Read Lengua Sur Isaías 40 Bible Online

Isaías 40 - Lengua Sur bible

Isaías 40

¹Aptáhak Dios kélagkok nak kéxegke s'e: “Kóltaqmelchessásekxa apkelwáxok énxet'ák ahagkok, kóltaqmelchessásekxa';

²kólpaqhetchesha yetlo éltaqmeleykha kélwáxok ma'a énxet'ák Jerusalén, kóltennés ekmassegwokmo kaxwo' ma'a ektémakxa nak kélásenneykha naqsa ekyentaxno, kóltennés appenchesa apyaqmagkáseykekxa mók ma'a aqsok melaqhémo, tén han sekyeykhássekmoho ko'o séllegassáseykegkoho ekyókxoho m'a melya'assáxma.”

³ Táhak xama kélpeywa ekyennaqte s'e: “Kóllanés xama ámay Wesse' egegkok ma'a yókxexma meykexa nak énxet, kóllanés xama ámay ekpéwomo Dios egagkok ma'a yókxexma megkatyapmakxa nak xama aqsok.

⁴Kólapagkokxa ekyókxoho m'a xóp élyapwátéyak nak, kólpeykásekxa m'a egkexe nak tén han ma'a egkexe étkók nak, kóltemessásekxa éláxñeyo agko' xapop ma'a yókxexma élekhahéyak nak xapop tén han ma'a ekxámokmakxa nak meteymog élwenaqte.

⁵Keñe sa' exekmósek apcheymákpoho m'a Wesse' egegkok, elwetak sa' apyókxoho énxet meyke apkeymomap. Wesse' egegkok apagko' apxeyenma xa.”

⁶Táhak xama kélpeywa s'e: “Elpáxamha”, tén axta sektáha ko'o sélmaxneyeyncha'a s'e: “¿Yaqsa ko'o axének alpáxamha?” “Apyókxoho énxet apteme máxa pa'at, ¡hawók ektémakxa nak apyennaqte m'a pánaqte exnók émha nak yókxexma!

⁷Katsapok chá'a áwa' pa'at ekwátekhapa enxoho m'a Wesse' egegkok apkennama, kalyameyk nahan ma'a exnamok. Naqsók máxa pa'at ma'a énxet.

⁸Katsapok chá'a áwa' m'a pa'at, kalyameyk nahan chá'a m'a exnamok, keñe m'a Dios egagkok appeywa nak megkamassegwomek chá'a.”

⁹Yenát sa' egkexe néten nak Sión, énnaqtés sa' appeywa exének amya'a ektaqmela. Nágye aqsa énnaqtések appeywa m'a Jerusalén, etne sa' ellegaksek tegma apkelyawe nak Judá s'e: “¡Keso Dios kélagkok se'e!”

¹⁰Apwa'akteyk kaxwók Wesse' egegkok yetlo apmopwána, kóneg aptemessásekxak ekyókxoho aqsok eñama apyennaqte. Apnaqlánteyk énxet'ák apagkok apkelwagkasso teyp.

¹¹Máxa keláneykha nepkések aptáhak apkexyekmo apkeltaqmelchessól'a m'a nepkések apnaqtósso; apkelqeynánteyk ma'a nepkések apketkók, apkelpathetánteyk nahan, aptaqmelchásawók nahan chá'a apkeláneykha m'a kaxwe aptamhéyak nak apnaqláw'ák.

¹²¿Yaqsa élyetsáteykegko awáxok ámek ekwánxa ekyawe m'a wátsam ekwányam nak? ¿Yaqsa élyetsáteykegko aphék ekwánxa ekpayhe m'a néten? ¿Yaqsa ekxátama xama kelyetsáteyak ekyókxoho yagkamex nak keso náxop? ¿Yaqsa nahan élyetsáteykegko xama kelyetsáteyak ma'a egkexe tén han ma'a meteymog élekhahéyak nak?

¹³¿Yaqsa éltaméseykegko chá'a aqsok ma'a Wesse' egegkok? ¿Yaqsa élxekmowáseykegko chá'a yaqwánxa etnehek?

¹⁴¿Yaqsa ekpékessáseykegko chá'a? ¿Yaqsa ekya'assáseykegkoho chá'a aqsok? ¿Yaqsa éltámesso yaqwayam elyekpelkohok chá'a énxet'ák yetlo ekpéwomo aptémakxa? ¿Yaqsa élxekmósso yaqwayam ey'asagkohok chá'a ektémakxa ekyókxoho aqsok? ¿Yaqsa ekmésso chá'a amya'a ektémakxa nak negya'ásegwayam?

¹⁵Máxa xama eksekkenmal'a yegmen entemék apkelányo énxet'ák ma'a Dios, ektémól'a m'a xóp ánek ekheykegkokxal'a m'a kañe' kelyetsátéyak; hawók apkelányo yagkamex keyetsék la'a m'a apkelókxa egkexe étkók ekhéyak nak neyseksa wátsam ekwányam.

¹⁶Ántawók aqsok kélnaqtósso m'a ekyókxoho nak kañe' Líbano yaqwayam enxoho kólwatnések, ántawók nahan yántapák yaqwayam enxoho kólwatnések táxa.

¹⁷Mékoho apancha'awók nápaqtók Dios ma'a apyókxoho pók aptémakxa nak chá'a énxet'ák; apkelyelqákpók elano'.

¹⁸¿Yaqsa sa' kólhéshok kéxegke m'a Dios? ¿Yaqsa sa' aqsok kólyetchásekxoho'?

¹⁹Elának chá'a xama aqsok kéleykmássesso m'a énxet apkeleykmassáseykencha'awo nak chá'a ektémakxa xama aqsok, keñe m'a apkelane nak chá'a aqsok étkók éltaqmalma, elyepetchesek chá'a émpehek ma'a sawo ekyátekto ekmomnáwa, elanaksek nahan chá'a eknatanma m'a sawo ekmope ekmomnáwa nak.

²⁰Elyésha chá'a xama yámet megkakpelchamáxche nak chá'a m'a énxet apkeláneyo nak chá'a aqsok kéleykmássesso, etegyaha nahan chá'a yaqwayam etnegkesek ma'a xama énxet apmopwána nak apkeleykmassáseykha, yaqwayam enxoho megkayaqnene'.

²¹¿Yagkólya'ásegkok kéxegke? ¿Yagkóllegeyk kaxénaxche'? ¿Yagkóltennáseykha m'a sekxók eyeynókxa axta? ¿Yagkólya'ásegkok sekxók axta élánamáxko keso nélwanmégkaxa?

²²Aphegkek Dios ma'a teyp yaphope eyapma nak keso náxop, máxa séta nahan aptemék apkeláneykencha'a m'a énxet'ák. Máxa kélpakxanma aptemék appeykessama yaphope m'a néten, máxa kélpakxanma aptemék appeykessama, negmowánal'a anxek ma'a kóneg.

²³Mékoho nahan chá'a etnessásekxak ma'a énxet'ák ekyawe nak kéláyo, emasséssamhok nahan chá'a m'a kelwesse'e nak keso náxop.

²⁴Máxa m'a aqsok kélcheneykekxa megkalyennaqtél'a, kaxwe kélcheneykekxal'a, kaxwe élatchessól'a kepmenák ma'a xapop. Apwátekhapchek agkok nepyeseksa m'a Dios, elapyósek, keñe kalsók ma'a éxchahayam ekyennaqte, ektémól'a m'a yámet áwa' apák.

²⁵Aptáhak apkelmaxneyáncha'a Dios Aptaqmalma s'e: “¿Yaqsa sa' hélhéshok ko'o kéxegke? ¿Yaqsa sa' axhok ko'o?”

²⁶Kólsekhekxoho néten, kóllano: ¿Yaqsa axta élane xa ekyókxoho nak? Cham'a apkexpánchesso axta chá'a xama xama m'a yaw'a tén han apnegkenchesso axta chá'a apkelwesey m'a apyókxoho nak. Awanhók agko' ma'a apmopwána tén han apyennaqte, méko xama enxoho apkeymomap.

²⁷Israel, ¿yaqsa ektáha appaqméteyncha'a nak? Jacob, ¿yaqsa ektáha aptáha nak se'e? “Melányók ektémakxa sekha m'a Wesse' egegkok; mopmenyeyk hélanok ma'a Dios.”

²⁸¿Yagkólya'ásegkok? ¿Yagkóllegeyk nahan? Wesse' egegkok apteme Dios memassegwayam, apkelane ekyókxoho keso nélwanmeygkaxa, meyelqamap tén han meyampé, méko néxa m'a ektémakxa nak apmopwána aqsok.

²⁹Cha'a apwasqakkáseykekxoho chá'a énxet apyampágwayam nak chá'a m'a, apmeyáseykekxa chá'a apyennaqte m'a énxet apyelqamák nak chá'a.

³⁰Awanchek nahan elyampak chá'a m'a apketkók nak tén han elyelqakpok chá'a, kawomhok nahan apkelpelápeyam chá'a m'a élyennaqte nak apyempe'ék,

³¹elxawagkok sa' eyke chá'a axnagkok apkelyennaqte m'a énxet'ák apcháyo nak chá'a Wesse' egegkok, apwanchek sa' elchampa' ektémól'a m'a náta élyawe; apwanchek sa' yenyahagkok chá'a meyke apkelennamágwayam, apwanchek sa' elxog chá'a meyke apkelyampágwayam.