Read Lengua Sur Isaías 55 Bible Online

Isaías 55 - Lengua Sur bible

Isaías 55

¹“Kólchexyem kélyókxoho hem élnapma nak, kólyahagwata yegmen; meyke nak selyaqye kélagkok kólchexyem, kóltegyágwata hótáhap apaktek meyke ekyánmaga, tén sa' kóltawagkok; kóltegyágwata vino meyke kélyánmagkasso ketse' enxoho tén han weyke nagkeygmenek.

²¿Yaqsa ektéma kélyánmagkassama nak chá'a selyaqye m'a megkatnaha nak chá'a kélto? ¿Yaqsa ektéma kélméssama nak chá'a kélxawe ekyánmaga kéltamheykha m'a aqsok mehegyaqkánegkesso nak chá'a? Kóltaqmelchesho kélháxenmo sekpeywa keñe sa' kóltawagkok ma'a nento éltaqmalma nak, kóltawagkok sa' ma'a aqsok élmátsa nak.

³Hélyo'óta ko'o, kóleyxwatámho sekpeywa, kóleyxho sektáhakxa keñe sa' megkóletsepek chá'a. Alának sa' ko'o ekhémo mók sélpaqhetchásamáxkoho kéxegke meyke néxa, yaqwayam sa' alának ma'a séltennassama axta alának ma'a David eñama seyásekhayo.

⁴Ekteméssessegkek axta ko'o apkemha apmonye' tén han apkelxekmowáséyak chá'a énxet'ák ma'a, yaqwayam enxoho kañék chá'a ekwetamaxche m'a sekmowána.

⁵Elwónmakha sa' xép ma'a énxet'ák melya'ásegko nak; enaqtémegmak sa' elya'áwak xép ma'a énxet'ák melweteya nak, hakte ekteméssessegkek ko'o exchep ekha kéláyo ko'o sektáha nak Wesse' apagkok, Dios Aptaqmalma nak ma'a Israel.

⁶“Kólchetam Wesse' egegkok kélewagkexa nak makham kólwetekxa', kólwónmakha apha nak makham keto'.

⁷Tásek eyenyekxak apkeltémakxa nak chá'a m'a énxet'ák élmasagcha'a nak apkeltémakxa, tásek elwátésagkok ektémakxa nak chá'a élchetámeykha apkelwáxok ma'a énxet'ák ekyentaxno nak chá'a apkeltémakxa; kólyo'ókxa Wesse' egegkok, kélyósekak sa' elanok kéxegke m'a; kólyo'ókxa m'a Dios egagkok, apmopmenyého nak chá'a hempasmok yaqwayam hegásekhekxoho'.

⁸Hakte megkaxnawok ko'o ektémakxa nak élchetamso ewáxok ma'a ektémakxa nak kéxegke élchetamso kélwáxok, megkaxnawok nahan sélane aqsok ma'a ektémakxa nak kéxegke kéllánéyak aqsok —axta aptáhak Wesse' egegkok. Cham'a ektémakxa nak ekyetno néten kóneg ma'a xapop, cháxa ektémakxa ko'o xa élchetamso ewáxok xa tén han aqsok sélane, kóneg egyetnók ma'a ektémakxa nak kéxegke élchetamso kélwáxok tén han ma'a aqsok kéllánéyak nak.”

¹⁰“Cham'a ektémakxal'a ekmámeye kaweywenták eñama m'a néten tén han yeyám appok megkaltaqhók makham ma'a éleñamakxa nak, kayássesek aqsa m'a xapop, kataqmelchesek nahan, kaltektekkesek nahan ma'a aqsok, katekkesek nahan aqsok aktek yaqwayam kólchenekxa', tén han ma'a nento yaqwayam antók,

¹¹cháxa ektémakxa nahan ko'óxa sekpeywa xa mehey'ótek aqsa makham meyke ektekkesso xama aqsok, kalának sekxók ma'a sekmámenyého nak ko'o, katnehek nahan ma'a séltamhókxa enxoho ko'o katnehek.

¹²“Kólántépok sa' kéxegke yetlo ekpayheykekxa kélwáxok ma'a, kólmeyekxak sa' makham kélókxa yetlo meyke ektáhakxa kélwáxok. Kelwet'ak sa' agkok ma'a meteymog élekhahéyak nak tén han ma'a egkexe nak, megkaleysagkók sa' kalmeneykmaksek kalpayhekxak awáxok, kaltekpagmakha sa' amék ekyókxoho m'a yenta'a élyawe élaqnéyak nak yókxexma.

¹³Yámet pinos sa' katyapok keñe sa' megkatyepek ma'a yámet ekha nak am'ák, yámet élmope exnók arrayán sa' katyapok keñe sa' yátape' metyepe'; sa' katnéssesek eyeymáxkoho apwesey Wesse' egegkok xa; katnehek sa' xama aqsok magkenatchesso meyke néxa, megkólmowána kólmasséssók.”