Read Lengua Sur Isaías 35 Bible Online

Isaías 35 - Lengua Sur bible

Isaías 35

¹Kapayhekxa awáxok yókxexma meykexa nak énxet, ekyamáyekxa nak exma xapop, kapayhekxoho agko' awáxok kalyapwekxa' makham,

²kalántekkásekxa makham ma'a pánaqte exnók ektémól'a m'a pánaqte exnók élyápaqmate éltaqmalmal'a, kalpayhekxoho agko' kélwáxok. Dios sa' etnéssesek ektaqmalma agko' ektéma nak ma'a Líbano, tén han megkéssamakxa katyapok aqsok ektéma nak ma'a Carmelo tén han ma'a ekyapwátegweykenxa nak xapop ma'a Sarón. Apyókxoho énxet sa' elwetak Wesse' egegkok élseyéxma apagkok tén han ma'a Dios egagkok apcheymákpoho nak.

³Kólyennaqteyásekxa m'a énxet'ák apkelyelqamákpoho nak, kólwasqakkásekxoho m'a énxet'ák apkelyampayo nak,

⁴kólteme kólának énxet'ák eyeye nak chá'a apkelwáxok se'e: “¡Kólwasqápekxoho, nágkólé'! ¡Keso Dios kélagkok se'e yaqwayam elwagkasek teyp, ellegássesagkohok sa' ma'a kélenmexma ekpayhawo nak yaqwayam ellegássesagkoho'!”

⁵Keñe sa' ma'a meyke nak apaqta'ák elwetekxaxma tén sa' ma'a meyke nak apeyk'ák ellegekxaxma;

⁶máxa popyet sa' etnahagkok elnextegmakha néten ma'a énxet'ák élmasagcha'a nak chá'a apyókxa, elwehesha sa' ma'a énxet'ák meyke nak apkelpeywa. Katyapok sa' ekyawe agko' yegmen ma'a yókxexma meykexa nak énxet, ekyamáyekxa nak ma'a xapop.

⁷Ekyetnamakxa yegmen sa' katnehek ma'a yókxexma meykexa nak énxet, kasawhekxohok sa' ekteyapmakxa yegmen ma'a ekyamáyekxa nak xapop. Katyapok sa' pa'at tén han ekho' m'a élleykegkaxa nak kaxwók ma'a semheg nawha'ák éllo.

⁸Keytek sa' nahan xama ámay ma'a neyseksa nak, kólteméssesek sa' ekwesey “ámay ekpagkanamaxche'”. Mopwanchek sa' elpéwhok élmanyása nak apkeltémakxa m'a; melpéwók sa' nahan chá'a m'a énxet'ák élyeyháxma nak.

⁹Méko sa' nahan katnehek yámakméwa m'a, megkalyepetchegwók sa' nahan ma'a aqsok nawha'ák éllo nak. Sa' elpéwhok elchexyók énxet'ák kélwagkasso nak teyp xa ámay nak,

¹⁰apkelmeykekxa nak neyseksa aqsok ekmaso m'a Wesse' egegkok; elántexek sa' Sión yetlo apkelmeneykmasso élpayheykekxa apkelwáxok, katnahagkok sa' chá'a élpayheykekxa apkelwáxok neyseksa apheykha. Elwetak sa' élpayheykekxa apkelwáxok tén han apkelátseykha, kamassegwók sa' ma'a apkellekxagweykha tén han éllapwáméyak.