Read Lengua Sur Isaías 53 Bible Online

Isaías 53 - Lengua Sur bible

Isaías 53

¹¿Yaqsa sa' megkay'ássemek ma'a amya'a nenlegaya axta negko'o? ¿Yaqsa axta énxet apxekmósa apmopwána m'a Wesse' egegkok?

²Apkeltémok axta exhok Wesse' egegkok ewanák apkeláneykha m'a ektémól'a pánaqte exnók kaxwe ekteyapmal'a, élatchesseyam la'a kepmenák ma'a ekyamakakxa xapop. Apsagkók axta m'a háwe axta apcheymákpoho méko axta m'a ektémakxal'a kélmámenyéhol'a kóllano';

³ewanyaha axta chá'a m'a énxet'ák, etaqnók axta nahan chá'a. Énxet aplegeykegkoho ekmáske axta m'a, apya'áseykegkoho ektémakxa m'a nenlegeykegkoho. Máxa axta kélteméssessók ma'a énxet magmámenyéhol'a anlanok agweta', negwanyeykha axta chá'a, axta anlányo'.

⁴Neyke eykhe apmassésso ektémakxa nélháxamáxche xa, apmeykekxeyk ma'a ektémakxa nak néllegeykegkoho ekmáske. Neganagkamchek axta negko'o Dios apkelyekpexchetma xa, tén han aplegassáseykegkoho tén han apteméssesso mékoho.

⁵Nentémakxa ekmaso neykékhel'a keñamak kélyensáseykencha'a, nentémakxa élmasagcha'a neykékhel'a keñamak aplegeykegkoho ekmáske; egméssek meyke ektáhakxa egwáxok ma'a ektémakxa axta kéllegassáseykegkoho, apkelyense keñamak néltaqmelwokmo.

⁶Nélxegáneykmek negko'o negyókxoho, máxa nepkések nentamheykegkok, nentamheykegkek chá'a enxama m'a negmáheyókxa egagko' nak chá'a antéhek. Apmeyáseykekxeyk eyke Wesse' egegkok ekyókxoho m'a nentémakxa élmasagcha'a nak negko'o.

⁷ Kéltawáseykegkók axta, apchahamakpók axta eyke aqsa, axta nahan epaqmeyesmak xama enxoho; máxa axta aptemék kélyentameykekxo m'a aptémól'a nepkések apketkok kólyentemekxak ma'a aptekyómakxa, apwanmeyeykha axta aqsa, meyke appaqmeyesma xama enxoho, máxa axta aptemék ma'a aptémól'a nepkések kólyesaksek.

⁸Kélyentameykekxeyk axta aqsa nahan meyke kéllánekxésso ektaqmela amya'a, méko axta nahan xama enxoho yaqwayam kamyók; méko axta nahan ekyetnakhassamo enxoho awáxok yaqwánxa katnehek. Kélmasséssekmek axta apha keso náxop, apmatñegkek axta eñama melya'assáxma m'a énxet'ák ahagkok.

⁹Kélátawanyeyk axta nekha' kélátawanyamakxa axta m'a énxet'ák élmasagcha'a nak apkeltémakxa, kélpekkenwokmek axta xamók ma'a énxet'ák ekxámokma nak aqsok apagkok, meykexho eykhe apkelane aqsok ekmaso agko', tén han metne apmopwána amya'a.

¹⁰Mékoho axta apkeltémok etnéssesek Wesse' egegkok apméssama aplegeykegkoho neyseksa apha m'a. Ahóxek sa' nahan katnehek apha eñama apmeyásamákpoho apagko' yaqwayam emátog ekyaqmageykekxa mólya'assáxma, kammohok sa' apkelwet'a m'a aptawán'ák neptámen nak; sa' kañék ekteyapma aqsok yaqwayam nak elának Wesse' egegkok xa.

¹¹Étak sa' ekyaqmageykekxa ektémakxa apha natámen apwete ekxámokma aplegeykegkoho, kapayhekxak sa' apwáxok ma'a apya'ásegwokmo enxoho; elmallahanchesek sa' aqsok ekmaso apxámokma énxet ma'a Wesse' egegkok apkeláneykha appéwomo nak, hakte emekxak sa' ma'a apkeltémakxa élmasagcha'a nak.

¹²Cháxa keñamak Dios peya nak exnéssók nepyeseksa m'a énxet'ák ekyawe nak kéláyo, epasmekxak sa' apkelxawéyak aqsok eñama apkelmallane m'a apkelyennaqte nak, hakte apmeyásamákpók apagko' yaqwayam emátog, máxa énxet ekmaso aptémakxa axta kélteméssessók kélpáxaqtesseykmo m'a énxet'ák élmasagcha'a nak apkeltémakxa, apmeykekxeyk melya'assáxma apxámokma apagko' ma'a énxet, apkelmaxnéssáseykegkek nahan chá'a m'a énxet'ák melya'assáxma nak yaqwayam enxoho megkólyaqmagkásekxeyk chá'a m'a apkeltémakxa.