Read Lengua Sur Isaías 56 Bible Online

Isaías 56 - Lengua Sur bible

Isaías 56

¹Aptáhak Wesse' egegkok se'e: “Kóllána chá'a aqsok ekpéwomo tén han ma'a ekpayhawo nak chá'a kóllána', hakte chágketwa'ak ma'a nélwagkásamáxche teyp ahagkok; kaxwók sa' axekmósek sekmowána segwagkassamo nak teyp.

²Apkeleñémo énxet apyetlo nak xa segánamakxa nak tén han apkelane nak chá'a yetlo meyke apyenseyam, apcháyo nak chá'a m'a ekhem sábado metwáseykha nak chá'a, apkeláneykegkoho nak chá'a aptáhakxa yaqwayam melanyek xama aqsok ekmaso.”

³Apya'aweykxeyk agkok Wesse' egegkok xama énxet apkeñama nak mók nekha, megkeyméxchek etnehek appeywa s'e: “Hétnakhaksek sa' ko'o Wesse' egegkok nepyeseksa m'a énxet'ák apagkok.” Megkeymexchek nahan etnehek appeywa énxet kélteme nak yágkelwána s'e: “Ko'o sekteme xama yámet ekyamaye.”

⁴Hakte aptáhak Wesse' egegkok se'e: “apkelakawók agkok chá'a ekhem ahagkok sábado m'a énxet'ák yágkelwán'ák nak, apkelánegko enxoho chá'a m'a sekmámenyého nak chá'a ko'o, melyensakmo enxoho chá'a m'a ekhémo mók sélpaqhetchásamáxkoho nak,

⁵almésagkok sa' ko'o aqsok éltaqmalma agko' megkaxnawo nak ma'a kélketchek apkelennay'a nak tén han ma'a kelwán'ák nak; almések sa' ko'o yaqwayam kaxnagkok apkelwesey kélnaqtáxéséyak meyke néxa m'a kañe' tegma appagkanamap ahagkok nak, cham'a kañe' nak meteymog kélhaxta nepyáwa exagkok; almések sa' meyke néxa apkelwesey, yaqwayam sa' megkamassésaxcheyk xama enxoho.

⁶Keñe sa' ma'a énxet'ák apkeleñama nak mók nekha sey'eykekta ko'o, yaqwayam etnehek sétleykha tén han seyásekhayo, yaqwayam nak etnahagkok séláneykha, apchekawók agkok ma'a ekhem sábado metwáseyncha'a enxoho, melyensakmo enxoho apkelyeheykekxoho m'a ekhémo mók sélpaqhetchásamáxkoho,

⁷anaqlanták sa' ko'o m'a egkexe ahagkok ekpagkanamaxchexa nak alpeykessásekxak sa' apkelwáxok ma'a exagkok ektamhomaxchexa nak chá'a nempeywa nélmaxnagko. Almok sa' ko'o takha' aqsok apkelwatno tén han apkelnapma apnegkenweykekxa chá'a m'a néten nak ekwatnamáxchexa aqsok sélmésso, hakte eltamhakpok sa' ko'o exagkok ektamhomaxchexa nempeywa nélmaxnagko apagkok ma'a apyókxoho énxet'ák.

⁸Wának sa' ko'o elchexyók ma'a apheykha nak makham megkatnahakxa apkelókxa, wának sa' yaqnekxak makham.” Wesse' egegkok apxeyenma xa, apkeltémo axta elchexyók makham elyepetchegwaták israelitas ma'a apkexpaqneykha nak mók nekha.

⁹Kólchexyem, aqsok nawha'ák éllo; kólchempoho, aqsok nawha'ák élleykha nak naxma, kóltáswata nepkések;

¹⁰meyke apaqta'ák tamhágkok ma'a apkeltaqmelchesso nak chá'a énxet'ák ahagkok, massék apkelya'ásegko aqsok. Apyókxoho aptamhéyak semheg meyke élpáwá m'a, megkamowánal'a kalpáwa'; exnagkok aqsa, elyenmaha aqsa; atsek emáwhok enaqtének.

¹¹Semheg meyk át'ák ma'a, megkalyaqkányam la'a katawagkok ektéyak, keláneykha nepkések melya'áseyak aqsok ma'a; aptamheykegkek aqsa chá'a xama m'a apmáheyókxa apagko' nak chá'a etnehek, wánxa aqsa aptegyeykegko m'a apagkok apagko' nak chá'a aqsok.

¹²Etnehek chá'a elpaqmétek se'e: “Antegyagkok sa' vino tén han ma'a anmen agko' nak yaqwayam sa' hẽlnápok. Antamhagkok sa' nahan saka s'e ekhawo nak nentamhágkaxa s'e sakhem nak, essenhan agyeykhássamho'.”