a enxoho aqsok kélxekmósso, kalnápok nahan chá'a m'a apkelxéna enxoho yaqwánxa kólteméssesek xama énxet.

⁸Sawheykekxók kélyekxo ekmanyása m'a ekyókxoho mésa nak, méko xama nekha enxoho ekmopakxa.

⁹Etnehek chá'a ko'o hexének se'e: “¡Apxegeykmek yaqwayam hẽlxekmósek negko'o xa, tén han hẽltámesagkok ma'a aqsok apxekmósso nak chá'a Dios! ¡Máxa sakcha'a apketcheyetsék la'a enteméssessók negko'o,

¹⁰kaxwel'a éltámeyéyak apkelyetsátéyak eknaqtáxésamaxche weykcha'áhak!”

¹¹Sa' agkok elyahakxohok xa, elpaqhetchesek sa' Dios ma'a nempeywa magya'áseyak nak ektémakxa, nempeywa manlegaya nak.

¹²Hakte aptemegkek axta apkelanagkama nanók axta s'e: “Keso élwóneykegkaxaxma s'e, keso néllókassamakxa nélyampe s'e; ellókasek sa' apkelyampé m'a apkelyampayo nak.” Axta eyke elyeheykekxoho'.

¹³Ékeso éñamakxa peya nak etnehek elpaqhetchesek Wesse' egegkok ma'a ektémól'a sakcha'a apketcheyetse', kaxwe éltámeyél'a apkelyetsete. Keñe sa' apkelxega enxoho chá'a, elsekhohok sa' chá'a elyaqnenek kasawhaxkohok apmagkok, elyensagkok sa' nahan, kalmok sa' ma'a kelhanma, elmakpok sa' nahan.

¹⁴Kóleyxho Wesse' egegkok appeywa kéxegke énxet'ák ekmátsa nak chá'a hegasmaksek, kélteme nak wesse' nepyeseksa s'e énxet'ák apheykha nak Jerusalén.

¹⁵Kéltáhak kélpaqmeta kéxegke s'e: “Nenlanak negko'o ekhémo mók nélpaqhetchásamáxkoho m'a nétsapma, nélpaqhetchásexkók negko'o m'a apkelmaheykegkaxa nak chá'a apkeletsapma, yaqwayam sa' mehegwatamók ma'a ekwa'a sa' aqsok ekmaso agko'; nélyexanmomchek negko'o m'a nélmowancha'a amya'a nak, néláhakkásamaxcheyk ma'a nélyexancháseykha nak egmók.”

¹⁶Ékeso éñamakxa, aptáha nak appeywa Wesse' egegkok se'e: “Apekkenek sa' ko'o xama meteymog ma'a Sión, meteymog kélyéseykha tén han ektaqmalma agko', yaqwayam sa' katnehek meteymog kélmámenyého kélagko' kólmaha, katnehek sa' ekyennaqtésso tegma apowhak. Énxet apcháyo enxoho xa, méko sa' katnehek apha.

¹⁷Amha sa' ko'o ekpéwomo nentémakxa sélana sa' xa tegma nak, ektémól'a m'a táma' kélmeykhal'a chá'a kélpékessamo apxega yátapheymekcha'ák, keñe sa' ektaqmalma nentémakxa m'a nenlányo nak chá'a ekwánxa ekhémo mók ma'a néten.” Yegmen élyennaqte sa' katwasha m'a kélmeyeykekxexa nak chá'a kóltegyaha kélmowána amya'a, keñe sa' yegmen kaswok ma'a ekyetnamakxa nak chá'a ekmasma.

¹⁸Kólmasséssók sa' ma'a kélhéssamo axta mók kélpaqhetchásamáxkoho m'a nétsapma, keñe sa' ma'a kélpaqhetchásamáxkoho axta m'a apkelmaheykegkaxa nak chá'a apkeletsapma, meyke ekyennaqte sa' katnehek. Kawak sa' ma'a aqsok ekmaso agko' nak, keñe sa' kéxegke megkólenmaxaxche'.

¹⁹Wa'akteyk sa' agkok chá'a m'a, kalpexyawasha sa' chá'a. Yókxoho ekhem sa' chá'a kawata', ekhakxoho ekhem tén han axta'a. Amya'a sa' eykhe nahan chá'a kóllega' megkeyxek sa' eyke chá'a kólè'.

²⁰Sa' kóltéhek ma'a ektémól'a agyetek negyetnamakxa néten ketse' magmowánal'a ólpéwak agyetek, tén han ektémól'a agaqlaxchek ma'a yát'apáwa apyaqwátamól'a.

²¹Sa' etnehek elának aqsok Wesse' egegkok ma'a aptémakxa axta egkexe Perasim, sa' etnehek elwok ma'a aptémakxa axta aplama m'a ekyapwátegweykenxa nak xóp Gabaón, yaqwayam sa' elának ma'a aqsok apmáheyo nak elána', magweteya nak, yaqwayam sa' epenaksek ma'a aqsok apkelane, aqsok apkelane magya'áseyak nak.

²²¡Kólwátésák sa' kaxwók sélasmésso!, kayágwomhok katnehek élyaqhapma m'a cadenas kélpextete nak; hakte ekleg'ak ko'o apmako emasséssók Wesse' ekha nak apyennaqte ekyókxoho s'e kélókxa nak.

²³Kóltaqmelchesho kélháxenmo, kóleyxho sektáhakxa nak séláneya, kóleyxho meyke kéltawásseyo sekpeywa:

²⁴Peyk agkok eknekxak aqsok aktek xama énxet apkelchekhámo nak chá'a, mepeynchemek chá'a xapop yókxoho ekhem, metekpogmakha nahan chá'a xapop apkelchekha yókxoho ekhem emha hópomo'o apophék epeykásekxak ma'a xapop.

²⁵¿Naqsóya apkeneykekxoho chá'a aqsok aktek ekwesey nak eneldo essenhan comino appenchesa enxoho chá'a appeykáseykekxa m'a xóp? ¿Eknekxohoya nahan chá'a hótáhap ma'a kélyapwáteséyak élpéwomo nak? ¿Eknekxohoya nahan chá'a apho nak hótáhap tén han ekwesey nak centeno m'a nekhaw'ék nak?

²⁶Dios apkelxekmósso chá'a yaqwánxa etnehek xa.

²⁷Hakte megkólchempaksek áwa' apák ma'a aqsok ekwesey nak eneldo, megkólteyágkasha nahan weyke taqaxchók kóltepelkok ma'a aqsok ekwesey nak comino; yámet akke kólmaha kóltekpog ma'a eneldo ekhawo nahan ma'a comino.

²⁸Hótáhap apaktek akke kólchempaksohok apwa' apák, háwe eyke ekwenaqte enxoho; kólteyágkasha chá'a m'a weyke taqaxchók amagkok keñe kaxpánchesek ma'a apaktek, megkakpelchehek eyke.

²⁹Cháxa aptémakxa nahan elánekxak yaqwánxa etnehek ma'a Wesse' ekha nak apyennaqte. Yetneyk aqsok sempelakkasso nak agwetak ekxeyenma apwáxok elának ma'a, yetlo apya'áseykegkoho ekyawe nahan chá'a epenaksek apkelane.