Read Lengua Sur Isaías 34 Bible Online

Isaías 34 - Lengua Sur bible

Isaías 34

¹Énxet'ák, kólyepetchegwatámho yaqwayam kóleyxho'; kóltaqmelchesho sa' kélháxenmo kélheykha nak ekyókxoho keso náxop. Xapop, keyxho tén han ekyókxoho aqsok ekhéyak nak ma'a awáxok, tén han nélwanmégkaxa ekyókxoho m'a aqsok élántekkesso nak.

²Apkeltaqnaweygkek Wesse' egegkok apyókxoho énxet'ák keso náxop ekweykekxoho m'a apyókxoho sẽlpextétamo apagkok nak, apkeltamhók kólsawhohok kólnápekxa'.

³Kólchexák sa' aqsa m'a apkeletsapma nak, kampak sa' ekpaqneyam ektahapma m'a kélhapák, kasawhekxohok sa' éma m'a néten meteymog élekhahéyak nak.

⁴Kaxpaqnek sa' ma'a ekyókxoho aqsok élápogwátéyak nak néten, máxa weykcha'áhak kélyaqsáseykekxa sa' katnehek kayaqsekxak ma'a néten, elsapónak sa' apyókxoho m'a yaw'a; máxa sa' etnehek ma'a ektémól'a anmen yámet élyamaye, ektéyam la'a m'a áwa' apák tén han ma'a higo yámet.

⁵Yephagwa'ak Wesse' egegkok sókwenaqte apagkok ma'a néten, katyamok sa' neyseksa m'a Edom, apheykegkaxa nak énxet'ák kéltémo etekyewekxa'.

⁶Kaltexneyxchek sa' éma m'a Wesse' egegkok sókwenaqte apagkok tén han pexmok, ektémól'a etekyók nepkések tén han yát'ay ma'a kélméssól'a yaqwayam etekyók. Elának sa' aqsok ektekyawa Wesse' egegkok ma'a Bosrá, nentekyawa ekyawe sa' elának ma'a tegma apwányam Edom.

⁷Máxa yágweyke sa' etnahagkok eletsapok tén han weyke étkók tén han weyke kelennay'a; kayássesek sa' éma m'a xapop apagkok, kamlaksek sa' nahan yagkamex ma'a pexmok apagkok.

⁸Katnehek sa' ekhem apyaqmagkáseykekxexa mók ma'a Wesse' egegkok, apyeyam apyaqmagkassáseykekxexa mók kélteméssessamakxa m'a Sión.

⁹Katnekxak sa' ekyókxoho yegmen ényé Edom ma'a ektémól'a aqsok agye' eyéweykegkohol'a, keñe sa' yagkamex agkok katnekxak ma'a aqsok ánek ekyátekto eyáléwomól'a; máxa sa' katnehek káléwha xapop ma'a ektémól'a káléwha m'a aqsok agye' eyéweykegkohol'a.

¹⁰Megkaspónhek sa' ekhem tén han axta'a; kapaqnek sa' aqsa chá'a; kataqmopagkohok agko' sa' meyke néxa; méko sa' kaxwók kapéwhok ma'a ekpayhókxa nak.

¹¹Sepekhék sa' katnegwók élyáqtamakxa m'a tén han mahésso, kalánegwók sa' axanák kágqag ma'a tén han sawe apkelyawe. Meyke xama aqsok sa' etnessásekxak Wesse' egegkok xa apchókxa nak, tén han ekyamayéxma.

¹²Mexnekxók sa' chá'a xama wesse' apwányam apagkok yaqwayam eltaqmelchesek; elmassegwók sa' apyókxoho m'a kelwesse'e apagkok.

¹³Kalántépok sa' yámet ekha nak am'ák ma'a tegma apkelyawe apkeltaqmalma apagkok nak, keñe sa' yátape' tén han kentem ma'a tegma apkelyennaqte apagkok nak. Katnehek sa' xama yókxexma élleykegkaxa m'a semheg nawha'ák éllo tén han apkelyexanmomakxa m'a xápen.

¹⁴Keypetchekxak sa' yágqamés ma'a semheg nawha'ák éllo nak, ewónmakha sa' chá'a pók ma'a yát'ay. Sa' kaxek nahan kélhagák ma'a segyegwakkassamo nak axta'a, sa' kótak ekhakxa yaqwayam kallókasek ekyampe m'a.

¹⁵Sa' kalanagkok axanák sepekhék ma'a, kapalchesagkok sa' appok, kayétekpog sa' nahan, kánchásekxak sa' nahan yaqwayam kaltaqmelchesek. Sa' kaqnekxak nahan náta meyke ahekhek ma'a, kennawo', xama kelwána sa' chá'a katnehek.

¹⁶Kóllano ekxeyenma Wesse' egegkok weykcha'áhak apagkok, kólyetset nahan: Megkeymaxcheyk sa' nahan xama enxoho kólwetak xa aqsok nawha'ák nak, megkeymaxchek sa' xama m'a kelwána nak, hakte Wesse' egegkok apagko' apnegkenma xa, apkennama sa' nahan etnehek yánchásekxa'.

¹⁷Apmésso apagko' nahan chá'a xama xama m'a yaqwánxa kalyagqa', appenteyhássessegkek chá'a apxekmóssama m'a xapop agkok nak, katnehek sa' chá'a agkok meyke néxa m'a; kalyagqak sa' chá'a yókxoho apyeyam.