Read Lengua Sur Isaías 32 Bible Online

Isaías 32 - Lengua Sur bible

Isaías 32

¹Etyapok sa' xama wesse' apwányam yaqwayam etneykha yetlo ekpéwomo aptémakxa tén han ma'a kelwesse'e apkeláneykha nak chá'a apkelókxa yaqwayam sa' eltemeykha chá'a apkelókxa yetlo ekpéwomo apkeltémakxa.

²Máxa sa' etnehek chá'a xama m'a negyexánegkesseykekxexal'a éxchahayam, segmasmal'a kawak ma'a éxchahayam ekyennaqte agko', máxa sa' etnahagkok ma'a ektémól'a yegmen atamnek ényél'a m'a neyseksa ekyamáyekxa nak xapop, máxa sa' etnahagkok ma'a ektémól'a meteymog ekyawe agko' pessesse agkok émha m'a meykexa nak énxet.

³Megkalyampeyk sa' chá'a apaqta'ák apkeláneykha, yeyxhok sa' nahan chá'a meyke aptawásseyo m'a ektáhakxa enxoho apkellege;

⁴melanagkehek sa' nahan chá'a aqsok yetlo melya'áseyak ektémakxa, yetlo ektaqmalma élchetámeykha apkelwáxok sa' aqsa chá'a elanagkok apkeltamheykha, elxének sa' nahan chá'a aqsok ekpéwomo agko'.

⁵Meltéhek sa' nahan chá'a énxet'ák ektaqmalma aptémakxa m'a énxet ekmaso nak aptémakxa, metnéssesek sa' nahan chá'a énxet'ák ekha kéláyo m'a énxet apmopwána nak elyexanchesha pók.

⁶Hakte asagkek chá'a katnehek appeywa m'a énxet ekmaso nak aptémakxa, keñe m'a apwáxok nak kalchetmok chá'a ekmaso agko' yaqwánxa etnehek; ektamok chá'a yaqwánxa etnehek elának aqsok ekmaso agko', apmopwána amya'a nahan chá'a etnehek yenmexmakha m'a Wesse' egegkok; yáphaksek aqsa nahan chá'a etaqhekxak meyke apmésso apto m'a meyk áto nak, megyagkek nahan yegmen ma'a hem áto' nak.

⁷Keñe m'a énxet apmopwána nak elyexanchesha pók yásenneykxak chá'a m'a ektémakxa nak apmopwána apteme apmopwána amya'a, elánekxak chá'a yaqwánxa etnehek elának ma'a aqsok ekmaso agko' nak; apmopwána amya'a chá'a etnehek etwássesha apheykha m'a énxet'ák meyke nak aqsok apagkok tén han ma'a ekha nak chá'a eyeyméxchexa aqsok ma'a apxanák apkeltémo nak chá'a kóltaqmelchessásekxak apheykha.

⁸Keñe m'a énxet ektaqmalma nak aptémakxa tásek chá'a katnehek élchetámeykha apwáxok aqsok apmáheyo elána', meyensemek nahan chá'a aqsok apmáheyo elána'.

⁹Kelán'ák, meyke nak élyetnakhassamo kélwáxok aqsok, kóleyxho sa' sekmako nak ko'o altennaksek kéxegke. Kelán'ák, ektaqmalma nak kélheykha, kóleyxho sa' sekpeywa.

¹⁰Tásek kélheykha kéxegke s'e kaxwo nak, sa' eyke m'a aptáha sa' xama apyeyam kólpexyennók sa' kélaye, hakte kasawhaxchek sa' eknakxamáxche ekyexna m'a aqsok kélcheneykekxa, megkólnakxekxók sa' chá'a kaxwók ma'a anmen yámet ekyexna.

¹¹Kéxegke, kélweynchámeykha nak meyke élyetnakhayo kélwáxok, kólyegwe'; kéxegke, ektaqmalma nak kélheykha kólpexyennem, kólhaxyawasák xa kélántaxno nak, kólántaxnekxa m'a apáwa sẽlwáxaqxamól'a magkenatchesso éllapwámeygko.

¹²Kólxekmós kéllegágkoho éllapwámeyak ma'a yókxexma ekmátsexa nak agweynchamha tén han ma'a anmen yámet kélcheneykekxa éltaqmalma nak.

¹³Katyapok sa' yámet ekha nak am'ák tén han ekmompánaqma m'a seyókxa, cham'a apyókxoho tegma nak ma'a tegma apwányam élpayheykekxexa nak chá'a apkelwáxok ma'a énxet, ekyetnamakxa nak chá'a m'a apkelátseykha.

¹⁴Etaqmopagkok sa' ma'a tegma apyawe aptaqmalma nak; meyke xama aqsok sa' katnekxak ma'a tegma apwányam, apheykegkaxa nak apxámokma énxet; kataqmopagkohok agko' sa' ma'a kélhaxtegkesso ekyennaqte nak nepyáwa; kalkohok sa' awáxok kallawha yámelyeheykok nawha'ák ma'a, katawagkok sa' nahan pa'at kélnaqtósso m'a.

¹⁵Hegáhapwaták sa' eyke makham negko'o apmopwána m'a Wesse' egegkok, apmopwána nak elának aqsok, keñe sa' katnekxak namyep ma'a yókxexma ekyamáyekxa nak exma, kayeykhágwomhok agko' sa' nahan ektaqmalma m'a namyep.

¹⁶Keytek sa' ekpéwomo nentémakxa ekyókxoho m'a kañe' apchókxa tén han ma'a ektaqmalma nentémakxa.

¹⁷Katekkesek sa' meyke ektáhakxa egwáxok tén han ektaqmalma negha tén han meyke ektamheykha egwáxok meyke néxa m'a ektaqmalma nak nentémakxa.

¹⁸Exmakha sa' énxet'ák ahagkok ma'a meykexa nak ektemegweykmohóxma, kañe' ektaqmelakxa nak negha, ekyetnamakxa nak meyke ektemegweykmohóxma negha,

¹⁹kóláxñásekxohok sa' eykhe m'a naxma nak, kóltegkesek sa' eykhe nahan ma'a tegma apwányam nak.

²⁰Kalpayhekxak sa' eyke kéxegke kélwáxok neyseksa kélheykha, awanhek sa' katnehek yegmen ekyásseséyak ma'a aqsok kélcheneykekxa, kaxek sa' nahan ekxámokma pa'at yaqwayam katawagkok ma'a yámelyeheykok kélnaqtósso tén han ma'a weyke.