Read Lengua Sur Isaías 51 Bible Online

Isaías 51 - Lengua Sur bible

Isaías 51

¹Kóleyxho sekpeywa, kélyókxoho kélmámenyého nak chá'a kóltéhek ekpéwomo kéltémakxa tén han sélchetamso nak chá'a ko'o —axta aptáhak Wesse' egegkok. Kóllano meteymog kélyaqténneykegkaxa axta chá'a kéxegke, ekheykegkaxa nak meteymog kélweykekxexa axta chá'a;

²kaxénwakxoho kélwáxok ma'a Abraham, kélyáp axta kéxegke, tén han ma'a Sara egken axta, ektáha axta élántekkesso kéxegke keso náxop. Apxakkók axta sekxók sekwóneykencha'a ko'o m'a, tén axta séltémo exámekxak ma'a aptawán'ák neptámen.

³Kapyóshok sa' ko'o alanok ma'a Sión, tegma apwányam apmopsagko nak apyókxoho. Namyep éltaqmalma sa' atnessásekxak ma'a ekyamáyekxa nak exma xapop yókxexma meykexa nak énxet, ektéma axta m'a Edén apkeneykekxexa axta aqsok ma'a Wesse' egegkok. Keytek sa' ekpayheykekxa egwáxok ma'a tén han negátseykha, tén han negmeneykmasso tén han negháxenmo m'a kélpáwasso ekmátsa.

⁴“Énxet'ák ahagkok, kóltaqmelchesho kélháxenmo sekpeywa, kóleyxho sekpeywa kélyókxoho kélheykha nak chá'a ekyókxoho apheykegkaxa énxet'ák: alya'assásegwók sa' ko'o kaxwók nélxekmowasamáxche ahagkok tén han segánamakxa ahagkok, kalsássesek sa' exma m'a énxet'ák.

⁵Chágketwa'ak kaxwók ma'a ekpéwomo nentémakxa ahagkok, ketók kaxwók ekweykxa m'a nélwagkásamáxche teyp ahagkok; yetlo sekmowána sa' ko'o atnehek alanha m'a énxet'ák. Héleyxek sa' ko'o m'a énxet'ák apheykha nak apkelókxa neyáwa wátsam ekwányam, yásenneykxak sa' ma'a ektémakxa nak ko'o sekmowána.

⁶“Kólenmexho néten, keñe sa' kólenmexentámhok náxop: máxa éten sa' katnehek kamassegwók ma'a néten, kakpelchexchek sa' ma'a xapop, máxa apáwa nentaxno sa' katnehek, keñe sa' ma'a énxet apheykha nak ma'a awáxok máxa páye sa' etnehek eletsapok. Megkamassegwomek sa' eyke m'a nélwagkásamáxche teyp ahagkok nak, meyke néxa sa' katnehek ma'a ekpéwomo nentémakxa sekpekkenma nak ko'o.

⁷“Kóleyxho sekpeywa, kéxegke kélya'áseykegkoho nak aqsok ekpéwomo, kélpekkenma nak chá'a kélwáxok ma'a nélxekmowásamáxche ahagkok. Nágkóle apkelxéneykha ekmaso nak chá'a m'a énxet'ák, nágkólho kalyélaqtések ma'a apkelya'ásseyam ekmaso nak,

⁸hakte elxohok sa' elmassegwók ma'a apáwa nentaxno askok ektól'a, ektémól'a m'a nepkések apwa' askok ektól'a. Megkamassegwomek sa' eyke m'a ekpéwomo nentémakxa sekpekkenma nak ko'o, yókxoho apyeyam sa' chá'a keytek ma'a nélwagkásamáxche teyp ahagkok nak.”

⁹Exatakha' Wesse' egegkok exatakha' yetlo apmopwána, emekxa apyennaqte; exatakha' aptéma axta m'a nentámen axta cham'a nanók agko' axta. Apkelyaqtenneykegkek axta exchep ma'a Rahab, cham'a yegmen askok ekyawe nak;

¹⁰apyamassegkek axta m'a wátsam ekwányam cham'a yegmen ekmattawóneg agko' nak, ámay axta apteméssáseykekxak ma'a kañók agko' nak wátsam ekwányam yaqwayam enxoho elyeykhekxak ma'a kélmallahanchesso nak aqsok ekyentaxno.

¹¹Sa' etnahagkok han elwaták ma'a apkelwagkasso nak teyp ma'a Wesse' egegkok, elántexek sa' Sión yetlo apkelwehéseykha élpayheykekxa apkelwáxok; katnahagkok sa' chá'a élátseykha nápaqta'a; elwetak sa' élpayheykekxa apkelwáxok tén han apkeleñémo, kamassegwók sa' ma'a ektémakxa nak apkellekxagweykha tén han apkellegeykegkoho ekmáske.

¹²“Ko'o ahagko' sélwasqakkáseykekxoho chá'a kéxegke. ¿Yaqsa kéláya chá'a kéxegke? ¿Énxet ya? ¿Keya kélayeyk chá'a kéxegke m'a énxet'ák apkeletsapmo nak chá'a, aphémo nak pa'at?

¹³¿Péya kalwagqamagkok ma'a Wesse' kélagkok, ektáha axta apkelane, ektáha axta nahan appeykesso néten ma'a yaphope tén han apkelane m'a xapop? ¿Péya kólpexyennók aqsa chá'a kélaye yókxoho ekhem eñama apkeltaqnawéyak ma'a ektáha nak chá'a apnaqtawáseykegkoho, appencheséyak nak aptamhágkaxa yaqwayam emasséssók? ¿Háxko eyke ekyetnakxa xa apkello nak?

¹⁴Kaxwók sa' kólántekkesek ma'a énxet'ák apkelmomap nak; meletsepek sa' ma'a kañe' kélxátamakxa nak, yetneyk sa' nahan katnehek ma'a aptéyak.

¹⁵“Ko'o sekteme Dios kélagkok, sekwesey Wesse' ekha sekyennaqte; ayawhaksohok chá'a ko'o yegmen ma'a wátsam ekwányam nak, keñe kapáwak chá'a awáxok ma'a élyaqyahayam agkok nak,

¹⁶ekpeykessegkek axta ko'o m'a néten éláneyak axta nahan xapop. Ekméssegkek axta ko'o exchep nélxekmowásamáxche ahagkok, eyáhakkassegkek axta emék sekmasma. Axta ektemék ko'o sélanagkama énxet'ák apheykha nak Sión se'e: ‘Kéxegke kélteme énxet'ák ahagkok.’”

¹⁷Kaxatakha Jerusalén, kaxatakha', kampekxa néten. Legágkók xe' Wesse' egegkok aplo, máxa entáhak ma'a ekyena enxoho xama egheykok kélyeta m'a vino, yamásawók ekyena ekwokmoho eyaqha.

¹⁸Méko xama enxoho étchek xe' yaqwayam enxoho éntamha chá'a; méko xama enxoho étchek xe' éktegkesso nak yaqwayam emha chá'a ámek.

¹⁹Keso ánet aqsok ekmaso eyáhapwaya nak kéxegke s'e: kélmassésseykmek ma'a kélókxa kelmomaxcheyk nahan aqsok ekhéyak ma'a kañe', apkeletsepmeyk nahan énxet'ák kélagkok meyk élnapma tén han kempakhakma. ¿Yaqsa sa' kayóshok kalanok kéxegke? ¿Yaqsa sa' kalpeykessásekxak kélwáxok?

²⁰Apkelyelqákpek ma'a étchek, máxa aptamhágkok ma'a popyet kelhanma ekmál'a, aphágkek ma'a ekyókxoho ámay awáxok, eñama ellegassáseykegkoho m'a Wesse' egegkok aplo, eñama appékessáseykekxa aqsok melaqhémo m'a Dios agkok nak.

²¹Ékeso éñamakxa séltamho nak ko'o kóleyxhok se'e, kélheykha nak tegma apwányam ekmaso nak ektémakxa, kéxegke élnápeykha nak chá'a, megkatnaha nak ma'a vino.

²²Aptáhak Dios Wesse' kélagkok se'e ektáha axta apkelmasma m'a énxet'ák apagkok: “Eymentemekxak sa' ko'o kéxegke s'e egheykok élnápeykencha'a nak chá'a kélyeta m'a kañe'; megkólyenekxók sa' chá'a kaxwók ma'a egheykok kélyeta nak seklo.

²³Agkések sa' ko'o m'a apkellegassáseykegkoho nak chá'a, aptéma nak chá'a apkelanagkama s'e: ‘Kólhák náxop, ólyeykhekxak sa' negko'o kéxegke’; Keñe kéxegke kólhagkok chá'a náxop yaqwayam enxoho kólteyammaha kólteméssesek ma'a ektémól'a kólteyammaha xapop.”