Read Lengua Sur Isaías 60 Bible Online

Isaías 60 - Lengua Sur bible

Isaías 60

¹Kólchaqnekxa néten, énxet'ák Jerusalén, kólaqlaxche apkelyenma, hakte wa'ak élseyéxma kélagkok, kelyenmeyk Wesse' egegkok apcheymákpoho kélyetseksa'ák.

²Chapchek ekyaqtéssóxma náxop, apkelaqlákpek ekyaqtéssóxma m'a apyókxoho énxet'ák, elsaksek sa' eyke exma kélyetseksa'ák kéxegke m'a Wesse' egegkok, keytnak sa' kélnepyeseksa m'a apcheymákpoho.

³Elya'áwak sa' apyókxoho énxet'ák ma'a élseyéxma kélagkok nak, elya'áwak sa' kelwesse'e apkelwányam ma'a élyenmakxa nak ekhem axnagkok kélagkok.

⁴Kólyeheykha, kólsawheykha exma kélnepyáwa': apyókxoho énxet apchaqnákxa', apkelmeyókmek xa kélhágkaxa nak. Makhawók sa' elenyenták elchexyók ma'a énxet'ák kélagkok; kólqeynenták sa' kólnaqlanták ma'a kelán'ák nak.

⁵Kélwet'ak sa' agkok kéxegke m'a, kalpayhekxohok agkók sa' kélwáxok, awanhók agko' sa' katnehek ekmátsa kélwáxok; kólsantagkasek sa' ma'a aqsok éltaqmalma éleñama nak ma'a apkelókxa neyáwa wátsam ekwányam, kólxawágwaták sa' ma'a aqsok élmomnáwa apagkok nak ma'a pók aptémakxa énxet'ák.

⁶Kólwetak sa' ewakhegwak apxámokma apagko' yányátnáxeg apkeleñama m'a Madián tén han ma'a Efá; elwak sa' apyókxoho m'a énxet'ák apkeleñama nak Sabá, elpatmohok sa' ma'a sawo ekyátekto élmomnáwa tén han ma'a aqsok ánek ekmátsa nak ekpaqneyam éten agkok, elxének sa' nahan aqsok éleymáxkoho apkelane nak ma'a Wesse' egegkok.

⁷Kélnaqtósso sa' kóltéhek kéxegke apyókxoho m'a nepkések apkeleñama nak Quedar; elyagqak sa' nahan kélheykegkaxa m'a nepkések apkelennay'a Nebaiot apnaqtósso nak, yaqwayam sa' kólmések chá'a Wesse' egegkok kólnegkenchesek ma'a néten nak kélwatnéssamakxa aqsok, kólteméssesek aqsok kélmésso naqsa ekleklamo nak apwáxok, keñe sa' kayágwomhok apteméssesso aptaqmalma apagko' ma'a tegma appagkanamap aptaqmalma apagkok nak.

⁸¿Yaqsa aqsok xa élchampeykha nak chá'a ekho nak yaphope, élxega nak chá'a aptémól'a wáx'ay elmeyekxak ma'a apkelyáqtamakxa?

⁹Yántakpayhe xa élmeyókmo nak kélhágkaxa, Tarsis yántakpayhe élyawe m'a élámha amonye'e nak élxegayam, makhawók apkelenyekták eknaqlántegkesa m'a énxet'ák kélagkok, yetlo m'a sawo ekyátekto élmomnáwa apagkok tén han ma'a sawo ekmope élmomnáwa, eñama m'a Wesse' kélagkok, Dios Aptaqmalma nak ma'a Israel, apteméssessama nak kéleymáxkoho.

¹⁰Énxet'ák mók nekha apkeleñama sa' elánekxak ma'a meteymog kélhaxta nak nepyáwa Jerusalén, keñe sa' ma'a kelwesse'e apkelwányam kélagkok nak kóltéhek kélásenneykha; aplo axta eyke keñamak apkellegassáseykegkoho m'a Wesse' egegkok, apkelásekhayo eyke keñamak kaxwók kéleyósegwokmo apkelano.

¹¹Kalmayhagkok sa' aqsa chá'a kaxwók ma'a atña'ák kélagkok; megkólapagkokxeyk sa' chá'a ekhem tén han axta'a, yaqwayam sa' kólewának chá'a kólsantagkasek ma'a aqsok ekxámokma élmomnáwa apagkok nak ma'a pók aptémakxa énxet'ák, yaqwayam sa' elántaxnegwaták chá'a m'a kelwesse'e apkelwányam yetlo apkeláneykha.

¹²Énxet'ák melyeheykekxa enxoho chá'a kéltáhakxa kéxegke, elmassegwók sa'; kólmasséssók sa' apyókxoho m'a pók aptémakxa énxet'ák.

¹³Aptáhak apkeláneya Wesse' egegkok énxet'ák Jerusalén se'e: “Kólsókásegmak sa' kéxegke m'a aqsok élmomnáwa ekxámokma éleñama nak Líbano: cham'a yámet pino, abeto tén han ma'a yámet ciprés, yaqwayam sa' kataqmelchesek ma'a tegma appagkanamap ahagkok nak, yaqwayam sa' katnéssesek eyeymáxkoho m'a sekhamakxa nak chá'a.

¹⁴Elya'áwak sa' kéxegke m'a apketchek nak énxet'ák apnaqtawáseykegkoho axta chá'a, eltekxeyagkok sa' aptapnák kélmonye'e, metwasha apagko' sa' elháxahagkok eltekxeyagkok aptapnák xóp kélchaqnágkaxa apyókxoho m'a ektáha axta chá'a apkelwanyeykha, eltéhek sa' nahan Jerusalén ‘Wesse' egegkok Tegma Apwányam apagkok’, ‘Dios Aptaqmalma nak Israel Sión apagkok’.

¹⁵Megkóltaqmopagkehek sa' chá'a kaxwo', megkóltaqnaweyxcheyk sa' nahan chá'a, megkólchexáyhek sa' nahan chá'a kaxwók kélxakcha'awo', megkamassegwayam kéleymáxkoho sa' ko'o atnéssesek kéxegke, kélpeykessáseykekxa chá'a apkelwáxok énxet meyke néxa.

¹⁶Elmések sa' nento élmátsa agko' ma'a pók aptémakxa nak chá'a énxet'ák, elsókásegmak sa' aqsok apagkok ekxámokma élmomnáwa m'a kelwesse'e apkelwányam nak; elya'ásegwók sa' sektáha ko'o sélwagkasso teyp, ko'o sektáha nak Wesse', tén han sektáha sélmallahanchesso aqsok ekmaso, ko'o ekha nak Sekyennaqte Jacob Wesse' apagkok.

¹⁷“Sawo ekyátekto ekmomnáwa sa' agkések háwe sa' sawo ekyexwase, sawo' ekmope élyenma sa' agkések háwe sa' sawo ekyentaxno, sawo ekyexwase sa' agkések háwe sa' yántéseksek, sawo ekyentaxno sa' agkések háwe sa' meteymog. Wának sa' elwetaksek meyke ektáhakxa kélwáxok ma'a kelwesse'e kélagkok nak, wának sa' elanha apnámakkok yetlo ekpéwomo apkeltémakxa.

¹⁸Kamaskok sa' kañexchek kaxwók ekyennameykhaxma apkelyennaqteyáseykha apyempe'ék énxet ma'a kañe' xapop kélagkok nak, kamaskok sa' nahan kélmassésseyam aqsok tén han kéltawáseykha, kaltamhaxchek sa' aqsa kélhaxta nak nepyáwa tegma apwányam kélagkok ‘Segwagkasso teyp’ keñe sa' ma'a atña'ák kélagkok nak kaltamhaxchek ‘Nélpeykessamo Dios’.

¹⁹“Kamaskok sa' kólámenyéhok ekhem yaqwayam kalsássesexma m'a ekhem, kamaskok sa' nahan kólámenyéhok pelten yaqwayam elsássesexma m'a axta'a, hakte ko'o sa' atnehek, cháléwasso kélagkok meyke néxa, sektáha nak Wesse'; ko'o sa' atnehek élseyéxma kélagkok sektáha nak Dios kélagkok.

²⁰Megkatxehek sa' chá'a xama enxoho m'a ekhem kélagkok, megkamassehek sa' nahan chá'a apchápogwate m'a pelten kélagkok, hakte ko'o sa' atnehek cháléwasso kélagkok meyke néxa sektáha nak Wesse'; kamaskok sa' ma'a ekhem éllapwámeykegkaxa nak chá'a.

²¹“Énxet meyke apkeltémakxa sa' etnahagkok apyókxoho m'a énxet'ák kélagkok, etnahagkok sa' chá'a apagkok apchókxa meyke néxa, éltekteyapmakxa m'a xama yámet ektáha axta ko'o séneykekxa ahagko', sélane axta ko'o yaqwayam axekmósek ektémakxa seyeymáxkoho.

²²Exámekxohok apagko' sa' ma'a apqántawók apagko' nak chá'a; énxet apxámokma sa' etnahagkok ma'a apqántawo nak chá'a. Ko'o sekteme Wesse', kaxwók sa' ko'o wának kalanaxchek xa, ekwokmo enxoho ekhem agkok.”