Read Lengua Sur Isaías 43 Bible Online

Isaías 43 - Lengua Sur bible

Isaías 43

¹Aptáhak kaxwók xép apcháneya Wesse' egegkok se'e, Israel, ektáha axta apkelane, Jacob ektáha axta aptekkesso: “Nágyé aqsa, ekwagkassek ko'o exchep teyp; ekwóneyha apwesey, xép apteme ahagkok.

²Peyk sa' agkok eyeykhekxak neyseksa yegmen, ko'o sa' atnehek sekxegexma, peyk sa' agkok eyeykhekxak neyseksa wátsam, meweywagkek sa'; peyk sa' agkok exog neyseksa táxa, memyetek sa', megkawatnek sa' xép ma'a táxa eyáléwe nak.

³Hakte ko'o sekteme Wesse' apagkok, apwagkasso teyp, Dios Sektaqmalma nak ma'a Israel. Ekmomchek axta ko'o exchep; ekyánmagkassegkek axta ekyaqmageykekxa exchep ma'a Egipto, Etiopía tén han Sabá,

⁴hakte leklamók axta ewáxok kélmenyeyk axta kóltéhek kéláyo, eyásekhayók axta nahan ko'o exchep. Éxakhamchek axta ko'o énxet'ák sekmáheyo amok xép éxakhamchek axta pók aptémakxa énxet'ák sekmáheyo awagkasek teyp.

⁵Nágye' aqsa, ekheyk ko'o xamók xép. Wának sa' ko'o elchexyók énxet'ák apagkok yaqwayam ewakhegwata', sa' elenyenták ma'a teyapmakxa ekhem nak tén han ma'a taxnegwánxa ekhem.

⁶Sa' atnehek wának nexcheyha s'e: ‘Hélmeyásekxa’ sa', keñe sa' nepyeyam atnehek wának se'e: ‘Ná elmeyow aqsa. Kólnaqlanta sa' étchek apkelennay'a tén han kelwán'ák apheykha nak ma'a makhawo', néxa xapop nak keso nélwanmeygkaxa,

⁷cham'a apyókxoho ekhémo nak chá'a sekwesey ektáha axta ko'o sélane tén han sélántekkesso, sélane axta ko'o yaqwayam kataxchek seyeymáxkoho.’

⁸“Kólána elchexyók makham énxet'ák ahagkok, meyke nak apaqta'ák apaqta'ák eykhe eghak, tén han ma'a meyke nak apeyk'ák apeyk'ák eykhe eghak.

⁹Énxet'ák, kólaqnekxa kélyókxoho, kólyepetchekxa kélmók pók aptémakxa nak chá'a énxet'ák ¿Yaqsa axta xama nepyeseksa xa énxet'ák nak apkeltenneykencha'a chá'a s'e aqsok nak? ¿Yaqsa axta xama aplegassama chá'a m'a ektémakxa axta nentámen? Kólyentementa sa' ektáha apweteykegkoho yaqwayam sa' exének ektáha naqso', yaqwayam sa' kahaxnaxkoho' keñe sa' kaxénaxchek ektáha naqso'.”

¹⁰Aptáhak Wesse' egegkok se'e: “Kéxegke kélteme kélweteykegkoho chá'a aqsok sélane, kéltáha nak séláneykha, sélyéseykha axta yaqwayam hélyekpelkohok chá'a tén han héláwho', tén han hélya'asagkohok chá'a yaqsa ko'o. Méko axta xama aqsok kéláyókxa maweykxa axta ko'o, méko sa' nahan katnehek xama enxoho m'a netámen sa'.

¹¹Ko'o aqsa exakkók sekteme Wesse'; méko pók apmopwána enxoho elwagkasek teyp énxet.”

¹²Aptáhak Wesse' egegkok se'e: “Ko'o séltennáseykha tén han seklegasso: ko'o sélwagkasso teyp; háwe m'a mók aqsok kéláyókxa eñama nak mók nekha, kéxegke kélteme kélweteykegkoho.

¹³Ko'o sekteme Dios eyeynamo m'a sekxók axta. Méko xama aqsok hexyánegkesek ko'o. Méko kamasséssók ma'a aqsok sélane nak chá'a.”

¹⁴Aptáhak Wesse' egegkok se'e, cham'a Dios Aptaqmalma nak Israel, apkelwagkasso axta teyp: “Aláphaksek sa' ko'o énxet'ák ma'a Babilonia yaqwayam alwagkasek teyp kéxegke, wának sa' elmeykesagkok ekyókxoho atña'ák, apkellegeykegkoho ekmáske sa' katnekxak élpayheykekxa nak chá'a apkelwáxok ma'a caldeos.

¹⁵Ko'o sekteme Wesse', ektáha nak sélane m'a Israel, Dios Sektaqmalma, wesse' apwányam kélagkok nak kéxegke.”

¹⁶Apmeykessek axta xama ámay Wesse' egegkok ma'a neyseksa wátsam ekwányam, xama ámay neyseksa m'a yegmen ekyennaqte nak élyaqyahayam;

¹⁷apkeláphássek axta apxámokma apagko' sẽlpextétamo apkeltamho elántaxnegwók ma'a, yetlo yátnáxeg apkelyenyawasso apagkok tén han yátnáxeg, yaqwayam emasséssók. Apkelyaqnenágkek axta, mopwanchek axta apmako elchempekxak néten; máxa pápa' táxa eksapane axta aptamhágkok apsawheykpoho.

¹⁸Aptáhak kaxwók apkeláneya énxet'ák apagkok Wesse' egegkok se'e: “Nágkaxén kaxwók kélwáxok ma'a hemaxta. Nágkaxén kaxwók kélwáxok ma'a aqsok nentámen axta.

¹⁹Alának sa' ko'o kaxwók axnagkok aqsok, kaxwók sa' kólwetak katyapok. Alának sa' ko'o xama ámay ma'a yókxexma meykexa nak énxet, keñe sa' wátsam ma'a xapop megkatyapmakxa nak xama aqsok.

²⁰Heyáwhok sa' ma'a aqsok nawha'ák élleykha nak naxma, cham'a semheg nawha'ák nak tén han ma'a xápen, hakte atekkesek sa' yegmen ma'a yókxexma meykexa nak énxet, tén han wátsam ma'a xapop megkatyapmakxa nak xama aqsok, yaqwayam sa' agkések apyenéyak ma'a énxet'ák ahagkok sélyéseykha axta,

²¹cham'a énxet'ák sélane axta yaqwayam hélpeykeshok ko'o.

²²“Keñe exchep Israel, mehewóneykha chá'a, lekleykmek aqsa chá'a sétleykha exchep, Jacob.

²³Mehegkéssók ma'a nepkések apkelwatno, mehélméssók ma'a apnaqtósso apkelnapma nak yaqwayam enxoho heyáwho'. Megkaleklágweykmok sélmaxneyeykha m'a aqsok segkésso naqsa apagkok nak, mayampósseykmok sélmaxneyeykha m'a aqsok ekmátsa nak ekpaqneyam éten agkok.

²⁴Mehetegyessók ma'a pa'at ekmátsal'a ekpaqneyam yaqwayam enxoho hesantagkasek etnehek aqsok segkésso naqsa, mehepeykessáseykekxak ewáxok hesantagkasek ma'a apnaqtósso apkelnapma nak pexmok agkok. Keñe ko'o éleklágwokmek ma'a mey'assáxma nak xép; eyampóssekmek ma'a aptémakxa ekmaso nak.

²⁵“Ekmasséssek eyke aqsa ko'o m'a aqsok ekmaso nak apkelane eñama sekteme Dios apagkok, megkaxénwakxók sa' chá'a ewáxok ma'a mey'assáxma nak.

²⁶Yetneyk sa' agkok yaqwayam hexének ko'o, ólmahagkok sa' ma'a sẽlyekpelchémókxa nak. Exének sa' ma'a aqsok apmáheyo exének kataxchek sa' kexa apteme meyke aptémakxa.

²⁷Apkeláneykegkek axta melya'assáxma m'a apmonye'e axta apyapmeyk nano', énmexeykekxeyk axta m'a apkelxekmósso axta exchep,

²⁸aptawáseykha axta tegma appagkanamap ahagkok ma'a kelwesse'e apagkok axta exchep; axta keñamak seyhayo ko'o kélmassésseykmo m'a Israel, cham'a Jacob, eyhayók axta kélxéneykencha'a ekmaso.