Read Lengua Sur Isaías 50 Bible Online

Isaías 50 - Lengua Sur bible

Isaías 50

¹Aptáhak Wesse' egegkok se'e: “¡Nagkólána aqsa atneyk ko'o sekyamasma Israel ma'a, aptémól'a xama énxet eyenyók ma'a aptáwa', cham'a egken nak kéxegke! ¡Nagkólána aqsa akxakhák ko'o kéxegke ekha ekyánmaga yaqwayam kóltéhek kélásenneykha naqsa eñama ekha sekméyak aqsok ma'a xama énxet! Kélchexakhamchek kéxegke hakte kélláneykegkek megkólya'assáxma; kélyamasmeyk ma'a Israel, egken nak kéxegke, hakte asagkek kéltémakxa kéxegke.

²¿Yaqsa axta ektéma móteya ko'o xama énxet sekxók axta sekwaya? ¿Yaqsa axta ektéma méko seyátegmoweykegko m'a sélwóneykencha'a axta? ¿Kélanagkamcheya axta ko'o mowanchek alwagkasek teyp? ¿Kélanagkamcheya axta ko'o mowanchek alántekkesek neyseksa aqsok ekmaso? Megkatnohók ko'o apaqhetchesek altamhok keymék ma'a wátsam ekwányam nak tén han wának katnekxak ekyamayéxma m'a wátsam nak; yaqwayam enxoho kaletsapok hem át'ák ma'a kelasma tén han kaltahápok eñama meyke yegmen.

³Wáhakkashok ko'o ekyaqtéssóxma m'a néten, waqlaksohok chá'a m'a apáwa magkenatchesso nak senlapwayam.”

⁴Élxekmóssek ko'o Wesse' egegkok sekmowána sekpeywa yaqwayam enxoho alpeykessásekxak apkelwáxok ma'a apkelyampayo nak. Yókxoho axto'ók chá'a apkeltémo aleyxmakha yaqwayam enxoho weyxhok aptémól'a m'a ekmátsal'a kólxekmósek.

⁵Egkéssek ko'o sekya'áseykegkoho m'a Wesse' egegkok, mataqheyásawok nahan, mapekkenákxak netámen.

⁶Ekméssek nahan yaqwayam etekpogmakha éyapok ma'a apmáheyo nak chá'a etekpogmakha, ekméssek nahan yaqwayam yeptek áwa' ahátog ma'a apmáheyo nak chá'a heyápetchesek. Makpóssásak han nahát ma'a sey'ásseyam nak chá'a ekmaso tén han ma'a séxpaqhe nak chá'a apyamánog.

⁷Wesse' egegkok chá'a ko'o sepasmo: Ékeso éñamakxa mañeykegko nak chá'a m'a sélya'ásseyam ekmaso nak; Ékeso éñamakxa sekyennaqtama nak, máxa ektemék ma'a ektémól'a meteymog, hakte ekya'ásegkók peya mamegqágwakxeyk natámen.

⁸Apheyk ko'o sekhakxa m'a semasma nak chá'a: ¿Apyetnéya kélxama apmáheyo hexének ko'o? ¡Ólmeyekxak sa' ólpaqméswók ma'a aphakxa nak énxet segyekpelchémo! ¿Apyetnéya xama énxet apkenè kapéwók hesexnenak ko'o? ¡Tásek sa' exegmak héltennaksek!

⁹Wesse' egegkok chá'a ko'o sepasmo; ¿Yaqsa awanchek kának héllegássesagkohok ko'o? Elmassegwók sa' apyókxoho m'a sélenmexma nak ko'o, máxa sa' etnahagkok ma'a apáwa nentaxno askok ektól'a.

¹⁰Kéxegke kéláyo nak chá'a Wesse' egegkok tén han kélháxenmo nak chá'a appeywa m'a apkeláneykha: kélxegkek agkok ekyáqtésakxaxma, meyke éltátchessesso m'a élseyéxma, kólteme kéláyo m'a Wesse' egegkok kólyepetchegwakxa m'a Dios kélagkok.

¹¹Keñe sa' kélyókxoho kéláléwasso nak táxa, kélláneykegkokxa nak yágke eyáléwomól'a táxa naw'ék, kalnápekxohok sa' agkok ma'a táxa eyáléwe kélagkok nak, kalnápekxohok sa' agkok ma'a yágke kélagkok kéláléwasso kélagko' nak naw'ék kéxegke. Yáphássesek sa' Wesse' egegkok xa kéllegeykegkoho nak kóletsapok sa' neyseksa kéllegeykegkoho ekmáske.