Read Lengua Sur Isaías 48 Bible Online

Isaías 48 - Lengua Sur bible

Isaías 48

¹“Kóleyxho s'e, Jacob apnámakkok, kélwesey nak Israel, kélteme nak Judá aptawán'ák neptámen; kélxeyenma nak naqsók ma'a Wesse' egegkok apwesey; kélwóneykha nak chá'a Israel Dios apagkok, meykexho kélyeheykekxoho, tén han kéltémakxa ekpéwomo;

²kélxeyenma nak chá'a kéleñama tegma apwányam aptaqmalma tén han kélpasmeykekxa m'a Israel Dios apagkok, apwesey nak Wesse' ekha apyennaqte.

³Eklegassegkek axta ko'o kéxegke sekxók eyeynókxa axta m'a aqsok nentámen axta; ko'o ahagko' axta nahan sélya'assásegwayam. Pelakkassek axta nahan sélana, naqsók axta nahan táhak élántepa.

⁴Ekya'ásegkók axta ko'o exchep apteme ekyennaqte apwáxok, tén han aphémo apyennaqte m'a sawo, tén han ekhémo ekyennaqte nápat ma'a sawo' ekyexwase,

⁵la'a seklegassama axta m'a nanók axta, éltennassegkek axta amonye' yaqwayam katnehek. Keñe mopwanchek etnehek exének se'e: ‘Aqsok seyáyókxa élane xa, cha'a élane m'a kéleykmássesso sélane axta.’

⁶Aplegayak xép ekyókxoho xa; elano, keñe sa' ey'asagkohok ektáha naqso'. Añeksek sa' kaxwók xép axnagkok aqsok, cham'a aqsok ekyexamaxche méteya nak xép,

⁷aqsok kaxwe élánamáxche nak, háwe m'a nano' agko' axta, meñeya nak makham xép kaxénaxchek se'e negwánxa nak, keñe sa' mopwanchek etnehek se'e: ‘Ekya'ásegko'.’

⁸Meñeyk xép kaxénaxchek xa, meteyk nahan, hakte yókxoho ekhem ekteme meyke apeyk'ák. Ekya'ásegkók ko'o exchep apteme melane chá'a m'a aptáhakxa enxoho appeywa, apkeltamhomakpek axta exchep ekyennaqte apwáxok ma'a apyetnamakxa axta egken awáxok.

⁹“Axta eyke apekhésamaxchek alwok eñama seyásekhayo sekwesey, seyeymáxkoho axta keñamak sekmágweykekxo yaqweykenxa atnehek, tén axta mamassésseykmo.

¹⁰Ekmopessáseykekxeyk axta apyempehek, háwe eyke m'a kélteméssessamakxal'a sawo ekmope, axta eyke eyaqxegkessók ma'a kañe' ekyetnamakxa nak nenlegeykegkoho ekmáske, ekho nak táxa axagkok.

¹¹Seyásekhamaxchekxoho agko' axta keñamak sekteméssessama xa ektáha nak, hakte megkólwanchek kóltawasha m'a sekwesey. Magwohok sa' ko'o kólmések xama enxoho seyeymáxkoho m'a mók aqsok.

¹²“Israel, yeyxho sekpeywa, Jacob, sekwóneykha axta: Ko'o sekteme wánxa xama Dios, ko'o sekteme eyeynókxa tén han ektemegwánxa néxa.

¹³Sekmowána axta ko'o keñamak séláneya m'a xapop, sekmowána axta nahan keñamak sekpeykessama m'a néten; xama axta sekxéna élwesey, yetlómók axta nahan élánteyapma.

¹⁴Kólaqnekxa sa' kélyókxoho kéxegke, kóleyxho sa' nahan: ¿Yaqsa axta kélxama kéxegke aplegassama ekmáheyo katnehek xa: apmáheyo etnéssesek ekxeyenmakxa nak ko'o ewáxok atnéssesek Babilonia m'a énxet ektáha axta ko'o sélyéseykha tén han ma'a énxet'ák caldeos?

¹⁵Ko'o axta sekxeyenma xa, ko'o axta seyáneyeykha tén han séltémo exegma', tásek sa' chá'a katnehek apwayam ma'a apmahágkaxa enxoho chá'a.

¹⁶Hélyepetchegwatámho ko'o, kóleyxho sa' nahan se'e: Sekxók eyeynókxa axta ko'o sekteme meyxamaxkoho apaqmétek; Ekhegkek axta ko'o ektéma axta ekyókxoho xa aqsok nak. Ekméssek eyke ko'o kaxwók sekmowána m'a, ko'o sektáha nak Wesse', eyáphássek nahan.”

¹⁷Aptáhak Wesse' egegkok se'e, apwagkasso nak chá'a teyp, Dios aptaqmalma nak ma'a Israel: “Ko'o sekteme Dios Wesse' apagkok; élxekmóssegkek axta ko'o exchep aqsok yaqwayam nak kapasmok, ekxekmóssegkek axta m'a ámay eyeyméxchexa nak étlók.

¹⁸¡Kaxtemék axta apkelyeheykekxoho m'a séltémókxa nak chá'a etnehek! Kayágkok axta ektaqmalma apha kaxhok axta m'a ektémól'a kayágkok yegmen ma'a wátsam, kaxhok axta ektaqmeleykekxa apha m'a ekweykenxal'a élyaqyahayam élyawe m'a wátsam ekwányam,

¹⁹apxámok axta nahan etnehek ma'a aptawán'ák neptámen, exhok axta apxámokma m'a ekweykenxal'a ekxámokma yagkamex ma'a neyáwa wátsam ekwányam; mamasséssemek axta nahan ko'o, matekkesek axta nahan ma'a sekhakxa nak.”

²⁰Kólántép Babilonia, kólxegánem nepyeseksa m'a énxet'ák caldeos. Kóllegés yetlo kélpáxameykha kélátseykha s'e amya'a nak, kólya'assásegwók ekweykmoho m'a néxa xapop nak. Kólteme kólpaqmétek se'e: “¡Apwagkassek teyp Wesse' egegkok ma'a Jacob cham'a apkeláneykha nak!”

²¹Apkelya'assegkek axta eykhe m'a yókxexma meykexa nak énxet, axta eyke kalnapmak ekhem; appáxqatmeyk axta meteymog aptekkessama ekyawe agko' ma'a yegmen.

²²Méko ektaqmalma apheykha m'a élmasagcha'a nak apkeltémakxa. Wesse' egegkok apxeyenma xa.