Read Lengua Sur Isaías 59 Bible Online

Isaías 59 - Lengua Sur bible

Isaías 59

¹Megkaweywenték apmopwána m'a Wesse' egegkok, apwanchek hegwagkasek teyp. Megkatnehek nahan meyke apeyk'ák eñohok ektemegweykmohóxma.

²Aqsok ekmaso kélláneyák akke keñamak kéxegke ekhaxtegkessama kélmonye'e m'a Dios; megkólya'assáxma keñamak melányo chá'a kéxegke m'a tén han megyaháxenmo chá'a kélpeywa.

³Tekyawa yapmeyk kéxegke tén han kélnaqtawáseykegkoho chá'a kélnámakkok; kélmowána amya'a chá'a kéltemék, kélxeyenmeyk chá'a m'a aqsok ekmaso nak.

⁴Méko kélxama enxoho kélláneykekxa chá'a kéxegke m'a amya'a ekpéwomo nak. Kélmeyákxeyk agkok chá'a m'a sẽlyekpelchémokxa nak megkólxének chá'a m'a amya'a ekmámnaqsoho nak. Wánxa aqsa kélásenneykekxo m'a kélmowancha'a amya'a nak tén han ma'a kélpeywa megkamámnaqsoho nak; kelláneykegkek kélwáxok ma'a kéltémakxa ekmaso, kéltekkessegkek ma'a aqsok ekmaso nak.

⁵Kélyétekpagkassegkek ma'a yéwa, kélóteykegkek nahan ma'a yaweyke támpagkok; énxet apto enxoho xa yéwa appok nak, yetsapok, apkelpáxqatchek agkok nahan xama énxet, kalántépok ma'a yéwa étkók nétsapmo nak hentakxek.

⁶Melanakpehek apáwa nentaxno xa yaweyke támpagkok nak; méko kawának kataxnekxak apkelótéyak nak xa énxet'ák nak. Asagkók agko' ekyókxoho aqsok apkeláneyak nak chá'a: apkeláneykegkek chá'a aqsok yaqwayam elyennaqtésha apyempe'ék,

⁷wánxa aqsa elya'ammok chá'a m'a aqsok ekmaso nak, yaqwayam enxoho yaqhek chá'a ekmanyehe agko' ma'a énxet meyke nak aptémakxa. Aqsok ekmaso aqsa kélxéneykha apkelwáxok, enaqtawasha chá'a aqsok ma'a apkelmahágkaxa enxoho, esawhohok chá'a.

⁸Melya'ásegkok ma'a ekyetnamakxa nak meyke ektáhakxa egwáxok, méko ekpéwókxa enxoho m'a aqsok apkelánéyak. Éltaqhahéyak ma'a ámay apkelyetlamakxa nak chá'a; melweteyk meyke ektáhakxa egwáxok ektáha nak apkelyetlo xa ámay nak.

⁹Ékeso éñamakxa ekmassa nak negko'o ekyetna negyeseksa m'a nélwagkásamáxche teyp, massék ekyetna ketók ma'a sẽlmallahanchesso nak aqsok ekmaso; nélhaxanmeyk eykhe chá'a élseyéxma, ekyaqtéssóxma aqsa chá'a negweteyk; nélhaxanmeyk eykhe chá'a eyáxñeyo éltátchesso ekhem, keñe nélweynchámeykencha'a aqsa chá'a ekyáqtésakxaxma agko'.

¹⁰Nélpaknameykha aqsa chá'a nélweynchámeykencha'a, máxa nentemék ma'a énxet meyke apaqta'ák apkelpaknameykhal'a nápakhaw'ék tegma, máxa meyke egaqta'ák nentamheykegkok; ólpelapmok aqsa chá'a ektáhakxoho yetseksók ekhem, máxa axta'a entemék; kalyéha'ak eykhe nahan egyempe'ék máxa néletsapma eyke nentemék.

¹¹Máxa méwa élyexwéweykha nentemék negko'o negyókxoho nélpáxameykencha'a, máxa yágwáx'ay apkelpáweykha nentemék nélápentegeykencha'a; nélhaxanmeyk eykhe m'a nélwagkásamáxche teyp, makke kaweyk; nélhaxanmeyk eykhe m'a sẽlmallahanchesso nak aqsok ekmaso, tayépe eyke ekyetnamakxa.

¹²Xámók agko' negko'o nenmexeykha exchep, mólya'assáxma egagkok egagko' nahan ẽlsexnáneyákxa'; yetnegkek negyeseksa m'a aqsok magaqhémo, negya'ásegkók nahan ma'a aqsok ekmaso nenlánéyak.

¹³Nénmexeykekxeyk negko'o m'a Wesse' egegkok, negyenseykmek nahan negyetlo, magmáheyók agyetlakxak ma'a Dios egagkok, nenxeyenmeyk chá'a negko'o m'a nennaqtawáseykegkoho nak ennámakkok tén han ma'a nempelakkassesso nak anteméssessamhoxma ekmaso egmók, nenláneykekxeyk chá'a negko'o élchetámeykha egwáxok yaqwayam ólyexanchesha m'a énxet'ák.

¹⁴Taqnómaxchek ma'a aqsok ekpéwomo nak, makhawók yetneyk ma'a aqsok ektaqmalma nak, kelpelapmeykha aqsok ekmámnaqsoho m'a apkelweynchámeykegkaxa nak chá'a énxet'ák apxámokma, keñe m'a meyke nak nentémakxa yawanchek ekmáheyo kawa'.

¹⁵Massegwokmek ma'a aqsok ekmámnaqsoho nak, kélmenyexchessek aqsok apagkok ma'a apyetnakhasso nak aqsok ekmaso. Axta kalchak apwáxok Wesse' egegkok apwet'a méko aqsok ekpéwomo.

¹⁶Teyekmek axta apwáxok Wesse' egegkok apwet'a méko ekyetnakhásawo awáxok xa; tén axta apmeyncha'a aqsa apmopwána apagkok apagko' apkelana aqsok, apkelwagkasso apagko' axta nahan aptáhak teyp ma'a.

¹⁷Apcháhakkásekpek axta m'a aptémakxa ekpéwomo, ektémól'a m'a negákkásamáxchel'a, apketchessek axta apqátek ma'a nélwagkásamáxche teyp, ektémól'a m'a sẽlpextétamo apketchesso apqátek, aptaxnékxeyk axta m'a negyaqmagkáseykekxa nak sẽlteméssesakxa ektémól'a m'a nentaxno apwenaqtél'a, apchaqlákpek axta m'a aplo ektémól'a agaqlaxchek ma'a yát'apáwa.

¹⁸Egkések sa' chá'a Wesse' egegkok xama m'a ekpayhawo nak chá'a egkések; ellegássesagkohok sa' ma'a apkelenmexma nak. Egkések sa' chá'a ekpayhawo nak chá'a egkések ma'a aptaqnagko nak chá'a; kawakxohok sa' nahan ma'a apheykha nak apkelókxa neyáwa wátsam ekwányam.

¹⁹Apyókxoho énxet sa' yáwhok Wesse' egegkok apkelwet'a sa' apcheymákpoho, eyeynamo m'a teyapmakxa ekhem nak ekweykekxoho m'a taxnegwánxa ekhem, hakte máxa yégayam ekyawe sa' etnehek éxyamok ma'a, ekyawheyáseykhal'a éxchahayam ekyennaqte agko'.

²⁰Éxyamok sa' yaqwayam etnehek apwagkasseykta teyp ma'a Sión tén han ma'a apyókxoho nak Jacob aptawán'ák neptámen apkelwátéseyak nak apkeláneyak apkeltémakxa ekmaso. Wesse' egegkok apxeyenma xa.

²¹Aptáhak Wesse' egegkok se'e: “Élanak ko'o ekhémo mók sélpaqhetchásamáxkoho kéxegke, ekxénchek nahan megkakxayhek kaxwók xama enxoho kéxegke m'a sekmowána tén han ma'a nélxekmowásamáxche ahagkok sekmésa nak, ekweykekxoho m'a kéltawán'ák kélnentámen megkatnégwayam néxa.”