Read Lengua Sur Isaías 41 Bible Online

Isaías 41 - Lengua Sur bible

Isaías 41

¹“Kólwanmeyák nahaqtók ko'o, kéxegke kélheykha nak apkelókxa neyáwa wátsam ekwányam. Énxet'ák, kólyennákxoho sa'. Kólxegma sa' yaqwayam anxének se'e aqsok nak; agaqnekxak sa' yaqwayam ólpaqmétek.

²¿Yaqsa axta éltémo éphagwak teyapmakxa ekhem xa wesse' apwányam apmallanmo nak chá'a kempakhakma? ¿Yaqsa axta éltémo elmok chá'a m'a pók aptémakxa nak chá'a énxet'ák? ¿Yaqsa axta éltémo etnéssásekxak chá'a mékoho m'a kelwesse'e apkelwányam nak, yaqwayam enxoho etnekxohok chá'a xamo' apnek ma'a sókwenaqte apagkok nak tén han ma'a yágke apagkok nak, keñe yexpánchesha chá'a ektémól'a m'a yámet áwa' apák?

³¿Yaqsa axta éltémo emenxenek chá'a yetlo meyke ektamheykha apwáxok, ektémól'a ónyehek meyke ekyetno xama aqsok ma'a egmonye'?

⁴¿Yaqsa axta élane xa aqsok nak? ¿Yaqsa axta éltémo chá'a katnehek ekyókxoho aqsok ektéma axta chá'a m'a sekxók eyeynamókxa axta keso nélwanmégkaxa? Ko'o sekwánxa ahagkok sekteme exakko' Wesse' Dios, eyeynókxa tén han ektemegwánxa néxa.

⁵Apkelweteyak axta m'a énxet'ák apheykha nak neyáwa wátsam ekwányam, apkeláyók apagko' axta nahan; apkelyegwaktegkek axta énxet'ák ekyókxoho apheykegkaxa ekweykekxoho m'a mók néxa xapop nak. Apchágketchessa'ak kaxwo', apkelxegakme'.”

⁶Epasmok chá'a apxegexma m'a apkelánéyak nak chá'a aqsok kéleykmássesso, ewasqakkásekxohok nahan chá'a.

⁷Ewasqakkásekxohok chá'a apkelane yántéseksek ma'a apkelane nak chá'a aqsok étkók éltaqmalma; ewasqakkásekxohok chá'a apkeltekpaga nak chá'a aqsok ma'a, aptekpagéyak nak chá'a sawo ekyentaxno, etnehek nahan chá'a yának se'e: tásek kélyepetchesso sawo, keñe etaqmelcheshok chá'a apkelatchesso láwa m'a yántéseksek kéleykmássesso nak yaqwayam enxoho megkayawheykha.

⁸“Israel, apteme nak séláneykha, yeyxho sa' sekpeywa. Jacob, apteme axta sélyéseykha, aptáwen neptámen axta m'a sekteme émók Abraham:

⁹Ekyentaweykekxeyk axta ko'o exchep ma'a mók nekha xapop nak, Ekwóneykha axta m'a makhawók agko' nak. Axta ektemék seyenagkama s'e: ‘Xép apteme séláneykha.’ Élyéseykha axta ko'o exchep axta ataqhessamo'.

¹⁰Nágyé aqsa, ekheyk ko'o xamók xép; nágkatneykha aqsa apwáxok, ko'o sekteme Dios apagkok. Agkések sa' ko'o exchep apyennaqte, apasmok sa' nahan, amagkok sa' ko'o exchep apmek ma'a émek ekmallahanmo nak chá'a kempakhakma.

¹¹Elmegqágwakxohok sa' apyókxoho m'a aptaqnagko nak chá'a, melya'asagkek sa' aptamhágkaxa; esawhakpohok apagko' sa' ma'a apkelnápomákpo nak chá'a exchep.

¹²Elchetmok sa' eykhe chá'a m'a apkelenmexma nak chá'a, melwetekxeyk sa' eyke; máxa méko sa' etnahagkok ma'a apkempakhaya nak chá'a exchep.

¹³Hakte amagkok sa' ko'o exchep ma'a apmék, ko'o sektáha nak Dios Wesse' apagkok, ektemék xeyk ko'o seyáneya exchep se'e: ‘Nágyé aqsa, apasmok sa'.’”

¹⁴Aptáhak Wesse' egegkok se'e: “Énxet'ák Israel, kélketcheyetsék eykhe kéxegke, nágkóle'; Jacob énxet'ák apagkok, kélyelqáxkók eykhe kéxegke, apasmok sa'. Ko'o sekteme sélmallanchesso chá'a ekyentaxno kélheykha, ko'o sektáha nak Dios sektaqmalma m'a Israel.

¹⁵Atnessásekxak sa' ko'o exchep aqsok ektekxekxo axnagkok; élmahamtakcha'a am'ák, etekxók sa' ma'a meteymog élekhahéyak nak, ánek agko' sa' etnéssásekxa', máxa yámet áwa' apák sa' etnéssásekxak ma'a egkexe náxap'awo nak.

¹⁶Yempaksek sa' tén sa' kalsók éxchahayam; segyettekhane ekyennaqte sa' kaxpánchesha. Keñe sa' xép kapayhekxak apwáxok xamók ma'a Wesse' egegkok, kaqheykha sa' apwáxok ma'a Dios Aptaqmalma nak Israel.

¹⁷“Aptegyágkek yegmen ma'a énxet'ák meyke nak aqsok apagkok tén han ma'a apmopyóseka nak chá'a, makke elwet'ak. Kelyamakak apaxkok élnapma ekhem; apasmok sa' eyke ko'o, ko'o sektáha nak Wesse', makxayhek sa' chá'a, ko'o sektáha nak Israel Dios apagkok.

¹⁸Wának sa' katyapok yegmen ényé m'a neyseksa egkexe meykexa nak énxet tén han ekteyapmakxa chá'a yegmen ma'a neyseksa nak élyapwátegweykenxa xapop; ekyetnamakxa yegmen sa' atnessásekxak ma'a meykexa nak énxet, wának sa' kanyehek yegmen ma'a ekyamáyekxa nak xapop.

¹⁹Aknekxak sa' ko'o yámet cedros ma'a yókxexma meykexa nak énxet, tén han yámet acacia, tén han ma'a yámet élmope nak exnamok arrayán tén han ma'a olivo yámet; atekkesek sa' yámet pino m'a ekyamáyekxa nak xapop yetlo m'a yámet élwenaqte abeto tén han ma'a yámet ciprés,

²⁰yaqwayam sa' elwetak apyókxoho énxet tén han elya'asagkoho', tén han etaqmelcheshok apkelányo, tén han elyekpelkoho' ektáha ko'o sélane yetlo sekmowána xa, ko'o sektáha nak Wesse', tén han ektáha sélántekkesso ko'o sektáha nak Dios Sektaqmalma m'a Israel.”

²¹Aptáhak Wesse' egegkok se'e, Jacob wesse' apwányam apagkok nak: “Kéleykmássesso, kólchempoho, kólyentementa apkelmasma nak chá'a, kólmeyágwata m'a ektémakxa nak chá'a kélsexnánémaxche'.

²²Hẽltennáseta yaqwánxa katnehek egmonye', hẽltennásekxoho nahan ektémakxa axta m'a nentámen axta, ageyxhok sa' negko'o; henlegés aqsok peya nak kaxegma', yaqwayam sa' agya'asagkohok ekwánxa katnehek.

²³Hẽltennés sa' yaqwánxa katnehek natámen, henxekmós naqsók kélteme aqsok ekha élmowancha'a. Kóllána sa' kélewagkexa enxoho kóllána', ektaqmalma essenhan ma'a ekmaso nak, aqsok yaqwayam enxoho negko'o agè' tén han hẽlyegwakkasek.

²⁴¡Mékoho kélancha'awók eyke kéxegke, megkólwanchek kóllának ma'a aqsok! Eltaqnaweykpohok apagko' nahan chá'a m'a ektáha nak chá'a apkelpeykessamo kéxegke.

²⁵“Éltamhók axta ko'o éphagwak xama énxet ma'a ekpayho nak teyapmakxa ekhem; ekwóneyha axta apwesey, tén axta apyephagwa'a m'a ekpayho nak nexcheyha. Máxa axta yelpa' aptemessásak apkelteyammeyncha'a m'a kelwesse'e apkeláneykha nak chá'a apkelókxa; máxa axta aptáhak ma'a aptémól'a apkelane yátegwáxwa eyélaqtések yelpa' m'a apmagkok.

²⁶¿Yaqsa axta eklegassama sekxók eyeynókxa axta xa yaqwayam enxoho agya'asagkoho'? ¿Yaqsa axta éltenneykencha'a sekxók axta, yaqwayam enxoho anxének ekpayhawo ektémakxa? Méko kélxama kéxegke kélxeyenma xa, méko eklegaya xama enxoho kélpeywa.

²⁷Ko'o axta seklegasso sekxók eyeynókxa axta m'a Sión, ko'o axta nahan seyáphasso xama apseykha amya'a m'a Jerusalén séltémo eltennaksek peya elwaták makham ma'a énxet'ák apagkok.

²⁸Élyaháha axta ko'o, méko axta xama enxoho ekwe m'a aqsok kéláyókxa nak; méko axta m'a yaqwayam enxoho agkések sekpeywa, méko axta m'a yaqwayam enxoho heyátegmowagkokxak sektáhakxa sélmaxneyeykha.

²⁹¡Mékcha'awo agko' ekyókxoho m'a! Méko xama aqsok kalanagkok; kéleykmássesso aqsa, meyke nak ekyennaqte.