Read Lengua Sur Isaías 45 Bible Online

Isaías 45 - Lengua Sur bible

Isaías 45

¹Apteméssessek axta Wesse' egegkok wesse' apwányam ma'a Ciro, apmeyk axta apmek apkelya'assamakxa yaqwayam enxoho etnehek apkeláneykha apyókxoho énxet'ák keso náxop tén han yaqwayam elyementók chá'a apkelmeykha apkenchesso kempakhakma m'a kelwesse'e apkelwányam nak. Apkeltamhók axta nahan kólmeykessesek chá'a átog tegma apkelyawe apmonye' Ciro m'a Wesse' egegkok meyke enxoho xama énxet apmopwána yápekxa'. Tén axta aptáha apcháneya s'e:

²“Axog sa' ko'o apmonye' exchep, alpeykásekxak sa' ma'a egkexe élekhahéyak nak alpáxqátek sa' ma'a átog sawo élyexwase élyenma nak nekha'a étkók sa' atnessásekxak ma'a sawo kélápeykekxexa nak chá'a átog.

³Almések sa' ko'o exchep ma'a aqsok élmomnáwa élpowásamáxche nak, aqsok ekxámokma kélxata nak ma'a kañe' kélpóssamakxa nak chá'a aqsok, yaqwayam sa' ey'asagkoho', ko'o sektáha nak Wesse', Israel Dios apagkok, sekwóneykencha'a exchep.

⁴Ekwóneykha axta ko'o exchep eñama seyásekhayo m'a séláneykha Jacob, cham'a Israel, aptáha axta sélyéseykha, ekméssegkek axta nahan yaqwayam ékpelchekpohok apteme ekha kéláyo, cháxa apmeykencha'a nak, neyseksa mehey'áseyak eykhe ko'o exchep.

⁵Ko'o sekteme Wesse', méko pók; méko pók Dios mók nekha. Eltáméssegkek axta ko'o exchep yaqwayam elnapakpok neyseksa mehey'áseyak,

⁶yaqwayam enxoho kólya'asagkohok méko xama enxoho sekhawo ko'o m'a ekyókxoho teyapmakxa ekhem nak tén han ma'a taxnegwánxa ekhem nak. Ko'o sekteme Wesse', méko pók.

⁷Ko'o sélane m'a élseyéxma tén han ekyaqtéssóxma, sektekkesso nahan ma'a ektaqmalma nak negha tén han ma'a ekmaso nak negha. Ko'o sélane chá'a xa ekyókxoho aqsok nak, sektáha nak Wesse'.

⁸“Néten sa' kañék ko'o wáphaksek ma'a élmallahanchesso nak énxet'ák, ektémól'a katyamok ma'a yálye tén han ekmámeye, kamok sa' takha' m'a xapop; máxa ekyexna sa' katnehek katekkesek ma'a nélwagkásamáxche teyp keytek sa' nahan xamók ma'a ekpéwomo nak nentémakxa.”

⁹Aphawók pók ma'a yátegwáxwa, mopwanchek elátegmoweykpok ma'a ektáha nak apkelane. Megkatnehek kának yelpa' ektáha nak apkelane s'e: “¿Yaqsa apkelana?”, Megkatnehek nahan kának apkelane nak chá'a aqsok étkók éltaqmalma s'e: “Mopwanchek xép aptamheykha.”

¹⁰Mopwanchek nahan xama kélketche elxénmakha ekmaso chána eñama ektekkesso keso náxop.

¹¹Aptáhak Wesse' egegkok se'e, cham'a Dios Aptaqmalma nak Israel, ektáha axta apkelane: “¿Hélmaxneyha enxoho sa' eykel'a ko'o kéxegke sekteméssessamakxa m'a étchek nak ko'o? ¿Hélxekmósagkoya sa' kéltamhókxa enxoho chá'a atnehek sélane aqsok?

¹²Éláneyak axta ko'o m'a xapop tén han énxet yaqwayam exmakha m'a kañe', émek axta ektemék sekpeykessama m'a néten tén axta séltémo kalántépok ekyókxoho m'a élápogwátéyak nak.

¹³Ko'o axta séltémo etyapok ma'a Ciro yaqwayam enxoho emallánek nepyeseksa m'a apkelenmexma, waxyawássesek sa' nahan apxega m'a ekyókxoho ámay; sa' elánekxak tegma apwányam ahagkok ma'a, sa' elántekkesek énxet'ák ahagkok kélnaqleykekxa axta megkatnahakxa apkelókxa m'a, meyke apkeltémo kólyánmagkasek tén han ekyaqmageykekxa apkelántekkesso.” Wesse' egegkok, ekha nak apyennaqte apxeyenma xa.

¹⁴Aptáhak apcháneya Wesse' egegkok Israel se'e: “Elyelqakpok sa' aqsa nápaqtók xép ma'a énxet'ák Egipto apkeltamheykha nak chá'a yókxexma, tén han ma'a énxet'ák ekha nak chá'a aqsok apkexeykekxa m'a Etiopía, tén han ma'a énxet'ák Sabá, cham'a énxet'ák apkelwenaqte nak, apkelásenneykha naqsa sa' etnehek; elxog sa' neptámen xép yetlo kélpextete cadenas, eltekxeyagkok sa' aptapnák xóp apmonye' exchep tén sa' etnehek yának se'e: ‘Naqsók apha kélnepyeseksa kéxegke Dios, méko pók, méko pók kéláyókxa.’”

¹⁵Xép apteme Dios magwete, Dios apwagkasso nak teyp ma'a Israel.

¹⁶Elmegqágwakxohok sa' apyókxoho m'a apkelánéyak nak chá'a aqsok kéleykmássesso, melya'asagkehek sa' aptamhágkaxa, elesmésakpok sa'.

¹⁷Apwagkassek eyke teyp Wesse' egegkok ma'a Israel, apwagkassek teyp meyke néxa, memegqáyhek sa' chá'a xama enxoho, megyaháxeheykha sa' chá'a apmegqakto.

¹⁸Aptáhak appeywa ektáha axta apkelane néten se'e, cham'a apteme nak Dios, tén han Wesse' egegkok, apkelane axta xapop tén han aptekkesso axta, ektáha axta appekkenma, apkeláneya axta háwe yaqwayam keytek aqsa meyke aqsok ma'a kañe' yaqwayam exek nahan énxet ma'a: “Ko'o sekteme Wesse', méko pók.

¹⁹Meyxaxkók ko'o apaqmétek mapaqméswomek nahan ma'a kañe' ekyáqtéssamakxa nak exma keso náxop. Matnehek nahan alának Jacob aptawán'ák neptámen se'e: ‘Hélchetamsakxa m'a meykexa nak aqsok.’ Naqsók ko'o atnéssesek sekpeywa, ko'o sektáha nak Wesse', axének chá'a m'a aqsok ekpéwomo nak.

²⁰“Kólaqnekxa', kólchexyem, kólchaqnágwatámho kélyókxoho s'e énxet'ák kéleymomáxche nak megkóletsapma. Melya'áseyak aqsok ma'a apkelseykha nak chá'a aqsok kéleykmássesso apagkok yántéseksek tén han apkelpaqhetchesso nak chá'a m'a aqsok kéláyókxa megkamowána nak hegwagkasek teyp.

²¹Kólpaqmet, kólxén aqsok kélwete, kólteme chá'a kólmaxneyha kélmók kélmako enxoho chá'a kólmaxneyha s'e: ¿Yaqsa axta éltenneykha sekxók eyeynamókxa axta xa aqsok nak? ¿Yaqsa axta eklegasso m'a nanók axta? ¿Háweya axta ko'o, sektáha nak Wesse'? Méko pók Dios. Ko'o sekwánxa ahagkok sekteme Dios sélmallahanchesso aqsok ekmaso énxet'ák ahagkok, tén han sélwagkasso teyp.

²²“Énxet'ák, kélheykha nak ekyókxoho apkelókxa keso náxop hélyo'óta ko'o, ko'o sa' alwagkasek teyp, hakte ko'o sekteme Dios, méko pók.

²³Ekxénaxchekxók ko'o ahagko', ekxénchek ma'a amya'a ekmámnaqsoho nak, katnehek sa' nahan xa sektáhakxa nak sekxeyenma: apyókxoho énxet sa' eltekxeyagkok aptapnák emonye' ko'o, apyókxoho énxet sa' hexének ko'o hélpeykesho'.

²⁴Sa' etnehek elpaqmétek se'e: ‘Wesse' egegkok aqsa yetnók ma'a negmallane nak tén han negyennaqte.’ Elmegqágwakxohok sa' apyókxoho m'a setaqnagko nak chá'a ko'o.

²⁵Ko'o sa' kañék elmallánek apyókxoho m'a énxet'ák Israel, kaqheykha sa' apkelwáxok hélanok ko'o.”